وصفة النهارده هى الكشرى المصرى
وده طبق جميل ومغذى ومكتامل ومليان بروتين
هو صحيح مش بروتين حيوانى
بس مش لازم الاكله يبقى فيها لحمه او فراخ علشان تبقى مغذية
وده شكل طبق الكشرى
الكشرى المصرى
حنحتاج رز وعدس اصفر وعدس اسود
نوعين مكرونة
بصل محمر (اللى اسمه الورد)
صلصة الكشرى
الصلصة الحارة(الشطيطة)
اولا: الصلصة
نحمر بصلة فى شوية زيت
ننزل بعصير الطماطم ومعلقتين صلصة
نسيبهم يتسبكوا ونضيف ملح وفلفل وكسبرة ناشفة وكمون وبهار لحمه
ثانيا :الارز بالعدس الاصفر
نحمر بصلة فى شوية زيت
ونضيف الارز المغسول وشوية عدس اصفر صغيرين
نحط ميه الرز ( الرز اد الميه بالضبط) والملح والفلفل ونطوى عليه لغاية ما يستوى
الدقة عبارة عن نصف فنجان خل
عصير ليمونة
2 معلقة توم مفروم
2 كوب ماء
ملح وكمون وفلفل اخضر حامى (حسب الرغبة)
نقلب كل ده مع بعض وكده تبقى الدقة جاهزة
الصلصة الحارة
نحط زيت ونضيف معلقتين صلصة
بعد ما الصلصة تتشوح شوية نضيف مكعبات طماطم
نضيف ميه سخنة وملح وفلفل وشطة كتيررررررررررررررررر
هنا العدس الاسود سلقته فى ميه بملح وكمون
حمرت الشعرية وسوتها بره وبعدين ضفتها للارز بعد ما استوى
البصل المحمر
باقطع البصل
بارش عليه دقيق ونشا وافركه بيهم كويس
نحط البصل فى المصفاة وننزل بقية الدقيق والنشا
ونحمره فى زيت غزير
وطلع رائع ومقرمش وجميل جدا
الكشرى كده جاهز على التقديم
سلقت المكرونة والعدس
الارز استوى
والبصل اتحمر
ونحط طبقة رز وبعدين كشرى ومكرونة ونكرر الطبقات دى وبعدين نقلبه ونقدمه
ونحط الصلصة ونزينه بالورد اقصد البصل
ونحط جنبه الدقة والصلصات للى يحب يزود
ايه رايكم فى الكشرى جميل ويفتح النفس
يارب الموضوع يكون عجبكم
وافادتكم ولو بمعلومة بسيطة
مع تحياتى
مواضيع هذا القسم برعاية
فتاة المهمات الصعبة فتاة المهمات الصعبة 190913_14.gif Fatakat 190913 الرياض – السعودية