السلام عليكم ورحمة الله
أنا عاوزة أقولكوا على موقف حصل قدام عيني أنا شخصيا لواحدة أعرفها
راحت لدكتورة النساء عشان تعمل كشف عادي تتطمن على نفسها رغم انها متجوزة من 03 شهور فقط
الدكتورة طلبت منها تحاليل: البروجيسترون و هرمون اللبن
البروجيسترون كان 04
هرمون اللبن 37
الدكتورة الجميلة دي قالت لها ايه:
البروجيسترون ضعيف اوي كده مفيش تبويض
هرمون اللبن عالي و لازم تاخدي دواء
و هديكي منشطات لو محصلش حمل بعد 03 شهور هاديكي ابر تفجيرية
البنت انهارت و ده اقل وصف لحالتها
المهم قلت لها طيب توجهي لله و تضرعي له
وخدي بالاسباب وروحي لدكتورة تانية و عيدي التحاليل
الدكتورة طلبت منها تحاليلFSH, LHوهرمون اللبن تاني
FSH 04.5
LH 02.5
Prolactin 23.7
+الدكتورة التانية عملتلها سونار مهبلي يوم 15 في الدورة
النتيجة(ما شاء الله لا قوة إلا بالله):
السونار أظهر وجود بويضة في الرحم في معادها الطبيعي(أنا كنت معاها في السونار)
التحاليل بتاعة اللبن نزلت لوحدهامن 37 الى 23.7
تحاليلFSH & LH كويسة (وجود البويضة في الرحم معناه عدم وجود تكيسات او وجودها بشكل غير مؤثر)
يعني ايه اللي فات ده كله؟
يعني:
متاخديش راي دكتور واحد وخصوصا لو مشهور و عيادته زحمة، يا ريت تروحي ولو لدكتور واحد كمان
هرمون اللبن و البروجيسترون لازم يتعمل لهم تحليل كذا مرة قبل اي علاج
البروجيسترون ده مسؤول عن بطانة الرحم (حدوث إجهاض لا قدر الله)مش التبويض و فرق كبير بينهم
ودي حلها بسيط بمثبتات بسيطة
المنشطات اللي البنت كانت هتاخدها كانت هتبهدلها،ازاي انشط مبيض نشيط اصلا؟
حاجة كمان البردقوش فعلا كان له دور في تخفيض هرمون اللبن
أهم من ده كله التضرع الى الله: البنت دي لما الدكتورة كأبتها و حسستها انها حالة ميؤوس منها قالت لها مش انتي اللي بترزقي ربنا هو الرزاق و هو اللي هيعافيني و يجبر خاطري و قد كان سبحانه و تعالى رب العرش العظيم
أدعوا لها و كل مشتاقة ربنا يجبر خاطرها
Om Khadiga Om Khadiga فتكات متميزة Fatakat 263647 Cairo – Egypt