ازيكم يا فتوكات انا بحبكم كلكم فى الله
وبحب احلى مدونة عرفنى على احلى واحب ناس على قلبى
جبتلكم النهاردة وصفة من وصفاتى يارب تعجبكم ان شاء الله
وان عجبتكم اتمنى متحرمونيش من الرد والتقييم
وصفتى هى الشيش طاوووك
هنبتدى بالمقادير
نقول بسم الله
1كيلو شيش طاووق(وراك مخلية)
ونقطعها مكعبات متساوية
فلفل اخضر مقطع مربعات+طماطم مقطعة مربعات متوسطة+بصل مقطع
بنفس الطريقة
طبعا نتبل الشيش طاووك بالملح والفلفل ومية البصل وعصير ليمونة
وحطيت كمان معلقة كبيرة من مبشور البصل ومبشور 3 فصوص توم
ومبشور واحدة طماطم صغيرة
وكان المفروض علبة زبادى بس مكنش عندى فا مستعملتش الزبادى فى التتبيلة
هنا وانا حطاها فى التتبيلة وباين فيها كل المكونات اللى استخدمتها
ولازم تتنقع ع الاقل ساعتين فى التلاجة علشان تتشرب من الخليط كويس
بعد كدة هنجهز عيدان الشيش طاووك الخشب او اسياخ الشوى الموجود عندك
ونرص قطع الفراخ بالتبادل مع الخضار بتاعنا
واحدة بصل وواحدة فلفل اخضر وواحدة طماطم وقطعة من الفراخ
لحد ما نخلص كل الكمية بتاعتنا
زى كدة
هنا انا رصيتهم فى صينية فرن وسويتهم فيها
بعد ما سخنت الفرن كويس ادخلهم ربع ساعة وبعدين اطفى الفرن واشغل الشواية
وكل شوية اقلبهم ع الناحية التانية
وارش عليهم من السائل اللى اتبقى عندنا كل شوية بالمعلقة لحد ما يستوى ويحمر كويس
ودى صورة تانية قبل ما تدخل الفرن
ودى صورة بعد ما خرجت من الفرن
اية رأيكم
شوفوا باقى الصور
وقدمت معاها الرقاق باللحمة المفرومة وعملتها بالشوربة الضانى
ها اية رئيكم
انا عملت صينية الرقاق بالطريقة العادية بتاعتنا
عصجت اللحمة المفرومة حمرت بصلة كبيرة وحطيت عليها المفروم
وبشرت كمان واحد طماطم وحطيتها عليهم وظبطت الملح والفلفل والكمون
وبليت الرقاق بالشوربة لما طرى شوية ورصيتة فى الصينية
4 وحدات من الرقاق وبعدين حطين المفروم وكملت باقى الرقاق بنفس الطريقة
ودخلتها الفرن لما احمرت خرجتها ورشيت ع الوش شوية شوربة تانى وغطيتها بالغطا
علشان تطرى من الوش وقدمتها مع الشيش طاووك
انا منزلة طريقة الرقاق بالحمة المفرومة فى موضوع منفصل بالصور للى يحب يشوفة
بس افتكر انو سهل والكل يعرفة اكيد
اتمنى لو الموضوع عجبكم متحرمونيش من الرد والتقييم ان شاء الله
واى سؤال او استفسار انا تحت امركم
نسيت اقولكم يا فتوكات تقدروا تعملوا حتة فحمة
علشان تاخد طعم وريحة الشوى ع الفحم
بأننا نولع الفحمة ونحطها فى طبق ونحطها فى وسط الصينية ونحط نقطة زيت
على الفحمة ونقفل عليها على طول
مواضيع هذا القسم برعاية
**شهد كلمات الرحمن** **شهد كلمات الرحمن** 175060_38.gif فتكات غالية قوي Fatakat 175060 العاشر – القاهرة