النهاردة يا حبيباتي
جايبة لكم أحلى وأسهل وأسرع طريقة لعمل
أطعم فاهيتا
الفاهيتا طبعا زي ما كلنا عارفين بتتعمل إما بالفراخ أو باللحمة
والنهاردة هعملهالكم باللحمة
المقادير:.
* لحم مقطع شرائح
" حاولي تقطعيها عمودي على نسيج اللحم اللي بالعرض "
بتفرق جدا في سهولة مضغها
* كوب زبادي
* بصلة
" ودي حسب رغبتك ممكن تعمليها حلقات
لكن أنا بعملها ناعمة علشان مش بنحب يبان البصل أوي في الأكل"
* عدد 3 فص توم
* ليمون
* معلقة خل
* التوابل
" ملح – فلفل إسود – كمون – كاري – بهارات فاهيتا لو مش عندك حطي بهارات لحمة "
* فلفل رومي مقطع حلقات
الطريقة:.
بضرب البصلة مع التوم في الكبة وبنعمها
وبعدين أحط عليهم كل التوابل وعلبة الزبادي وأعصر الليمون ومعلقة الخل
كل ده أخلطه على اللحمة المقطعة شرائح
وبعدين بسيب اللحمة تتنقع في التتبيلة الجميلة دي على قد ما أقدر
وخلي بالك الليمون والخل والزبادي كمان بيساعد إنها تستوي بسرعة
ده غير المذاق الرائع
ودي صورة اللحمة وهي في التتبيلة
بعد بئى ما تتنقع كويس
نحطها عالنار مع حبة زيت
وتسيبيها تستوي مع نفسها
هي هتنزل الماية بتاعتها
وهتستوي زي الفل
من غير ماتحتاج أي ماية تانية
وأول مانلاقيها شربت مايتها وإستوت ومش فاضل غير الصوص
زي كدة
نقوم نحط على اللحمة
الفلفل الرومي بتاعنا
ومانسيبهمش كتير عالنار خااالص
يعني تقليبتين كدة وخلاص
أولا علشان القيمة الغذائية اللي في الفلفل ما تقلش
ثانيا علشان في الفاهيتا لازم تحسي بقرمشة الفلفل
وبكدة يبئى عندك أحلى فاهيتا بيتي من صنع إيديكي
وأطعم من بتاعة برة بكتييييييييير
وكمان تقدري بسهولة تعملي جمبها
ومقاديره:.
كنت واخداها من الفتوكة " الداعية ربها" جزاها الله كل خير
2 كوب دقيق
معلقة كبيرة خميرة فورية
معلقة صغيرة بيكنج بودر
معلقة صغيرة سكر
رشة ملح
2 معلقة زيت
2 معلقة لبن بودر
وتعجن بماء دافئ
حتى تصبح كورة متماسكة
وبعدين تترك في مكان دافئ
" أنا بدفي الفرن ثواني وبعدين بحطها فيه"
وبعد ساعة بتخمر وبتكون روعة
بعدين تعملي كور صغيرة وتفرديها بالنشابة
أد الحجم اللي إنتي عايزاه
وتكوني مسخنة الطاسة بتاعتك وفيها يادوب همسة زيت
كإنها مدهونة بيها
وتحطيه ثواني وتقلبيه عالوش التاني
وكل رغيفين تحطي تاني نقطة زيت
وبيكون كده
يشبه شوية الشامي
بس أطعم
كفاية إن إنتي اللي عاملاه..
وبعدين تلفي فيه الفاهيتا
وبالهنا والشفا
وهمممممممم
معلش ما لحقتش أحطهم في طبق تقديم
كنا جاعنين بصراحة
والريحة كانت تحفة أوي…
بس عشان ما تتخانقوش عالساندوتش
خدو الطبق ده هدية مني ليكم
كل واحدة تقيم
تدوق منه
خلاص إتفقنا اللي تقيم بس هي اللي تدوق
ماجيش الاقي الطبق خلص
ومحدش قيم!!!!!!!
بالهنا والشفا
بحبكم في الله
مواضيع هذا القسم برعاية
ام عبودى النونو ام عبودى النونو 1099254_11.gif فتكات رائعة Fatakat 1099254 فى بيتنا الجميل – بلدى الغالية