وزنك زايد .. صحتك في الضياع .. من اقل حركة بتتعبي
ومش هاقولك بقى على الشكل والثقة بالنفس و و و لان الصحة هيا الاهم
وهيا الحافز الأقوى ..
طيب مستنية ايه
أصل الأكل في بيتنا كتير والعيال كل يوم عاوزين حلو وحاجات دسمة
اصل زهقانة وملانة وباحب اكل
اصل مافيش حركة ولا باطلع ولا بانزل
اصل بيتنا مابياكلش غير بالليل اوي
اصل اصل اصل اصل
لو قعدنا نقول مبررات من هنا للسنة الجاية مش هانوقف
طيــــــــــب ماتيجي تتحــدي كل الظروف دي وتكوني أقوى منها
ومن اى بيئة محبطة وترجعي لنفسك كل حاجة حلوة تستحقها
الصحة – اللياقة – الخفة – الرشاقة
هانروح بعيد ليه مانا جربت وبعد أول يومين فشلت
معلش احب اقولك اسفة انك بدأتي غلط
انتي بس حطي رجلك على الطريق الصح وهاتلاقي نفسك اصلا مش قادرة ترجعي عنه ولو بعدتي عنه يوم ولا يومين هاتلاقيكي رجعتي تاني
لانك هتتعودي على احساس جميل جدا
احساس كده بالطيران .. جسمك مرتاح معدتك مرتاحة نفسيتك مرتاحة
فيه أحلى من كده ؟
ايه الطريق بقى السحري ده
هو مش سحري ولا حاجة .. هو زيه زى اى طريق جديد بنبدأ فيه
عاوز صبــــــــــــــــــــــــــــــــر
وارادة
وطول بال
عشان نغيير عادات غلط لازم ناخد وقتنا عشان نفرح بالنتيجة
خطواتك كالآتي
جيبي كشكول اكتبي عليه من برة طريقي للرشاقة
حفزي نفسك وحطي فيه اى صور او عبارات هاتشجعك
وقسميه بالظبط زى الصورة كده
خدي مقاساتك
واكتبي عندك جدول زى ده
هاندخل مع بعض تحدي 30 يوم
الي هايكون في كراستك برضه بعد الجدولين دول
30 صفحة
اكتبي على كل صفحة اليوم الأول التاني التالت وهكذا
او لو تحبي تعملي جدول اسبوعي بالشكل ده مافيش مشكلة (وفكرة الجدول أحلى بالنسبة لي ) بتحمسني أكتر لما الاقي الايام كده بتتملى جمب بعض
—
نظامنا هايـــــــــــــــــــــكون كالآتي
* السعرات الحرارية
كل واحدة هاتكتب
وزنها – سنها – نشاطها خفيف متوسط جامد جامد جدا – الكيلوات الي عاوزة تنزليها وعدد الأسابيع
طب ازاى دي
هاتحددي أول هدف وليكن مثلا 6 كيلو في شهرين
اما تكتبي كل ده ان شاء الله اديكي سعراتك المطلوبة في اليوم
اللي هاتقسميها زى ماتحبي
كل ساعتين او كل 3 ساعات
* هانشرب مش اقل من 10 كوبايات : 14 كوباية ماية في اليوم
* مع رياضة ايا كانت كبداية 30 دقيقة في اليوم
نقسمها باذن الله على فترتين 15 دقيقة و 15 دقيقة
* الفطار يكون بدري قبل الساعة 10
—
لغاية دلوقتي اعتقد مافيش اى قيــــــــــــــــود ولا حاجة تخنق
هايطلع لك سعرات وليكن 1200 سعرة
وعندك يومك 24 ساعة وشوية معلومات هاقنعي عقلك بيها
فترة الصبح لغاية العصر الحرق بيبقى كويس اوي هاكل الحاجات اللي بتحتاج حرق وسعراتها أعلى
من بعد المغرب بيبدأ الحرق يقل هاخد بالي بقى واعتمد على الحاجات الاخف
——
دايما عينك على المعلومات الغذائية لأى منتج
اعرفي وشغلي دماغك طول الوقت
سعراتها قد ايه السعرات دي جاية منين كام نسية السكريات والدهون والالياف
ايه اللي هايفيدني وهايفيد صحتي
مثلا نفسك في تشيوكليت او شيبس او اى حاجة مش صحية اوي
اوعي اوعي تحرميييييييييي نفسك ( عارفة هو ده كان سبب رجوعك وعدم استمرارك لما قلتي لي فوق انك بدأتي يومين وبطلتي )
اه حرمتي نفسك
هاتمسكي الحاجة اللي عاوزة تاكليها دي وتشوفي سعراتها قد ايه
طلع 300 سعرة حاولي تاكليها فترة الصبح وبعدها تلعبي رياضة او تتحركي مع واحد شاى اخضر واكيد اكيد هاتخسميها من سعراتك بتاعت اليوم
—
دلوقتي مطلوب 10 بنات يشاركونا نشجع بعض وندعم بعض
وناخد بايد بعض لمدة 30 يوم
هاناخد فيهم يوم فري كامل كل 10 ايام من غير مانحسب سعرات ولا كل ده
يعني هايكونوا 3 ايام ان شاء الله وهانوزن يومه الصبح وناخد مقاساتنا
و30 يوم يسحبوا 30 يوم يسحبوا 30 يوم يقع مننا يوم يومين تلاتة في النص ونرجع تاني نعيد 30 يوم لغاية مانوصل لهدفنا
نفيد بعض نحط مشاركات تشجعنا وقصص نجاح
اكلات صحية
تمارين رياضية
كل يوم باذن الله هاحط لكم شوية تمارين نعملها اختيارية اللي عاوزة تعمل غيرها مافيش اى مشكلة
خليكي مرنة وحبي نفسك واستمتعي بكل لحظة في التجربة دي
مسودة التسجيــل
الكشكول مع
الورقة اللي فيها خطة الريجيم اللي فوق خالص مع مقاساتك
اسمك :
وكلمة تحفزي بيها نفســك
خطوات صغيرة الاتجاه الصح
اوعي تضغطي على نفسك وتتعبيها
حبيها واستمتعي معاها
بنات للجدية
عدم الإلتزااااااااااااام ليومين بدون سبب ممكن يعرضك للحذف
هانبدأ يوم السبت ان شاء الله
Muslima Wife Muslima Wife 84811_20.gif فتكات غالية قوي Fatakat 84811 فقط مع من أحبوني ! – مملكتي الخاصة