سلام الله عليكم
ازيكم يا فتوكات
نصيحه هقدمها لكم لوجه الله
طبعا فى انواع كتير من الريجيم انا جربت كذا واحد ومنهم ريجيم كان فيه بيض كتير فطار وعشاوفعلا بتخسى تقريبا 5 كيلو فى الاسبوع من غير ما تعملى تمرين واحد او تمشى يعنى تاكلى اللى مكتوب فى الريجيم وتنامى وتقعدى من غير ما تتحركى واخر الاسبوع تلاقى نفسك نزلتى 5 كيلو
وكان رائع الريجيم فعلا بجد بس لو مش عندك حساسيه من البيض ده اولا لان اثره بيظهر فى ساعتها
وده مقدور عليه
لكن المشكله لو جسمك عنده قابليه لتكوين حصوات وخاصه المرارة اللى عرفت انها بتزيد خصوصا لو حالتنا النفسيه مش قد كده
انا من سنتين كنت تعبت خصوصا لما اكل حاجه وآلااام رهيبه فى فم المعده بمجرد ان اى اكل ينزل المعده والله وساعات الميه كمان اول ما اشرب يادوب تنزل من المرىء الاقى آلام فى فم المعده لا تطااااق وزياده عليها القولون
رحت لدكاتره كتير محدش كان مصدق المهم لفيت على بتوع الباطنه كل واحد يطلع بتشخيص ويطلب
تحليل واعمل تحليل يطلع كويس واشعه تطلع كويسه
فين سنه تقريبا اكتشفت ان عندى حصوه صغيره فى المراره والدكتور قال لى خسى يا مدام وانتى زى الفل
ربنا يسامحهم
المهم عملت الريجيم اللى فيه البيض ده وكان هايل فعلا بس كنت اعمل اول اسبوع واكسل عن الباقى
وعدت سنه من الالام اللى ما يعلم بيها الا ربنا ورحت لدكتور قال لى ان الحصوه كبرت والقولون عندك عصبى ودى مسكنات عشان القولون وانتى زى الفل وحاولى تخسى كمان والف سلامه
عايزه اقول لكم انى مكنتش برضى اكل عشان الالام ما تبدأش لحد ما جت مرحله الالم يصحينى من عز النوم ويستمر لخمس ساعات واكتر لدرجه بقيت انزل فى عز الليل او الفجر اروح مستشفى عشان يفتحوا غرفه العمليات ويصرفوا لى منها حقنه مخدره من كتر الالم لان الحقن المسكنه مش بتعمل نتيجه ولا بتأثر
وعملت اشعه واكتشفت ان الحصوه بقت 2.5 سم وان المرارة ملتهبه وانها السبب فى كل اللى حاصل ده ولازم يتم استئصالها لانى كل ما استنى فى خطر تعمل خراج فى الكبد وندخل فى مواويل تانيه
اتصدمت ودورت على النت عن اسباب التهاب المراره وتكوين حصوات فيها وعرفت ان الكوليسترول هو السبب
مع انى مش باكل دهون بس قريت ان البيض مع الناس اللى جسمها عنده استعداد لتكوين الحصوات بيبقى
غير صحي ده غير الشاى بلبن مع انى مكنتش بحط سكر وماشى فل الفل فى الريجيم
ولقيت ان حصوات المراره دى نوعين وفى امكانيه لللتفتيت بس هتتبعى نظام غذائى صارم مدى الحياه لمنع تكوين حصوات تانى
سالت الدكتور لو ينفع تتفتت او اخد اعشاب عشان تتفتت على المدى البعيد واحافظ فى الاكل وامنع حاجات "لانى كنت مرعوبه من العمليه"قال لاء مالوش لازمه ولازم تتشال
هى المشكله عندى كانت فى التهاب المراره لكن لو مفيش التهاب كان التفتيت والنظام الغذائى الصارم ممكن ينفع وده اللى فهمته من النت
والحمد لله عملت العمليه من حوالى عشرين يوم والحممد لله اللهم لك الحمد فعلا مبقاش فى اى الم
بس تصدقوا لحد ما فكيت السلك مفيش دكتور قال لى اكل ايه وماكلش ايه لدرجه انى بقيت اسال الدكتور اكتر من مره بغلاسه اكل ايه يا دكتور اخر ما زهق قال لى ابعدى عن الدهون والسكريات قلت له مش باكل بدهون وماليش فى السكريات قال المهم دول اكتر حاجه حاولى تبعدى عنها عشان مش تتخنى وحمدلله على السلامه يا مدام
المفروض فى اغذيه اركز عليها ودى مضادات الاكسده وفى حاجات مفروض اخف منها قوى وكنت مستنيه دكتور ينطق بس ويقول لى تاكلى كذا وبلاش كذا مفيشششش
وقريت موضوع هنا عن ريجيم و فيه بيض هههههه
قلت انبهكم عشان محدش فيكم يحصل له زيي لا قدر الله وتاخدوا بالكم وحتى لو دكتور رجيم قال لك تاكلى بيض لازم تتاكدى الاول ان جسمك غير قابل لتكوين الحصوات وابعدى عن الكوليسترول حتى لو بكبايه الشاى بلبن الصبح لازم تتاكدى الاول
ههههههههه والنصيحه اللى سمعتها مليووووون مره ياريت ما تضايقيش نفسك وحاولى تستمتعى بالحياه
انا قلت لكم تجربتى على قد ما اعرف واللى عندها اى معلومه ياريت تفيد الكل بيها
اختكم
Cleopatra Cleopatra 168039_5.gif فتكات غالية قوي Fatakat 168039 الزقازيق ق ق ق – مـصــر