اول حاجة يا ستي ركزي معايا
تجيبي حمص قبلها بليلة هاتي الحمص الكبير مش الصغير
حطيه في ماية دافية و غطيه
و تاني يوم بقى قشريه هيطلع معاكي الحمصاية نصين
بعد ما تتقشر
نيجي على الحريرة بقى
تجيبي حلة بقى حجم متوسط
خمس حبيات طماطم مبشورين على المبشرة ببذرهم
بصلة كبيرة مبشورة على المبشرة ناعم
ربطة كزبرة خضرة و ربطة بقدونس تخرطيهم ناعم بالسكينة
كل دة في الحلة
تحطي عليهم لحمة مكعبات و الحمص حوالي كباية كبيرة
نص كباية زيت
نص معلقة فلفل اسمر
نص معلقة جنزبيل مطحون
معلقة صغيرة ملح و شوية كركم
و كل الحاجات دي تتشوح على النار
و بعد ما تتشوح تملي الحلة مية مغلية مش ساقعة
و تسيبيها على النار بتاع نص ساعة كدة
و بعد كدة تفتحي الحلة و تجيبي شوية عدس اسمر بجبة حوالي نص كباية شاي تغسليه و تصفيه و تزوديه في الشوربة
و تسيبيه حوالي تلت ساعة و يعد كدة تجيبي حبة شعرية صغنطوطين و تضيفيهم على الشوربة خمس دقايق بقى
تكوني مجهزة لاهم مرحلة تجيبي الخلاط و تحطي فيه مية نص الخلاط مية تقريبا و تضيفي دقيق ابيض و تخلطيه و تزودي الدقيق لغاية ما يربط و يتقل
تجيبي الخلاط في ايدك و تفتحي الحلة و بمغرفة تقلبي الشوربة في حركة دائرية و اوعي توقفي تقليب
و تصبي الدقيق اللي في الخلاط و انتي بتقلبي
لغاية ما الشربة تربط شوية مش قوي يعني تبقى في تقل الملوخية كدة
و توقفي صب الدقيق و كل شوية تحركيها علشان الحمص مش يلزق تحت و في سلطنية بقى هاتي شوية ماية سخنة عليها معلقتين طماطم مركزة دوبيهم في المية السخنة و اضيفيهم على الشربة
علشان تديها لون جميييييل كدة و حركي كلللل شوية لغاية ما الدقيق تحسيه استوى كدة و دوقي الملح لو محتاجة زودي و بعد كدة كبيها في سلطانيات
و قدميها في الشتا ده
و بالهنا و الشفا
جربيها و هتدعيلي
بس زي ما انا قلت بالظبط مواضيع هذا القسم برعاية
اخر الاحزان اخر الاحزان 492986_2.gif فتكات هايلة Fatakat 492986 القاهرة – مصر