فتاتيكي الحلوين عاملين ايه؟
انا جايبة النهاردة وصفة سهلة جداااااااا وجميلة اعتقد مفيش حد خالص مبيحبش اللحمة المشوية يلا نشوف الطريقة
اول حاجة نجيب لحمة اي نوع بتحبيه بس انا عن نفسي بحب الضاني بس في الشوي بتكون اطعم واحلى وتكون اللحمة متقطعة شرايح رفيعة
ونحضر التتبيلة عبارة عن بصل – طماطم – توم – ملح – فلفل اسود – بهارات لحمة – رشة قرفة – اعشاب مجففة (روزماري – زعتر – ريحان) وزيت زيتون – وممكن نضيف كمان دبس رمان وصويا لو بنحبهم وخل عشان يساعد على تسوية اللحمة ونفرمهم في الكبة كويس جدااااا
وبعدين نتبل بيهم اللحمة ونبيتها في التلاجة لتاني يوم
وفيه كمان الكفتة والكفتة بقى لحمة مفرومة بحط عليها بصل وتوم وبقدونس وكسبرة وشبت وملح وفلفل ورشة شطة وافرمهم في الكبة كلهم مع بعض
وتاني يوم بقى نشويها على اي نوع شواية عندك انا عندي شواية كهربا بنحط فيها مية من تحت ونشغلها ونشوي عليها عادي
ايه رأيكوا شايفين حلوة ازاي وريحتها تجننن
على فكرة مش بتاخد وقت خااالص اثناء الشوي عشان هي بايتة في التتبيلة وكمان نخلي باقي التتبيلة نبقى كل شوية نحط منها على اللحمة وهي بتتشوي عشان اللحمة متنشفش منك اثناء الشوي وتبقى طرية وجميلة
ها ايه رايكووووووووووو
وصورة كمان عشان الحبايب
طيب استنوا رايحين فين ماشيين كده بسرعة ما صدقتوا لسه هنعمل العيش اللي يتاكل مع المشويات دي
المقادير
2 كوب دقيق – تلات اربع كوب لبن دافيء – 2 معلقة زبادي كبيرة – معلقة صغيرة خميرة فورية – معلقة صغيرة سكر – نص معلقة صغيرة ملح – زيت
اول حاجة هندوب الخميرة في اللبن ونسيبهم يخمروا مع بعض ويفوروا
ونحط باقي المقادير على الدقيق ونعجن العجينة كويس ونمسحها بزيت عشان متنشفش ونسيبها في مكان دافي تخمر
وهنا كده بعد ما خمرت
نقطعها ونفردها رفيع ( لو عايزين العيش رفيع اوي نسويه على طول ويبقى عيش صاج ممكن يتعمل بيه سندوتشات او لو عايزينه تخين شوية يبقى بعد ما نفرده نسيبه يخمر شوية عشان يتخن معانا ونغمس بيه انا هنا سبته يخمر بعد ما فردته وبقى تخين شوية )
وبعدين نسويها على صاج او صينية او اي حاجة على البوتجاز
وده شكله كده بعد ما استوى شايفين حلو ازاي وجميل وطعمه يجنن بجددد
انا بقى بحب في الاخر احطه مع اللحمة على الشواية عشان ياخد طعم اللحمة وريحتها ويبقى طعمه احلى
ودي صورة تاني للمشويات وانا عملت معاها بطاطس الشيبسي دي
وبس كده يا فتوكات يارب يكون الموضوع عجبكوا وياريت لو عجبكوا تدعوا لي ان ربنا يبارك لي في بنتي وياريت يعني متنسوش التقييم لو سمحتوا
مواضيع هذا القسم برعاية
شيكولاتة مسكرة شيكولاتة مسكرة 6875_7.gif فتكات ست الكل Fatakat 6875 فتكات – مصر