ازيكم ياحبابيبى
أنا النهاردة هقترح عليكم اقترح وصدقونى لما تجربوه هترتاحو-هدخل فى الموضوع علطول- طبعا المحشى أكلة معظم الناس بتحبها (مش هقول كلهم لأنى مبحبوش) المهم أزواج كتير بتطلبه وتلاقى الراجل داخل عليكى بكرنبة وانتى لسة مخلصة غسيل ودايخة فى توضيب البيت وبتبئى عاوزة..
ماعلينا أحسن حاجة أول ميجبلك الكرنبة تفكى الورق من بعضه زى الشاطرة وتسخنى المياه وتحطى الورق فى المياه المغلية (بس متسلقهش أوى ) يدوب تلفيه فى المياه يطرى شوية وتطلعيه على مصفاه يتصفى كويس … وبعدين هترجعيله ومعاكى المقص يا أمورة وانتى قاعدة تتفرجى ع المسلسل كده تقطعى الورق بالمقاس ال بتحبيه على أد مبتحشى (كبير – صغير )على كيفك
وبعد كده ترصى الورق فوق بعضه (هيكون طبعا متصفى وتمام مفيش مياه ) وبعدين تحطيه فى كيس فى الفريزر… وبكده الورق بأه جاهز عندك تمام
وطبعا البقدونس والكسبرة الخضرا بتعينيها فى الفريزر زى مقلتلكم قبل كده فى الموضوع بتاعى
نيجى للتسبيكة ممكن تعمليها بالليل وتصحى الصبح تلفى حلة المحشى وتولعى عليها علطول.. مش هتحسى بعبء فى تجهيز كل الحاجات دى فى يوم
وكمان الورق ممكن يفضل فى الفريزر لغاية شهر ميجرالوش حاجة لأنه قلب فى مياه مغلية
نصيحة مهمة : لما تيجى تطلعى الورق عشان تحشيه طلعيه من الفريزر من الصبح يعنى قبل متحشيه بساعتين بس المهم تطلعيه على مصفاه علشان المياه ال هتطلع منه (لأنه متلج) متخسروش هتلاقى الورق كأنه لسة مسلوق حالا…
::وهتعملى المحشى وبألف هنا ياقمرات وربنا يعينكم كلكم ويقدركم على شغل البيت ال مبيخلصش::
متنسوش تدعولى ربنا يباركلى فى أولادى جمال وفارس ويعوضنى بيهم خير مواضيع هذا القسم برعاية
رونا جوجو رونا جوجو 484491_8.gif فتكات ست الكل Fatakat 484491 بلاد الله – مصر
سبحان الله و بحمده