بسم الله الرحمن الرحيم
في الاول دى أولى تجاربى هنا في "وصفات الطبخ" وياااااااااااارب ماتكونش الأخيرة
وأولا برضه عايزة اشكر كل اللى ساعدونى في اكتشاف مواهبى الخارقة اللى ماكنتش اعرف انها عندى
يعنى مثلا لما اهدت لى اخت جوزى حبيبتى الفرخة الحلوة دى واكتشفت شطارتى في تنظيفها لوحدى وانى عرفت اطلع احشائها من غير ما افرقع كيس المرارة وده حسسنى بإنجاز عظيم لا تتخيلوه وكإنى كنت في عملية جراحية مثلا
وثانيا لما جت الفكرة سريعا انى اشوى الفرخة في شواية الفراخ اللى بتلف في الفرن اللى دايما كنت ظالماها وأقول عليها انها مشروع فاشل واتريها مش هي اللى فاشلة لاااااااااااا دا حد تانى
المهم جت الفكرة بسرعة وقلت هعملها دلوقتى على العشا وطبعا جوزى شجعنى اوى وما حبطنيش
بجد عايزة أقول لكل مبتدئة زيى اتشجعى وجربى وما تحبطيش نفسك وتقولى مابعرفش وانتى هتكتشفى في نفسك مواهب هتتفاجأى بيها
المهم ندخل بأة في الموضوع وكفاية رغى اوى لحد كدة ايه دا ده
الخطوات بالمقادير _ عايزة اقولكم انها خدت تقريبا نصف ساعة فقط خلصت هوا دا عشان لو مستعجلة وجالك ضيف فجأة وعايزة تكرميه وسهلة جدااااا جداااا جدااااا_
تجيبى الكبة بتاعتك تحطى فيها
بصلة متوسطة
وملحك
وفلفلك الأسود
وكمونك
وفصين حبهان _بعد ماتفصصيهم حطى قشرهم كمان علشان النكهة تبئى عال العال_
وخلك _حاجة بسيطة طبعا_
واعصرى 2حبة ليمون
اظن مافيش اسهل من كدة مقادير كلها عندنا انشااااااااااااء الله
كلة بأة كدة خبتطين في الكبة
واصبح عندك اسهل واسرع تتبيلة فراخ في الدنيا تبلى بأة الفرخة كويس من برة ومن جوة وتحت الجلد ظبطيها يعنى
وطبعا نثبتها بالخلة علشان لما تستوى ماتتقطعش ولو مفيش خلة ممكن تربطيها بالفتلة
نثبت الاجنحة كويس
ونثبت الدبابيس كويس اوى
*ونركب الشواية بأة اللى بتلف دى في الفرن ونفتح الفرن على 260 درجة من غير ماتفتحى الشواية دلوقتى وبعد نصف ساعة تقريبا اتأكدى انها استوت _شكيها كدة بالسكينة خصوصا عند لحم الصدر عشان هو اللى بيتأخر في السوى_ وبعدين افتحى عليها نار الشواية ثوانى علشان تاخد لون بس وماتتحرقش
**وماتنسيش تحطى تحتها صنية علشان لما بتنزل مايتها وهى بتستوى ماتدخنش الفرن وتبوظهولك وترجعى تزعلى منى
شوفتى لما خرجت من الفرن الخلة خلتها مافكتش من بعض ازاى
واهى بعد ماشلنا منها الخلة
شوفو كمان
ودى كمان وهى على جمبها
مسكينة عمالة تتصور ومش عارفة اللى هيحصلها كمان شوية
وبألف هنا وشفا
طبعا الشكل كان احلى من الصور بكتيييييير والطعم كمان احلى واحلى واحلى
ولولا الملامة كنت صورتلكم الطبق اللى فيه بقايا الهجوم اللى حصل عليها بعد ما اتنسفت طبعا
بس اهو مارضتش افسد عليكم اللحظة الحلوة
عايزة بأة كل الفتوكات تدخل وتشجعنى يمكن أكون في يوم فتوكة طباخة كبيرة كدة زيكم
ومعلش ماتنسوش تدعولى
وعشان اسهل عليكى الدعوة
ادعيلى ربنا يكمل حملى على خير ويرزقنى فيه بالذرية الصالحة اللى تقر عنينا وادعيلى كمان ان المشيمة تترفع
ومع السلاااااااااامة مواضيع هذا القسم برعاية
ام عبودى النونو ام عبودى النونو 1099254_11.gif فتكات رائعة Fatakat 1099254 فى بيتنا الجميل – بلدى الغالية