بسم الله الرحمن الرحيم
ازيكم يا فتوكات يا حلوين عاملين ايه
انا بقالى كتير بسمع عن الفرخه المشويه على ازازه الكولا وكنت خايفه اجربها
بس اخيرا اتشجعت وقولت لازم اجرب ولانى بثق فى الفتوكات توكلت على الله وعملتها وطلعت تحفففففه بجد
يلا بينا على المقادير وبلاش كلام كتير
المقادير :_ للفرخه الواحده :
فرخه مغسوله كويس _ وفى الخلاط بقى نحط (( كوب زبادى – بصله كبيره – فلفلايه خضرا – طمطمايه – ملح – فلفل – كارى – بهارات لحم وفراخ – كاتشب – بودره ثوم – بودره بصل – رشه قرفه – شطه قليل – خل حوالى نص فنجان – ليمونه – ملعقه كبيره سكر – حبهان – ورق لورا ))
وبضرب كل ده فى الخلاط كويس جدا وبيبقى خليط سميك وناعم مش فيه كتل
واحطه فى طبق على الفرخه واكون مخرماها كتير من عند العظم بالسكين علشان تشرب التتبيله وتستوى كويس
وعلى التلاجه ليله كامله وبعدين بخرجها تانى يوم واجيب ازازه البيبسى احط فيها التتبيله الى كانت فيها الفرخه
وشويه مايه وبعدين احط الفرخه عليها زى كده
وبعدين قطعت معاها خضار (( بطاطس – كوسه – جزر – طرنشاط بصل ))
والتتبيله الباقيه حطيتها على الخضار والفرخه وبقت كده
وحطيتها على طول فى الفرن وكنت مشغلاه وانا بجهز الفرخه علشان يبقى سخن ودى صوره الصينيه فى الفرن
وقفلت عليها وقعدت فى الفرن ساعه ونص بالظبط ومحتجتش انى ازودها مايه ولا اى حاجه لان الخضار بينزل مايه
وبعد السوا حطيت معاها فحمه وقفلت الفرن كويس علشان تحتفظ بريحه الفحم
ودى الصوره بعد السوا
كانت طعمها جميل بجد وعجبت جوزى جدا الحمد لله لانه بيموت فى الفراخ المشويه 
ودى صوره قريبه زوووووووم
اكلناها مع رز ابيض وسلطه وبجد تستحق التجربه
والى القاء فى وصفات جديده من تعليمكم يا فتوكاتى 
التقيم هااااا مش تنسوا مواضيع هذا القسم برعاية
رحمتى رحمتى 247162_4.gif فتكات متميزة Fatakat 247162 المنصوره – مصر