السلام عليكم ..
انا كنت مقيمة فى القسم هنا قبل الجواز .. والحمد لله اتجوزت من شهرين ونص وزى ماكنت بستفاد من بنات هنا اتجوزت وجت تنقلنا خبرتها
فحبيت اتكلم معاكوا فى كام حاجة استفدت بيها فى الفترة دى ..
عقبال كل البنات يارب لما تتجوز وربنا يتمملها بخير يارب ويسعدها فى حياتها
انا حابة ابدأ معاكوا باللبس
– اولاً : لبس البيت ..
– انا فى حاجة كنت مقتنعه بيها جدا وماكنتش بسمع الكلام اللى بيتقالى
اى واحدة فى الدنيا اكيد عارفة جسمها
سواء قابل للتخن ولا لأ
يعني لو انتى واحدة طول عمرك وزنك مش بتغير طبيعي مش هتتجوزى من هنا وتتخنى من هنا
فانا كان وزنى ثابت من زمان مابيتغيرش فماقتنعتش انى اجيب اكبر من مقاسى بكام نمرة والاقى الهدوم منظرها مش حلو عشان واسعه طبعاً
بس كنت بجيب الحاجة مش مجسمة اوى .. يعني الكاشات والبيجامات طبيعي بيبقى المقاس واسع عليكي حاجة بسيطة
ده الاحسن والانسب
لكن لو انتى عارفة ان جسمك قابل للتخن مع الحمل والولادة لأ هاتى كام حاجة على مقاسك والباقى اكبر من مقاسك عشان حرام الحاجة تترمى فى الدولاب ..
وبعيد تانى كل واحدة ادرى بجسمها .
– حاجة مهمه جداااااااااااا من هنا لبكرة .. لو ربنا رزقك بالحمل بتقضى سنتين رضاعة .. لازم لازم لازم تجيبى اغلب البيجامات والكاشات يا اما برقبة واسعه يا اما مفوحة من قدام
وده بجد لازم تحطوه فى بالكم جداً عشان فى حاجات هتضطروا تستغنوا عنها سنتين عشان تعرفى ترضعى بسهولة .
– بلاش تعندى وتقولى مش عايزة عباية مش بتليق عليا .. لازم على الاقل يكون عندك واحدة .. حتى لو مش ناوية تستقبلى بيها ضيوف وهتستبدليها بلبس خروج .. صدقينى هتنفعك بعدين .. فأسمعى كلام ماما وهاتيها .
– بالنسبة للاعداد فسامحونى مش هقدر اقول عدد بس اللى هقولهولك ان الراجل بيحب الحاجة اللى بتتجدد
يعني مش عايز يشوفك كل يوم ببيجامة حتى لو تحفة وواو
لأ نوعي .. كاشات .. بيجامات ( برمودا , هوت شورت , شورت , بنطلونات ) والبنطلونات لأن لو جالك حد قريب منك هتتكسفى ومش هتلاقى حاجات طويلة .
– حاجات كمان نفعتنى جدا فى جهازى .. جبت 2 ميكرو جيب جينز وظبطت عليهم باديهات الوانات صيفى كدة مفتوحة من الضهر او برقبة كدة يعني .. الحاجات دى بجد حلوة اوى كبديل للانجيرهات لان برضة لما تحتاجى تجددى بعد فترة من الجواز لازم تلبسي حاجة عينه مااخدتش عليها منك .. وظبطى عليهم صندل برباط طويل .. او سابوة كعب عالى مع خلخال .. وألفى منهم 100 طقم .. خليكى مبتكرة عشان ماتزهقيش وتزهقيه .
– الاكسسوارات مهمه جدا وخاصة الخلخال .. ولو جايبة بدلة رقض ظبطى طقم اكسسوريز معاها هتبقى وااااااااااااااو .
– اللبس الداخلى .. ده فعلا اللى مش هنصحك تكترى منه خصوصا البراهات .. انا بشوف بنات كأنها داخلة معركة .. ده فعلا اللى مقاسك هيتغير فيه وبسرعة جدا هتلاقية مش مقاسك .. وخليكى عارفة ان اللانجيرهات مش بتتلبس بـ برا .. يعني هتحتاجى بس للخروج .. والبيت تجيبى سوفت برا .. عشان البوش اب للبيت صعب جدا ومش مريح .
– بالنسبة للبس الخروج ..
– انا اكتر حاجة نفعتنى هى الجيبات القماش الالوانات اللى تحسى انك عروسة كدة وانتى لبساها .. لان لو جالك ضيوف انا بصراحة مابحبش العروسة اللى بتقابل ناس بجينز .. هيبقى ايه الفرق بينك وبين الضيوف اللى جايين ؟؟ لازم تبانى عروسة ..
يعني يا جيب على شيميز .. يا دريلات قماش .. ودى الحقيقة نفعتنى جدا جدا لما ربنا كرمنى بالحمل .
وكل طقم لازم تظبطى معاه الاكسسوريز بتاعته .. عقد مع خاتم مع اسوار لذيذة .. وصدقينى دى اكتر حاجة هتميزك .. بس بلاش مهرجان لان الاكسسوريز لو زادت بيبقى الشكل مش لطيف خالص .
– هاتى لبس خروج اكتر للفصل اللى هتتجوزي فيه لان خروجك فيه هيبقى اكتر ولازم تبانى عروسة امورة كدة .
انا قولت ابدأ باللبس الاول .. بس هستنى رأيكم اتكلم فيه المشاركة الجاية .. المطبخ ولا مفروشات ولا ايه ؟؟
اللى يريحكم
انا حابة ان الموضوع مايبقاش كلام مرسل بس .. يعني اتمنى انى افيدكم بأى حاجة اعرفها فهستنى ردودكم ..
واى سؤال انا معاكوا مش بزهق
ودى الستاير بتاعتى
Wedding Bouquet Wedding Bouquet 616305_17.gif فتكات رائعة Fatakat 616305 فيصـــل – مصـــ❤ــــر – الجيـــــزة