السلام عليكم ورحمة الله وبركاته
كل سنة وانتم طيبين
رمضان كريم يا حلوين
بصراحة قبل اى حاجة بشكر الاخت
حجابى على زوقها وتعاونها ومساعدتها لينا
وكمان تعبها معانا واقسم بالله بدون مبالغة
عاوزة اقولكم انى بعشق فتكات
وعضوات فتكات وبجد بحس انه بيتي التانى
ندخل في موضوعنا بقى
النهاردة بقى هجيبلكم
وصفة الشيف شربيني لحاجة جميلة قوى
مش عارفة الناس بتهملها ليه؟؟
مع انها مغذية وطعمها حلو لو عملتيه صح ورخيصة جداااا
وهى وصفة:
السمان المشوى مع الرز الاحمر
انتم عارفين انا بلاقى السمان المجمد ال4 ب14ج
بس انا بجيب الطازة الجوز يعنى الاتنين ب14ج
بصراحة انا دايما كنت بحشي السمان
لكن اقسم لكم بالله
الوصفة دى عجبت جوزى جداااااااا
وقالى انها احلى من السمان المحشي
نبدأ بالصور عشان نجري ريقكم شوية وبعدين ندخل عالمقادير والطريقة
المقادير:
2 او 4 سمان على قدكم
طماطماية
بصلاية متوسطة
معلقة زعتر
معلقة بابريكا
معلقة فلفل اسمر
شوية خل(لانه زفر شوية)
ملح
(بصراحة انا اي تتبيلة شوي بحط كمان
زنجبيل-كمون-معلقة كاتشب-معلقة زبادى-معلقةدبس رومان)
مقادير الرز الاحمر:
ربع كيلو رز
شوية طماطم بيوريه(متشال القشرة منها)
او معلقنين صلصة طماطم
مكعب ماجى -ملح-ماء
لو رز بسمتى كوب الرز عليه كوب ونص ماء
لو رز عادى كوب رز عليه كوب ماء
اوعو تقولو عليا بخيلة
الربع كيلو رز اتبقى نصه لان الصيام زى ما انتم عارفين
بيخلينا نشرب سوايل كتتييييير
الطريقة لشوى السمان
بنغسل السمان كويس جدااااا
بنفتحه من الظهر ونخبط عليه بسكينة كبيرة
عشان نفرده خالص
بنخلط كل البهارات بالطماطم بالبصل مع بعض في الخلاط ونتبل بيها
السمان مش اقل من 4 ساعات عشان الزفارة تروح
وبعدين نحطه عالشواية
بعد ما نكون مسخنناها وعليها كام نقطة زيت
ونخلى العظم لبره ولحم السمان لتحت عشان يطيب اسرع
انا فضلت حاطاه ربع ساعة على كل جنب
وبعدين بتاخدى السمان وتحطيه في طبق بايركس
ورشي عليه خلطة التتبيلة اللى اتبقت في الطبق
وعلى الفرن على طول تحت الشواية تاخد لون
للاسف ان صورت الخطوة دى بس موبايلي
شكله كان صايم واكلها
ههههههه
وطلعيه قدميه مع الرز الاحمر
وبالهنا والشفا
طريقة الرز الاحمر
بصراحة انا بقطع بصلة صغيرة جدااااا مع معلقتين زيت
وبعدين يادوب تدبل
بنزل المية واحط الملح والمكعب ماجى والطماطم البيوريه
وتغلى غلوتين كده احط الرز واقلب مرة كده واعلى واغطى
ولما يتشرب المية اوطى خاااااااااالص
واسيبه عشر دقايق هيكون طاب
وبرضه بالف هنا وشفا
صور نهائية بقى للاكل كله:
طبق المخلل الاساسي فى رمضان
طبق السلطة الخضرا
وكان عندى طبق مكرونة محمرة وطبق رقاق باللحمة المفرومة
بصو للسمان تانى النظرة الاخيرة:
وقيمولى بقى باللى انتم شايفينه
لانى تعبت بجد لانى عاملة الاكل ده الساعة
5 امبارح قبل المغرب كنت جاية من سفر(بس عشان خاطر عيونكم)
و النهاردة عندى عزومة 40 فرد وعماله اجهز من امبارح
ويادوب نمت 5ساعات وقمت
لكم جري اكتبلكم الموضوع
ادعولى بقى العزومة تطلع حلوة
عشان ابقى اعزمكم مواضيع هذا القسم برعاية
د/فيدو ديدو د/فيدو ديدو images/flowersavatars/avatar0012.jpg فتكات ست الكل Fatakat 262438 في الغربية على المنوفية بس قهراوية – مصر