السلام عليكم ورحمة الله وبركاته
ازيكو يا حبايبى انا هدخل فى الموضوع على طول هقدملكم انهارده اول اكله ليا على المدونة وهى الفاصوليا الخضر بلحم البتلوا.
المقادير
نص كيلوا فاصوليا خضرا مغسوله ومتقطعه
نص كيلوا لحم بتلو مقطع مكعبات قد علبه الكبريت
5 حبات طماطم مقطعين مكعبات
بصله كبيره مفرومه
فصين ثوم كبار مفرومين
قرن فلفل كبير مفروم
مكعب مرقه
رشة فلفل اسمر
رشة ملح
رشة كمون قليله جدا
ورق لاورا وحبهان
وزيت طبعا
الطريق بقى هى
حطى البصل المفروم مع الثوم والفلفل الاخضر والفلفل الاسمر والمرقه والملح الكمون والحبهان والورق الاورا وشوحيهم مع بعض لحد ما يصفرو واغسلى اللحمه وصفيها وحطيها على البصل وشوحيها هتلاقيها نزلت مايه استنى عليها لما تقرب تنشف وبعدين حطى الطماطم المقطعه عليها لحد لما الطماطم تدوب وتقرب تنشف حطى عليها الفاصوليا وقلبيهم مع بعض شويه لما تلاقيهم نشفو خلاص حطى كباية ميه وسيبيهم يغلو شويه واطفى عليها واغرفيه سخنه مع رز بالشعريه .
معلش انا لسه عملاها دلوقت وكنت مستعجله ملحقتش اصور لا الكاميرا كانت فاصله شحن
بس اول اما جوزى ييجى من الشغل واغرف هصوره وهى مغروفه وهنزله جربوها بقى وادعولى ام رايان القرقاريه
مواضيع هذا القسم برعاية
القرقاريه القرقاريه فتكات حبوبة Fatakat 898727 محافظة الاسماعيليه – مصر
سبحان الله و بحمده