عارف يعنى ايه تلاقى والدتك او والدك او حد من اقاربك فجأة مش عارفك؟
عارف يعنى ايه بدأ يغلط فى اسمك؟
عارف يعنى ايه يبدأ فى حالة اشبه بفقدان ذاكرة وينسى ادق التفاصيل اللى بينكم؟
عارف يعنى ايه ينسى كل اللى كلمته فيه من دقايق ويفتكر احداث حصلت من سنين ؟
يعنى ايه يفضل يلف فى اى مكان مش عارف هو كان عايز ايه ولا رايح فين؟
ايوة فعلا
ده الزهايمر
مرض مش سهل ابدا
يفقد الانسان قدرته على التركيز والحركة مع تقدمه وتطوره
لو عندك حد مريض بالزهايمر لازم تاخد بالك من تطور المرض
1- مهم يروح لطبيب مخ واعصاب وهياخد علاج والعلاج ده للاسف مش بيقضى على المرض
لان المرض لسه مالوش علاج نهائى لكنه هيأخر تطور المرض ويقلل تقدمه قليلا
2- بعد ما يروح للطبيب ويشخص المرض ويبدأ ياخد العلاج مهم أوى متابعة مراحل تطور المرض
3- لازم يكون فيه شخص من أقارب المريض دايما ملازم ليه لان المريض بيحتاج عناية ورعاية خاصة ومهم تقرأ
نشرة الدواء كويس حتى تتمكن من انك تعرف ايه الاعراض الجانبية للعلاج وتفرقها عن مراحل تطور المرض
4- متابعة طبيب المخ والاعصاب مهمة اوى لاى أعراض غريبة ظهرت اثناء تناول العلاج
5- فى مرحلة تشخيص المرض اتأكد ان الطبيب طلب منك عمل التحاليل والفحوص اللازمة والاشعة على المخ للتأكد من اصابته بالمرض قبل البدء فى العلاج لان دى أدوية بتشتغل على المخ
6- ممكن استشارة اكتر من طبيب متخصص فى البداية وفى حالة تأكيد الاصابة بالزهايمر يتم المتابعة مع طبيب واحد فقط لمتابعة الحالة فى جميع تطوراتها
نصيحة هامة جدا : لا يجب الاستهانة ابدا بمرض الزهايمر او بحالة النسيان الزيادة المتكررة
سوف يتم التطرق لكيفية العناية بالمريض فى موضوعات لاحقة
أتمنى نشر اى معلومة عن هذا المرض والتوعية به لكل من حولك وكلما تم اكتشافه مبكرا كان أفضل
وأتمنى أن يجد العلماء قريبا علاجا فعالا لهذا المرض
ربنا يعافى الجميع
شكرا
عقل ستايل
عقل ستايل عقل ستايل فتكات حبوبة Fatakat 1177353 القاهرة – مصر