السلام عليكم ورحمة الله وبركاته
ازيكم يااحلى فتوكات
انا الموضوع ده اطلب مني اكتر من 7 مرات ع الخاص ولاني مبحبش ااخر طلب خصوصا من طلباتكم فقولت انزل موضوع كامل ليه
وطبعا لاني اسكندرانية هطلع كل الابداعات بتاعتي يعني السمك جه في ملعبي
انا مش هرغي ف الموضوع ده لاني تعبانة جدا فدعواتكم مش فاهمة انا الحمل عامل عمايله معايا جامد شويتين تلاتة
هنعمل صينية السمك السنجاري
بصو بقى دائما بيتعمل مع السمك اللي بيستحمل النار بعمنى ف اسماك متستحملش النار نهائي
انا استعملت سمكة لوط وديه شكلها
افهمكم نقطة مهمة اوي البايعين بيبعو السمكة اللوط ع انها قاروص
الفرق ف شكل الراس واللون
بس عايزاكم تنتبهو شوية اولا اللوط سعر الكيلو من 30 الى 35
القاروص الكيلو ب60 الى 65 يعني ضعف السعر
وده سمكة قاروص
بالنسبة لاهل الخليج والسعودية لان ليهم معزة خاصة ف قلبي لاني عيشت اكتر من نص عمري ف السعودية فطبعا معندهمش سمكة لوط ديما هنعمل ايه طيب
في نوعين سمك طعمهم خطير اوي
سمك شعور وسمك فارس
وده شكل سمك فارس
وده الشعور يابنات
ندخل ع المهم الصينية بتاعتنا
السمك السنجاري
المقادير
طماطم
فلفل رومي اخضر
بقدونس
جزر
بصل
كمون
توم
ملح وفلفل
زيت زيتون
خل
لمون
الطريقة
بنغسل السمكة كويس
وبعدين هنتبل باللمون والخل والكمون والملح والفلفل والكمون من بره من الناحيتين
طبعا بتتفتح من الدهر مش من البطن وبصراحة انا كان ممكن افتحها ف البيت بس الحمل والقرفة اللي الواحد فيها ف الحمل قولت خلي الراجل يعملها بره احسن وده شكلها من جوه
من جوه هنحط ملح وفلفل وكمون ولمون وكمون وخل ونسيبها حوالي ربع ساعة لحد ما اللون يبيض
هنقطع الطماطمية والفلفل والبصل والجزر مكعبات صغيرة
وده البقدونس المفروم
وده شكل السمكة بعد ما نتبلها من جوه وبعدين هنغسلها يابنات عشان لو في اي دم او اي حاجة ونحط تاني كمون ولمون وخل وفلفل وملح وزيت زيتون
هنجيب بوله نحط فيها الخضار ونحط معاهم فصين توم مفروم
وهنجيب معلقة صلصة ونحط عليها نص كوباية مية
وبعدين هنجيب صينية نغلفها ورق المونيوم
ديه يعتبر اكبر صينية عندي بس السمكة الله اكبر طلعت اكبر من الصينية بس مش مشكلة هنحط الحشوة ف السمكة والصلصة بالشكل ده
وبدخل الفرن
السمك الصغير البوري مثلا بياخد من 15 الى 20 دقيقة لان السمكة بتكون فيها نص كيلو او ازيد حاجة بسيطة
لكن السمكاية اللي معانا قاطعة كيلو ونص بتاخد سوا من 40 الى 45 دقيقة
وده شكلها وهيا خارجة من الفرن
مواضيع هذا القسم برعاية
Chef Abeer Hosny Chef Abeer Hosny 152334_33.gif برنسيسة فتكات Fatakat 152334 اسكندرانية وعايشة ف القاهرة عشان جوزي – مصر
سبحان الله و بحمده