سلام عليكم يا بناااات
حاليا و نظرا للظروف بتاعت البلد كتيير بقوا مضطرين انهم يتجوزوا فى شقة ايجار سواء عقبال ما يجهزوا شقتهم او عقبال ما يقدروا يدوروا على شقة كويسة يقدروا يجيبوها
و طبعا بتبقى الحيرة هنعمل ايه فى العفش و اجيبه ازاى و ايه المقاسات و اعمل ايه
اسئلة كتييير بتبقى فى بال كل واحدة خصوصا انها عروسة و مش عاوزة تحس انها اقل من غيرها و انها تجيب برضه كل اللى نفسها فيه و تعمل كل اللى تحبه
انا حبيت اقولكم على خلاصة تجربتى لعل اقدر اساعد بيها اى واحدة و افرحها و اشيل من عليها اى هم او ضيق )
اول حاجة عاوزة اقولها : اوعى تنكسفى او تتضايقى انك هتسكنى فى ايجار او حتى تقولى للناس انتى احسن من غيرك كتييير و قوليها بشجاعة كده و متخليش حد يضايقك
*على فكره بره معندوهمش تمليك للبيوت ده الا نادرا كله ساكن فى ايجار و فى استديوهات كمان
اولا الموضوع ينقسم لحاجتين :
– اللى عندها شقة و عارفه المقاسات و كل حاجة بس لسه بتوضبها
– اللى لسه ربنا مرزقهاش بشقة فبالتالى مش عارفه ايه المقاسات او اى حاجة خااالص
اول حاجة : اللى عندها شقة و عارفة المقاسات
هتجيبى اوضة النوم طبعا بمقاسات الاوضة بتاعتك الاساسية فى شقتك و برضه الريسبشن نفس الكلام و الليفنج ممكن تجيبى كنبة واحدة بحيث انها ينفع تستخدم مرت تانية حاولى تبعدى عن الركنات لان نادرا لما بتبقى الاوض نفس المقاس بالظبط
المطبخ انصحك انك تجيبى وحدة واحدة فقط عشان كده كده هتعملى مطبخك على المقاسات الجديدة
تانى حاجة : اللى معندهاش شقة و لسه مش عارفة اى مقاسات
طبعا الموضوع ده بيبقى اصعب شوية و مش معنى انك لسه مش عارفة مقاسات انك متجبيش حاجة و تقولى اما ابقى انقل او اما اجيب شقة .. الله اعلم الرزق هيجى امتى
فليه تقعدى مضايقة و حاسة انك قليلة عقبال ما ربنا يسهلها .. هنجيب كل حاجة بس هنحسبها بذكاء )
غرفة النوم
هتجيبى مقاسات ستاندرد standard mesaures .. يعنى ايه مقاسات ستاندردر يعنى اللى دايما اغلبيه النجارين بيعملوها و بتدخل فى اى اوضة طبعا الا فى حالات استثنائية انا بتكلم فى نسبة 80-90%
السرير : 160*200 سم
الدولاب : 280 سم
الكومود : 50 سم
التسريحة : 100 سم
متحاوليش تيجيبى احجام اكبر من كده عشان متجيش تنقلى و تضايقى ممكن مثلا لما تنقلى تلاقى التسريحة صغيره شوية لكن هتقدرى تتصرفى انما مش هتقدرى ترمى كل الاوضة فالتزمى بالمقاسات المحددة
اوضة المعيشة living room
هتجيبى كنبتين برضه مقاسات ستاندرد : واحدة 2 متر وواحدة متر و 70 سم مثلا عشان تقدرى بعد كده تحطيهم باى شكل انتى حاباه فى شقتك الجديدة ان شاء الله
مكتبة تلفزيون صغيره برضه عشان تقدرى تنقليها و ممكن تكملى عليها
الريسبشن روم reception
برضه هتعتمدى اكتر على الكنب بمقاسات ستاندرد و بعد كده لو نقلتى فى شقة كبيرة سهل جدا تضيفى وحدات تانية زى كراى او شازلونج او حتى طقم تانى جمبة
اوضة السفرة
مقاسات ستاندرد برضه الترابيزة 180 سم و 6 كراسى و البوفيه لو حبيتى تعمليه بيبقى 2 متر
لو عاوزة تعملى نيش صغير يبقى مش اكبر من واحد متر عشان ينفع يتنقل بعد كده بسهولة
المطبخ
ده طبعا بيبقى حيرة فيه بيبقى تفكيرين دايما فى موضوع المطبخ :
اول حاجة تجيبى واحد مستعمل تمشى بيه حالك لحد ما تجيبى شقة ان شاء الله و ساعتها تعملى واحد على مزاجك
تانى حل و ده اللى عملته انى فصلت مطبخ بس فصلته بطريقة معينة اقدر استخدمه فيما بعد :
اولا انا اتفقت مع الراجل بتاع المطبخ انه يعملى كل وحدة منفصلة مع نفسها بحيث انى اقدر اعيد ترتيبهم مره اخرى
عملت اكتر الوحدات المستخدمة فى اى مطبخ زى واحد كونر و ادراج و مطبقية و جزء للتخزين و المساحات و الجرادل
يعنى قعدت تقريبا اشوف اغلبيه المطابخ بيبقى ايه شكلها و لقيت انه اكيد بيبقى فى كورنر و فيه حيطة جمبها و لازم بيبقى فيه مكان لادراج
طبعا فيه نسبة هدر ممكن تحصل بس اكيد مش هتبقى فى كل المطبخ , اللى اكيد بيحصل هدر فيه تماما هوا الرخام لانه اغلبيتها بيتكسر عشان المطبخ بيتفك فنصيحة محدش يجيب اى رخاام غااالى خااااالص
طبعا برضه سالت لو ضفت وحدات فى المستقبل هل ممكن اعادة دهان المطبخ كله بنفس اللون و الدرجة و لا لأ
يعنى من الاخر جيبى كل اللى نفسك فيه بس فكرى كويس قووى و احسبيها صح و حاولى تحسبى الموضوع من كل الجهات
اعرفى ان هيبقى فيه نسبة هدر اكيد فى العفش او ممكن حاجة متجيش بس انتى واخدة احتياطك على قد ما تقدرى
و كمان متنكديش على نفسك و تفضلى تقولى لا هجيب بقى لما اجيب الشقة و تضيعى على نفسك فرحتك بعفشك و هدومك و انك عروسة جميلة
الف مبروووووك لكل البناات مقدما .. يا رب كلكم يتمملكم على خير و تعيشوا فى سعادة
meshmesha123 meshmesha123 فتكات ست الكل Fatakat 212469 مدينة نصر – Egypt