السلام عليكم يا فتوكات
وانا قاعدة كده على النت بدعبث على طرق أكل اوريها لماما
قمت لقيت الفرنش توست أداميوأنا الصراحة بموت فيه جدا
فقمت الساعة 5 الفجر ودخلت المطبخ اخترع
كان عندي بواقي توست ريجيم قلت مايضرش أجرب
فدخلت وانا كلي تفاؤل اني خلاص هاعمله,كل حاجته عندي الحمد لله
قمت لقيت مفيش لبن,قلت مش مشكلة شفت مرة طريقة من غير لبن ,كملي يا بنتي ومافيش حاجة تقف ادام طموحاتك
وكسرت بيضتين وطلعت التوست وخلاص اخدت وضع الاستعداد
قمت بدور على الفانيليا ,فص ملح وداب ,أتاري ماما عايناها في حتة كدا مش باينة وانا معرفتش الا بعدها
فقعدت افكر وقلت خلاص اكنسل الموضوع دي الفانيليا اهم حاجة عشان زفارة البيض
وبالفعل كنت هاقلبها بيض اومليت
وبعدين تفتأ ذهني وقلت ليه مااعملوش حادق مش هيحتاج فانيليا ,آخره ملح وفلفل
فرحت حاطيت على البيض ملح وفلفل ,وقلت بجملة الاختراعات ,روحت مطلعة كذا نوع جبنة وحطتهم فوق البيض ,وطلعت لانشون وقطعته صغير اوي وضيفته ,وقعدت اقلب كتير لغاية مالقوام تجانس
وبعدها سخنت المقلاية وحطيت الزبدة وبعدين حطيت التوست في البيض وقلبته من الناحيتين ,بس ارفعيه بسرعة عشان مش يبوش
ثم وضعته في المقلاة وقلبته على الجانبين لغاية ما شفت لونه الذهبي الجميل
وتوكلت على الله وقلت أكمل نتيجة افعالي وأكله
بس الحمد لله لاقيت التجربة لذيذة وتستحق الاختراع
وطبعا لو كان في لبن كان هايبقى احلى
واي اضافات وافتكاسات للفتوكات برضه هاتطلع حلوة ان شاء الله
فقلت أحكلكم عن تجربتي مع الفرنش توست الحادق
ودي صورة آخر قطعة منه ,عقبال ماافتكرت اني اصورها عشان اوريهالكم
عامة هي شكلا مبهدلة شوية لأن التوستاية كانت رفيعة حبتين وانا طولت في وضعها في البيض فباشت شوية وطلعت عيني في قلبها على النار,معلش بقى ,المرة الجاية نبقى ناخد بالنا
وبرضه ملاحظة, التوست غامق شوية ودا لأنه كان توست دايت فأنا كنت جايباه اسمر
واتمنى ان الفكرة تعجبكم واكيد تطبيقكم هايبقى احسن مني لأني للأسف لسه كي جي وان مطبخ
مواضيع هذا القسم برعاية
دعاء السحر دعاء السحر 171357_1.gif فتكات رائعة Fatakat 171357 mansura – egypt