السلام عليكم ورحمة الله وبركاتة
انا قعدت ورا الفطير دة لحد مابقيت شاطرة فية الحمد لله وقولت اصورهولكوا بقى وكمان عاملاة على البوتوجاز من فوق احسن من الفرن بمراااااااحل
يالا بينا يافتوكات
المقادير لعمل فطيرتين وسط
– 3 كوب ونص دقيق
– مية حوالى كوب
– نص معلقة صغيرة ملح
– 3 معالق كبيرة سمنة
الطريقة
هننخل الدقيق فى طبق غويط ونحط علية الملح والمية حبة حبة ونعجن لحد ماتبقى عجينة بيضا وطرية ومبتلزقش
هنقسمها 6 كور كل فطيرة 3 كور وندهن وشهم زيت ونغطى الطبق
هنسيبهم يرتاحوا حوالى 5 او 6 ساعات كدة عشان يتفرد معاكم كويس
هنسيح السمنة
هندهن الرخامة زيت خفيف ونجيب كورة ونفردها بالنشابة كدة
وبعدين نفردها بادينا من الجناب كدة لحد ماتبقى شفافة ومتقلقوش لو اتقطعت عاااااااادى جدا
هندهنها سمنة
هنجيب الجنبين اللى فى اليمين والشمال على بعض وندهنهم
وبعدين الناحية اللى فوق وتحت على بعض وندهنهم برضة
هنحطها فى صنية مدهونة
هنجيب كورة تانية ونفردها وندهنها ونحط الكورة الاولى جواها
هنطبقها بالطريقة اللى فوق وندهن برضة
هنفرد الكورة التالتة ونعملها بنفس النظام ونحطها فى الصينية ومندهنهاش دلوقتى
ودى الفطيرة التانية عملتها بنفس النظام
هنغطيهم بقى ونسيبهم يرتاحوا نص ساعة كدة ونفرد الفطيرة وندهنها سمنة على الوش
هنغطى الصينية ونحطها على نار هادية على البوتوجاز من فوق
وهى مبتاخدش وقت خاااالص يعنى من 5 ل 10 دقايق دة اذا كملتهم
شوفتوا ارتفعت ازاى كانها فى الفرن
هنقلبها على الوش التانى
ودى بعد ما اتحمرت من الناحيتين
هنرشها بشوية مية ونغطى عليها علطول ونسيبها 10 دقايق كدة هتلاقوها طريت جدددددا وبقت تحفة
هناكل معاها جبنة بالزيت والزعتر ومرتة وبيض مسلوق وعسل اسود
المشاركة الجاية فيها الصور النهائية
استنووووووووووونى
اوعى ايدك والريموت كنترول هههههههههههههههههه
مواضيع هذا القسم برعاية
دودى وبسسس دودى وبسسس images/flowersavatars/avatar0020.gif عضوة فى ذمة الله Fatakat 309416 المنصورة – مصر