الدخول بالمايوهات علشان حانغرق في شوربتي (شوربة البصل الفرنسيه بس بالطريقه الامريكيه)
السلام عليكم ورحمة الله وبركاته
ايوه زي العنوان كله يلبس المايوه ويربط دماغه كده زي سمير غانم في المتزوجون اصل شوربتي ماتتاكلش الا كده
بصوا يافتوكات انا بحب لما ادوق حاجه في مطعم وتعجبني احاول اعملها في البيت
والشوربه ده دوقتها بس على الطريقه الامريكيه في امريكا وعجبتني اوي وعملتها مره لاهلي وعجبتهم وقلت يالا بئه اعملها لجوزي كمان
شوربه البصل ده حلوه اوي في الشتاء بتدفي
بس بتاخد شوية وقت حوالي 2 ساعه بس تستاهل المجهود
****ملحوظه: بالنسبه للبنات اللي بتنقي البصل من الخضار وتشيلوا فاهمني طبعا .. مانصحهمش بالشوربه ده علشان كلها بصل طبعا
يالا نبدأ
بسم الله الرحمن الرحيم
المقادير:
4 بصلات وسط يفضل البصل الاصفر ويقطع على شكل نصف حلقه
فصين ثوم مفرومين
معلقتين كبار زبذه ومعلقة زيت عباد او ذره او زيتون
نصف معلقه صغيره سكر
نصف معلقة صغيره زعتر ناشف او عودين زعتر فريش
3 معالق كبار دقيق
معلقتين كبار خل عنب ( انا ماكانش عندي فاستبدلته بخل عادي وكان عندي صوص الوستشاير حاطيت معلقتين منه.. لما قريت الليبل بتاعه لاقيت مكوناته حمضيه كويسه حانزل صورته بس ممكن الخل الابيض لوحده عادي )
7 كوب مرقة لحمه
3 كوب مرقة فراخ (انا بحب اعمل الاتنين على بعض بحيث مرقة اللحمه تكون ضعف الفراخ او اكتر من الضعف بشويه وممكن لو عندك شوربة لحمه بس تعملي 9 كوب مرقة لحمه وتحطي مكعب ماجي فراخ عليها— بس اصل الوصفه ماتتعملش بشوربة فراخ لوحدها لازم لحمه)
ملح وفلفل اسود
عيش فينو بايت او باجيت ( العيش الفرنسي ذي بتاع كارفور)
جبنه ممكن بارميزان وانا استعملت خليط من الموزريلا والشيدر
الطريقة:
نجيب حله كبيره علشان البصل يستوي بسرعه
نقطع البصل نصف حلقه رفيعه
ونحط معلقتين زبده ومعلقة زيت ونسخنهم شويه وبعدين نحط البصل
بصوا بئه النار لازم تكون هاديه علشان احنا مش عايزين البصل يتحمر ناشف احنا عايزينه يتكرمل يعني يبئه بني بس طري اوي
نزود نص معلقة السكر علشان الكرمله
ونفضل نقلب كل 5 دقايق لمدة ساعه تقريبا لحد مالونه بيئه كده او اغمق شويه
عملية الكرمله ده اخدت ساعه واوعي تعلي النار وتحرقي البصل اصبري عليه لان اهم حاجه في الشوربه ده هي الكرمله
لما توصلي للون المطلوب زودي التوم المفروم
ونص معلقة الزعتر
وقلبي شويه لحد ماريحة التوم تطلع بس ماتحمرهوش يعني ماتخليهووش بني يادوبك يشم النار
وبعدين زودي 3 معالق الدقيق
بعدين حطي معلقتين الخل العنب او العادي زي ما استخدمته وزودت معلقتين من الوستشاير صوص
وده الصوص والليبل بتاعه
وبعدين حطي كوبايات الشوربه كلها وتقدري دلوقتي تعلي النار الحمد لله
اصلي اتذاليت علشان البصل يتكرمل بس شوربه تستاهل صراحه
وحطي ملحك وفلفلك زي ماتحبي
