السلام عليكم ورحمة والله وبركاته
ازيكو يا احلي فتوكات في الدنيا يارب تكونو بخير وكل سنة وانتو طيبين ومصر كلها بخير بمناسبة عيد الاضحي
الانهاردة جايبالكوا احلي كفتة مشوية اجمد من كفتة الحاتي ومتاكدة انها هتعجبكو
وكمان بالتفصيل الممل وطريقة توليع الفحم اللي كل الفتوكات سألوا عليها
المقادير
نص كيلو لحمة مفرومة
2 بصلة متوسطة
ملح وفلفل
2 حبة كبابة صيني مطحونة
والمقادير دي من حاتي مشهور ومعروف
الطريقة
نحط اللحمة المفرومة في الكبة وعليها باقي المكونات ونضربها لحد ما تبقي ناعمة جدا ودة طبعا علشان متفكش منك وتفضل ماسكة ع السيخ ودي اول تكة ودي صورتها
لحد كدة تمام يا فتوكات…
نيجي بقي لطريقة توليع الفحم اللي ناس كتير متعرفهاش وانا كنت واحدة منهم بس
الحمد لله عرفتها ولقيتها سهلة جدا
بصي ياستي اول حاجة نحط 3 او 4 فحمات على عين البوتاجاز 5 دقايق لحد ما يبقو جمر احمر
تكونى انتى فى الوقت ده رصيتي شوية فحم علي سطح الشواية بالمنظر دة
,ناخد بقي الفحم اللي كان ع البوتاجاز
ونحطه في وسط الفحم البارد ونهوي جامد لحد ما كله يولع بعضه ويحمروا ودة بياخد حوالي 10دقايق ودة شكلها
بعد كدة نصبع الكفتة علي الاسياخ ونحطها علي الشواية وفي اول دقيقتين من الشوي نحاول نقلب الكفتة علي جميع الجهات علشان متقعش من السيخ ابدا ودي تاني واهم تكة واسمها تشميع الكفتة ودي صورة ليها
وتسوية الكفتة مش هتاخد منك وقت ودي صورتها بعد 4 دقايق بس
ودي صورة كمان للكفتة بس كان الوقت اتاخر وشكل الفحم جميل قلت لازم تشوفوه
ودي صورة اول 3 اسياخ طلعتهم اتفضلوا بالف هنا
وطبعا الكفتة متحلاش من غير العيش البلدي المحمص علي الفحم
انا كدة خلصت موضوعي يارب يعجبكو وطبعا مش عايزة اقوللكم انا تعبت قد ايه في تصغير الصور ورفعها
فياريت متبخلوش عليا بردودكوا الحلوة اللي بتشجعني وتفرحني
والسلام عليكم ورحمة الله وبركاته
مواضيع هذا القسم برعاية
مس ميساء مس ميساء 1027238_1.gif ممنوعة من المشاركة Fatakat 1027238 القاهرة – القاهرة