صباح الورد علي أجمل بنات في الدنيا أنهاردة عملت جمبري كرسبي بالتتبيله اللي بحبها و طلع رووووووعة حبيت أشارككم التجربه و أنزل الوصفه يارب تعجبكم و ماتنسونيش من دعواتكم الحلوة مقادير تتبيله الجمبري : علي حسب كميه الجمبري اللي هاتعمليها و عدد أفراد الأسرة أنا عملت كميه صغيرة علي قدي أنا ووالدتي ربنا يخليهالي طماطم – فلفل رومي – توم مفروم – لمون – بصله صغيرة – و أهم حاجة بالنسبه ليا في تتبيله الفيليه و الجمبري بالذات ( المستردة ) – شويه بابريكا – فلفل أسمر – ملح في المفرمة أو الخلاط نحط الطماطم و البصل و و نقطع اللمون و التوم و الفلفل الرومي و نطحنهم لو هاتستعملي خلاط أوعي تحطي عليهم ميا لأن الجمبري في التتبيله بينزل الميا بتاعته و بعد كدة نحط المستردة و البابريكا و الفلفل الأسمر و الملح و نقلب كويس و نحط عليهم الجمبري و نسيبه في التتبيله يتشرب مش أقل من ساعه ونص و دي صورة ليه بعد ما بقي في التتبيله أنا كنت مقطعه جمبها بطاطس للقلي نيجي بقي لخلطة الكرسبي اللي بتخلي الجمبري مقرمش و تحفه المقادير : شوية كورن فليكس مطحون لا ناعم أوي ولا خشن نص نص – كيس فيجيتار – معلقتين دقيق نقلب كل المقادير دي علي بعض و نطلع الجمبري من الخلطة ولا بيض ولا غيروا يا بنات و ماتقلقوش والله هايطلع متماسك و زي الفل غطي الجمبري بالخلطة بتاعتك و دوسي عليه عشان يمسك نفسه و رصيه في طبق و عالفريزر نص ساعه عشان يمسك نفسه دي صورة الخلطة في الزيت الحار هانقلي الجمبري بتاعنا و الحمد لله من فضل ربنا ولا الجمبري هايسيب الخلطة ولا غيرة , أول ماياخد لون دهبي طلعيه علي منديل عشان يشرب الزيت ماما كانت عامله عيش لبناني طازة ربنا يديها الصحة و طول العمر دة شكله ممكن بقي تعملي الساندوتش بالطريقة اللي إنتي تحبيها حطي مايونيز , كاتشب , خس , خيار مخلل , فلفل مخلل , أعمليه بالطريقة اللي إنتي تحبيها أنتي و عيلتك , و دة صورة للساندوتش قبل ما يتلف و كنت قليت البطاطس ممكن كمان تعملي زي ما أنا عملت رز بسمتي بالزعفران و الكركم و البسله و طبق سلطة جنبيهم لو مش حابه أن الوصفه تبقي ساندوتشات للناس اللي بتحب الرز والله يا بنات الرز بالطريقة دي روووووعة لو حد حابب الطريقة أو مايعرفهاش أنا هاكتبهاله , و دي صورة للجمبري مع الرز و السلطة أتمني تجربوا الرز بالزعفران و الكركم و البسله بجد أكتر من رائع أنا مدمنة جيلي بصراحة كنت عامله جيلي بالمانجا و جيلي بالكرز و قطعت عليه موز و لما بيجمد تقدري تزوقيه بالكريم شانتيه لولادك هايعجبهم أوي بجد أتمني تجربوا وصفتي يا بنات هاتعجبكم أوي و ربنا يسعد صباحكم بكل خير يا أجمل فتكات في الدنيا مواضيع هذا القسم برعاية Noodee 55 Noodee 55 651146_7.gif فتكات هايلة Fatakat 651146 الكويت – الكويت