وعقبال ما الشوربه تغلي بئه (حوالي نص ساعه على نار وسط ) سخني الفرن
لو عندك العيش الفرنسي الباجيت مش حاتحتاجي تحمصيه بس انا قلتلكم ما كانش عندي ( عادي ولا يأثر عليا )
كان عندي عيش فينو بايت قطعته نصين وفتحته
وقشرته الطبقه اللي فاضيه ماعادا الجناب عادي
وحطيته في الفرن يتحمص شويه زي الصوره
حضري بئه ماجات الشوربه( انا دخلتها الفرن عادي بس عملت احطياتي حطيتها فوق صنيه علشان لو اتكسرت) او الطواجن الصغير لو ماعندكيش اعملي في طاجن كبير او طبق بايركس غويط
خلاص كده الشوربه غليت حوالي نص ساعه والعيش جاهز
صبي في الطواجن الصغير او الكبيره او ماجات الشوربه
وحطي قطعه او قطعتين عيش على الوش وبعدين خليط الجبنه الموزريلا والشيدر او البارميزان لو عندك
ممكن ترشي رشة زعتر على الوش
ودخليهم الفرن لحد مالجبنه تسيح
هااااااااا مستعدين للصورة الشوربه بعد ماطلعت من الفرن هاااااااااااا
سمعوني الطبل
داددادادادادداداداداددا
………
….
…
…
…….
….
…..
..
…..
..
….
..
.
اتفضلواااااااااااااااااااا بس حاسبوا تتلعسعوا مولاعاااااااااااا
نعمل بئه مؤتمر صحفي علشان الاسئله استنوا ماجاهز المايكات " 123 ايوه ايوه " ههههههه
-الفتوكات:" لازم النار تكون هاديه ؟"
الفتوكه انا: ده اهم حاجه في الوصفه فلااااازم نار هاديه لكرملة البصل
– الفتوكات:"ينفع خل ابيض بدل الاحمر ؟"
الفتوكه انا: ايوه ينفع
-الفتوكات : " الوستشاير صوص بيتعمل بيه ايه تاني؟" " وهو مهم في الوصفه ؟" " طاب نجيبه منين؟"
الفتوكه انا : بعمل بيه الهمبرجر واللحمه المشويه
هو مش مهم في الوصفه الخل كفايه
الصوص ده لاقيته بالصدفه في مجمع القوات المسلحه ممكن تشوفيه في كارفور ومش عارفه في منه في اولاد رجب او خير زمان او مترو ماركت ولا لا
– الفتوكات: "ينفع شوربة لحمه بس "
الفتوكه انا: ايوه ينفع
– الفتوكات: " طيب ينفع شوربة الفراخ لوحدها "
الفتوكه انا: هي ماتنفعش طعمها حايكون مش زي الشوربه الاصليه بس جربي مش حاقولك لا
-الفتوكات: "طاب لو مافيش عيش بايت وعندك فينو صابح"
الفتوكه انا: تقطعيه نصين الاول وبعدين تحمصيه وبعدين تقشريه علشان لو صابح مش حايتقشر بسهوله
-الفتوكات: "ليه بنقشره؟"
الفتوكه انا: علشان لما يتحط في الشوربه يشرب الشوربه
-الفتوكات: "ينفع التوست"
الفتوكه انا: ممكن تحمصيه وتعملي بيه بس بيبوش بسرعه اوي
ها حد عايز يسأل تاني انتوا رغايين اوي ههههههه ده على اساس اني مش رغايه هههههههه
——————————————–
شوفوا بئه بعد الرغي ده كله اكيد انا تعبت اوي علشان اظبط الموضوع
اللي مش حاتدعيلي حادعي ان شوربتها تبوظ هههههههههه
واللي مش حاتقيم حادعي ان بصلها يتحرق هههههههههههه
يالا ادعولي وقيموا
وارجوا من الاداره التثبيت
احبكم في الله مواضيع هذا القسم برعاية
jasmin_n jasmin_n images/flowersavatars/avatar0030.jpg فتكات هايلة Fatakat 371157 القاهرة – مصر