عاملين ايه بنات
انا الحمد لله جبت الاجهزة بتاعتى
بعد ما لفيت انا وماما شهررر
على المحلات وكمان فى النت
وتليفونات قرايبنا اللى مجربين الاجهزة اللى ناوية اجيبها
ـــــــــــــــــــــ
والحمدلله اشتريناهم على خير
عقبال ما يروحوا بيتنا يااارب 
فقلت لالالازم انزلكم معلومات عن الحاجات
عشان اى واحدة محتارة يمكن الموضوع يفيدها
بس الصور جبتها من ع النت
لانى ملحقتش اصور الحاجة
وبالنسبة للأسعار
نصيحة منى لالالازم قبل ما تنزلى تشترى تدورى ع النت ع اسعارهم
وكمان تجيبى رقم خدمة العملاء وتتصلى تعرفى السعر كام
عشان لما تروحى المحل تقدرى ترخصى مع الراجل طلاما عارفة سعره الاساسى
وكمان دورى ع محلات الجملة اللى بتوزع لبقية محلات الاجهزة
السعر فيها بيبقى ارخص
ــــــــــــــــــــــــــــــــــــــ
البوتاجاز
كنت ناوية اشترى كريازى القديم
كذا حد اعرفه مجربه وبيشكر فيه
وعمتى جايباه من كام شهر المقاس الكبير ب 2500
بس هنا لاقيت فتوكات كتير بيشكروا فى بوتاجاز يونيون تك اى كوك بالمروحة
وعجبنا لان المروحة بتوزع الحرارة كويس فى الفرن
وفيه منه 3 مقاسات
المقاس الصغير والمقاس الوسط 60*80 والمقاس الكبير 60*90
انا جبت المقاس الوسط 5 عيون
وده شكل البوتاجاز
جبته ب 2800 بس مش من محل الجملة من محل عادى
وقبل ما اشتريه اتصلت بخدمة العملاء 19012
وعرفت سعره و عرفت ان الاى كوك بالمروحة
فيه منه نوعين
واحد ب 2799 وده المقابض بتاعته احسن وفيه حاجة تانية فيه افضل بس مش فاكره
وده اللى انا جبته هتلاقوا المقابض بتاعته لونها رصاصى غامق بصو فى الصورة هتلاحظوها
اما النوع التانى ب 2699 ج ومقابضه اضعف من الاولانى
ودى صورته هتلاقوا المقابض بتاعته شكلها مختلف عن التانى
ـــــــــــــــــــــــــــ
الغسالة
جبت غسالة فوق اتوماتيك lg ديجيتال
12 كيلو لون ابيض
من محل الجملة
اتصلت بخدمة العملاء قالولى الاسعار عند الوكلاء
لفيت وعرفت ان اللون الابيض منها ب 2250 والسيلفر يزيد عنها ب 150 ج يعنى ب 2400
بس لغاية ما رحت اشترى الاسعار غليت للأسف
وبقت الابيض ب 2430 ج والسيلفر ب2600 ج
وجبتها 12 كيلو
ال 10 كيلو منها حلوة وبتشيل البطاطين العادية لكن مش بتشيل البطانية الكبيرة الدابل
لكن ال 12 كيلو بتشيل البطاطين الكبيرة الدابل
وفيه كمان حاجة
ال 10 كيلو فيه منها نوعين
نوع عادى نظام الميه فيه عادى
ونوع تانى نظام الميه فيه شلالات وده الافضل
لكن ال 12 كيلو موديل واحد كله شلالات
ـــــــــــــــــــــــــ
التلاجة
كنت ناوية اجيب تلاجة ايديال زانوسى
بريما او جراند وكنت حابة جراند اكتر
بس لما رحت محل الجملة
الراجل قالنا توشيبا افضل منها وفرق السعر بينهم مش عالى اوى
الايديال زانوسى 14 قدم موديل بريما كان ب 2625ج
جبنا توشيبا 14 قدم سيلفر لامع مش مطفى ب 2900
شبه دى بس فضى بتلمع كان فيها جليتر
ــــــــــــــــــــــــــــــ
الفرن
جبت فرن فريش
انا دورت كتييير واكتر فرن حسيت ان معدنه حلو هو فريش
اشتريته فيه مروحة وشواية وصانيه وحجمه 45 لتر لونه سيلفر ب 480 ج
هو زى ده بس من غير السخانين اللى فوق
لان قالولى ان السخانات بتأثر ع الفرن ومش حلوة
ــــــــــــــــــــــــــ
السخان
عندنا هنا فى البيت سخان غاز يونيفرسال ديجيتال
فيه شاشة تعرفى منها الدرجات
وشغال حلو فجبت زيه ب 750 بس من محل عادى مش عند تاجر الجملة
ودى صورته
ـــــــــــــ
المكنسة الكهربائية
جبت مكنسة ال جى كتير شكروا فيه
زى دى ونفس لونها ب 550
ــــــــــــــــــــ
الكيتشن ماشين والمالتى كويك
الاتنين جبتهم براون
بس ده من فترة يعنى من سنة كدا
وسعر الكيتشن ماشين كان 950 ج وحاليا بقى بالف وحاجة
ودى صورته
المالتى كويك كان ب 450 ج
ودى صورته
انا كدا خلصت
عندى طلبين
دعوة حلوة بان ربنا يتمملى ع خير
ويفرح قلب بابا و ماما بيا انا واخواتى
وعقبال اختى الاء وكل البنات
و
ا
ل
ت
ق
ي
ي
م
وزغرطى يا فتووووووووكة
شوشو بقت عروووووسة
بنت الشيخ امين بنت الشيخ امين 199855_95.gif برنسيسة فتكات Fatakat 199855 اى بلد يعيش فيها حبيبى (وحاليا هى سوهاج) – قلب زوجى الذى ينبض باسمى ♥