حبيباتى كل عام وانتو بألف خير بمناسبة حلول شهر رمضان الكريم
كلنا طبعا بيبقة نفسنا مانضيعش ولا دقيقة من الشهر الكريم الا بذكر الله وتلاوة القران
وعشا مانتشغلش كتير فى المطبح ونضيع وقت كبير بنحاول نحضر من قبل رمضان حاجات كتير توفر وقت وجهد
وزى ماوعدتكم انى لما اجهز حاجة اقولكم
النهاردة جهزت 3 حاجات
1-التمر
جبت شوية زى كيلو وغسلتهم كويس جدا من التراب وسبتهم ينشفوا نص ساعة تقريبا فى الهوا
وفصصتهم بانى احط تمرتين تلاتة فى كيس نضيف واضربهم بايد الهون واشيل منهم القمع والنوى واحطهم فى علبة نضيفة بغطا
واشيلها فى التلاجة وكل يوم اخد منهم كبشة وانقعها فى كوبايتين لبن كام ساعة وقبل المغرب ازودهم مية واضربهم فى الخلاط(بدون سكر)
وكلنا عارفين طبعا التمر واللبن سنة عن رسول الله عليه الصلاة والسلام
ولما نشربه على الريق فى رمضان بيمد الجسم بكل اللى يحتاجه من الطاقة اللازمة وله فوايد كتير وكفاية طبعا انه سنة
2-حشوة الكنافة والقطايف
جبت سودانى وجوز هند وزربيب وسكر بكميات متساوية
قشرت السودانى وفرمته على خفيف حطيت المكونات علها فى علبة
وقلبتهم مع بعض كويس
وغطيتهم وحطيتهم على رف التلاجة مع التمر لحين الاستخدام
ودى بقة
3- صوابع زينب
ودى اهداء للعضوة انا والحياة وحبيبة قلبى رفيدة بنت سعد والقمر امل الانصارى
اتمنى تعجبكم وتجربوها
ساعات اكون مشغولة وماعملتش كنافة ولا قطايف وطالبة معايا حاجة حلوة
اطلع كيس من الفريزر واحمره واسقيه شربات ومش هياخد منى عشر دقايق لانى حتى الشربات مجهزاه فى التلاجة
مقاديرها
2كوب دقيق-كوب سميد-نص كوب زيت-معلقة خميرة فورية-معلقة سكر-ذرة ملح-كوب ماء دافى
انا طبعا ضاعفت الكمية كشان اقسمها
الطريقة
اجهز الخميرة مع السكر وربع كوب ماء دافى واسيبهم 10 دقايق
اسخن الزين وافركه كويس مع الدقيق والسميد لحد الدقيق كله مايتشرب الزيت عشان تبقة العجينة ناعمة وناجحة
نحط عليهم الخميرة ونعجن بباقى المية ونسيبها ترتاح نص ساعة
اجيب اى حاجة مشرشرة او مخططة زى كدة واصبع العجينة
وامشى العجينة وافتحها من جوا كدة واخليها مفرغة من جوا عشان لما تنفش تبقة هشة من جوة ومش مكتومة
وارص الكمية كلها فى صوانى
واحطهم فى الفريزر ساعتين ولما يتجمدوا اطلعهم من الصوانى
واقسمهم على اكياس بالكمية اللى تناسبنى
واشيلهم فى الفريزر
واى وقت احب اعملها
تطلع من الفريزر على التحمير على طول فى زيت غزير وبعد ثانية كدة نهدى النار عشان تستوى كويس
ونطلعها على الشربات ونرش عليها جوز هند(اختيارى) وتقدم بألف هنا
جربوها يابنات
ناعمة وهشة ومقرمشة وخفيفة
لابيض ولاتعقيد
سهلة وموفرة وارخص وانضف كتير من الجاهزة
وان شاء الله بكرة اجهز شوية عيش للفطار ورقاق للسحور
بالطريقة دى
العيش الفلاحى ومن الفرن البلدى بالصور كمان
الرقاق الطرى من فرنى البلدى بالتفصيل الممل وبالصور
وكمان ادمس فول واعمل رايب للسحور
واعمل خروب ودوم واقسمه فى اكياس واحطه فى الفريزر وكل يوم اطلع كيس على الفطار
وده كان الجزء الاول من تجهيزاتى
من تجهيزاتى لشهر رمضان (بطاطس وتوم وفلفل )من ام يوسف
يارب الموضوع يعجبكم وتستفيدوا منه ياقمرات
رد: من تجهيزاتى لرمضان(التمر وحشو الكنافة وصوابع زينب)من ام يوسف بالصور – العضوة اناوالحياه هي صاحبة المشاركة
الله واكبر عليكى ومن عينى يحفظك ويحميكى بجد والله يابنات الست الجميله دى عملت من فتوكة فاشله بمعنى الكلمة لفتوكة مبدعه بشكر زوجى عملت كل اللى الموضيع اللى قبل كدا وشلتهم بالثلاجه وبالفعل نفزت كلامها وطلبت صوابع زينب لانى بموت فيها وبشتريها على طول بس دلوقتى ولا كارفور وهايبر ميستنفعو منى
وبقلها مهما ادعيلك مش حوفيكى الخير اللى عملتيه معى لما علمتينى ربنا يسعدك دايما ويباركلك فى اولادك وفى صحتك
ويارب تعزمينا قريب على نجاح بنوتك وربنا يكرمها بكل ما تتمنى
تسلمى يا م يوسف وتسلم ايدكى وكل عام وكلنا بخير ومتجمعين حوليك وتعيش وتعلمين احلى الحجات اللى بنحبها
مواضيع هذا القسم برعاية
ام يوسف واحلى بنات ام يوسف واحلى بنات 429970_11.gif مشرفة الموقع Fatakat 429970 بيتنا الجميل – مصر