وحشتوووووووووووونى اوووووى وفتكات وحشتنى مووووووت
لانى بعيده عنكم بقالى اسبوع
انا ولدت بعد ما عدا من التاسع حوالى 15 يوم ودى اول ولاده ليا
لانى متجوزه من 9 شهور عقبال كل بنت بالزوج الصالح وكل زوجه بالبنين والبنات
ولدت يوم الثلاثاء اللى فات اللى هو 151 وربنا رزقنى ب محمد عقبال كل مشتاقه ربنا يرزقها
تعالو بقا احكيلكو عذابى فولادتى القيصرى والطبيعى واضحكم فنفس الوقت
اه اصلى جربت الاتنين مره واحده هقولكم ازاى
انا صحيت يوم الولاده الساعه 6 صباحا على مغص بسيط بالظبط زى بتاع البريود
وقولت لما اعملى حاجه دافيه هيروح لكن مع الوقت فضل شغال
فضلت ع الحال دا رايحه جايه واقوم واقعد لغايه الساعه 10 فطرت فطار خفيف كدا
ودخلت مطبخى وشمرت ايدى وطلعت الكرنب وسلقت وحشيت وصينيه فراخ فالفرن
وغسلت المواعين ورتبت السرير وكل دا وانا فيا الطلق شغال وبيزيد
طبعا الحمد لله قبلها بكام يوم كنت بدئت اظبط شقتى يعنى يوم للتنضيف وتحضير هدومى وهدوم النونو
ويوم للغسيل ويوم لترتيب الدولاب لغايه لما جيت اروح اولد مكنش فيه هفوه فالشقه تتعمل
الحمد لله اللى قوانى على دا كله لوحدى ومفيش مخلوق ساعدنى بفضل ربنا
المهم فضلت مستحمله الطلق بيزيد والفترات بينه بتقل لغايه الساعه 3 العصر
وقومت لابسه ورايحه للدكتور انا ومرات اخو جوزى ربنا يبارك فيها ست محترمه ومسابتنيش
روحت للدكتور قالى تعالى اكشف عليكى نسا وكشف وفعلا قالى دى ولاده والرحم فاتح 4 سم
لكن الراس مرفوعه عن الحوض شويه وصعب ينزل دلوقتى
حولنى ع المستشفى اللى هو بيعمل عملياته فيها مستشفى شبه خاصه ونضيفه جداا
واختى كانت والده فيها مرتين فيها اهتمام وممرضات نضاف ورحه حلوه ومفيهاش غلطه الحمد لله
روحت علقولى محلول وحمو الطلق فيه بقيت بدل ما اصوت اكتم فنفسى يمكن الراس تنزل
وطبعا الخبر كان انتشر وببص لقيت اخواتى كلهم واخوات جوزى كلهم جنبى ومش سابونى
فضل الطلق حامى لمده ساعتين وانا بتعذب منه والدكتور جه بص عليا تانى
قال لسه الراس مرفوعه راح فاتح كيس الميه اللى حوالين الجنين بايده
يمكن الراس تنزل والواد ابن الهبله دا حالف ما ينزل راسه دلوقتى
الدكتور فضل يحاول لكن ابدا الراس مش بتنزل ويسبنى ويرجعلى بعد ساعه
وكشف تانى وبرضو الراس مش نزلت راح قايل بصو ي جماعه دى كدا حلها قيصرى
لان انا معنديش مشكله افضل مستنيها عشر ساعات لكن هى اللى هتتعذب
وفالاخر الراس مش هتنزل فكرو وردو عليا بس بسرعه لان الميه نزلت
انا بقيت ساعتها هبوس ايده يخلصنى باى طريقه وبينى وبينكم الدكتور فضل معاياا لاخر لحظه
عاوز يولدنى طبيعى لكن الحمد لله انى ولدت قيصرى وهقولكم ليه
لان لما الميه نزلت الحبل السرى لف حوالين رقبته
ولو كان اتولد طبيعى كان لاقدر الله حصله اختناق ولا حاجه
وانا شوفت كدا بعينى والدكتور مطلعه اول ما اتولد وورهولى
يعنى متفكريش ان بالقيصرى ربنا بيعذبك لالا دا بيعمل كدا لحكمه
انتى متعرفيهاش وهو بينقذك بيها
كنا ساعتها الساعه 7 مساءا تخيلو بقا عذاب من 6 صباحا ل 7 مساءا
ودخلت ؤضه العمليات عشان اولد الدكتور بتاع التخدير ادانى تخدير نصفى
شكلى فى مشكله بينى وبين التخدير لانى مكنتش عارفه اتنفس بعدها وجاتلى شرقه غريبه
المهم ولدت وبعد نص ساعه او ساعه تقريبا طلعت وطبعا شوفت حبيب قلب مامته وهو طالع
نسيت بيه عذاب الولاده كلها يارب خليه ليا وباركلى فيه وميحرمنيش منه ابداااااااااااااا
واول امبارح عملناله سبوع متعملش لحد فالعيله قبل كدا
بالمناسبه ي بنات هو من امبارح فالحضانه لان لقو عنده نسبه صفرا بسيطه الحمد لله على كل شىء
وقالولى النهارده وانا رايحه ارضعه انه باذن الله هيخرج بكره ادعوله بالله عليكم يرجعلى بالسلامه
لان البيت وحش اوووووووووووووى من غيره ونفسى يرجع يصحينى طول اليل تانى بقا
وامبارح شلت اللازقه والحمد لله حركتى بدئت تبقا شبه طبيعيه ادعولى اقوم بالسلامه
عشان اخدم نفسى بقا ومتعبش حد معايا اكتر من كدا
يارب اكون افدتكم بتجربتى اللى مش هكررها لمده 4 سنين او 5 ان شاء الله هههههههه
واى استفسار ان شاء الله هرد عليه لو موجوده
مين قدى؟ مين قدى؟ 294178_92.gif فتكات ست الكل Fatakat 294178 ش_ش – المنوفيه