السلام عليكم يا أجدع أمهات ..
أنا باودي ابني تخاطب بقاله 10 شهور.. وهو الحمد لله بيتحسن… بدأ يعمل جمل صغيرة بس ساعات كتييييييييير يقعد يقول كلام مش مفهوم وبسرعة كده…
كمان لو حد غريب سأله على حاجة ممكن يعيد الكلام مع إنه عارف الإجابة.. أنا باتابع مع أخصائية تعديل سلوك وهي قالتلي إنه بيعيد الكلام لإنه اتعود على الإعادة في جلسات التخاطب.. وإنها فترة وتاخد وقتها.. ولو أنا مثلا سألته بيجاوب عادي…
ابني دلوقتي عنده 4 سنين.. وكمان 5 شهور بإذن الله المفروض يدخل مدرسة… عندي رعب حقيقي إن معاد المدرسة ييجي وتكون لسه المشاكل دي موجودة… بالله عليكم لو حد مر بظروفي يطمنني ويقوللي قعد في التخاطب قد ايه؟؟ وامتى مشكلة التكرار بتروح؟ وامتى الكلام الغريب اللي بيقوله ده يبقى مفهوم..
مستنياكم بفارغ الصبر ماتكسروش خاطري والنبي..
صحيح.. لو حد قاللي اسألي الدكتور التخاطب محدش بيرضى يديني وقت محدد لإن كل واحد استجابته غير التاني.. وكمان مش بيرضى يقول وقت طويل عشان نفسنا ماتتسدش ونوقف الجلسات.. عشان كده عاوزة أكون فكرة عامة كده عن الوقت اللي فاضل.. ربنا يكرمكن يا رب ويشفي ولادنا جميعا
توتة في المطبخ توتة في المطبخ 618823_2.gif فتكات متميزة Fatakat 618823 الجيزة – مصر