السلام عليكم ورحمة الله وبركاته
انا أول مرة أكتب موضوع فى القسم هنا لأنى لسه مستجدة فى الجهاز فأنا اللى بتعلم منكم
بصوا بقى كان بقالى فترة بدور على مفرش العروسة اللى مالوش أى 60 لازمة ده
طبعاً المشكلة كانت فى ايه ؟؟
ان انا بحب الحاجات المودرن او بمعنى أصح بحب الحاجات البسيطة اللى مفيهاش زحمة ولا شغل كتير
فى اى حاجة سواء عفش او فرش أو لبس أى حاجة يعنى
وأكييييييد زى ما أنتوا عارفين المواصفات دى مش موجوده فى مفارش العرايس اللى بنشوفها
بتبقى عبارة عن كرانيش x تطريز x ورود x بربرق
اللى هى بتتفرش ليلة الدخلة وأول اسبوع فى الجواز علشان الناس اللى تيجى تتفرج ويقولوا جايبة مفرش
بعدين يتشال فى كرتونته ويتركن على كده لأنه ولا ينفع يتنام عليه ولا يستغطول بيه ولا ليه أى استخدام
قعدت ألف على المحلات مفييش ولا مفرش عجبنى قبل كده غير مفرش واحد فقط
كنت شوفته عند الحناوى فى الآزهر وكان عبارة عن ستان سادة
عليه شغل رقيييق أوى بالتل على الحروف فقط وعجبنى جداً ساعتها
بس معرفش ايه اللى حصلى قلت لماما هنبقى نيجى تانى ناخده وكان ساعتها تقريباً
بـ 550 جنيه او حاجة فى الحدود دى
روحت بعد كده علشان أجيبه طبعاً ملقتهوش
وقعدت اوصف للناس اللى هناك شكله يقولولى لأ مكنش فيه حاجة بالشكل اللى بتقولى عليه ده
وكان البديل انى أدخل أشوف فى المحلات السورى وكده
أقل حاجة كانت بتعجبنى كنت بلقيها معديه الـ 2024 جنيه
امباااااااارح بقى كنت نازلة مول عندنا فى حلوان اول مرة أروحه اسمه ( دارك )
هو بصراحة جميل جداً وفيه كل مستلزمات العرايس
بس غاااالى اوى فى أسعاره وبعد ما اتفرجنا على كل حاجة هناك 3 أدوار
كان فى دور واحد بس لسه مطلعناهوش قلت لماما نبص عليه ونمشى
لقيناه ايه بقى ؟
دور فيه المفروشات
وبالصدفة البحته لقيت أشكال مفارش عجبتنى أخيراً
وقفت اتفرجت شوية وبرضو الحاجات اللى عجبتنى قالى بـ 2275
بعد ما يئست وخلاص قلت هطنش موضوع المفرش ده
لقت واحد عجبنى سألته بكام قالى بـ 1040
طبعاً برضو غالى جداً بالنسبالى
بس بصراحة عجبنى وكنت مستخسره أسيبه
لأن هو تركى وخامه حلوة جداً
سألته بقى على القطع بتاعته ايه
لقيت معاه ملاية ستان ساااااااااده والخامة بتاعتها جميلة ماشاء الله
و 2 كيس خدادية ستان سادة برضو
ودول علشان ينفع تنامى عليهم
و 2 خدادية مطرزين تطريز المفرش دول ستان وعليها طبقة تل هى اللى مطرزة
والمفرش نفسه خامته قطن فى ستان ينفع تنامى عليه
وفى جزء بس فى اوله بيبقى متطبق وعليه التطريز علشان لو حبيتى تفرديه
وتنامى عليه بقى عادى
دى صورته من على العلبة
ودى صورته فى العلبة وهى مقفولة
وده شكله جوه العلبة
ودى الخدادية بتاعته المطرزة وهى مفرودة
وده شكل التطريز بتاعه من قريب
هو بـ 1040 جنيه
و تركى وجايباه من حلوان زى ما قولتلكم
قولوا لى رأيكم بقى يا قمرات بجد حلو ولا لأ ؟؟
وادعولى بالله عليكم ربنا يتمم لى زواجى على خير
و ربنا يتمملكم انتوا كمان على خير يارب
والبنات اللى لسه متخطبوش ربنا يرزقكم الأزواج الصالحين يارب العالمين
مصرية وبحب الحرية مصرية وبحب الحرية 538413_2.gif فتكات غالية قوي Fatakat 538413 القاهرة – مصر