ازيكم يا احلى فتوكات فى الدنيا وحشتونى كتير معلش دايما بتأخر عليكم لما بنوى كده انزل موضوع
بتبقى خطوه صعبه جدا عشان اصور واصغر وانزل موضوع بس بحاول دايما اكون متواصله معاكم
من فتره للتانيه ……..المهم انا نويت يعنى والنيه خالصه لله ان انا انزل موضوع والحمدلله قد تم
موضوعنا النهارده عن كفتة داوود باشا طبعا احنا بنشوفها بطرق كتير ملهاش طريقه معينه
وممكن نزود حاجه او نقلل حاجه براحتنا طبعا وحسب المتوفر بنمشى نفسنا ….
النهارده احنا عندنا كفتة داوود باشا بالخضار وقبل ما ادخلها الفرن حطيت على وشها جبنه بس بجد غيرت
طعمها وجددت فيها كتير اوى ماهو لازم احنا نغير فى الأكله دا بيديلها طعم تانى وتحسى ان
هى اكله تانيه خالص وخصوصا كمان ان كلنا بنعانى من روتين الأكل يبقى لازم نغير فى الصنف
نفسه مش كل مره نعمله بنفس المقادير ونفس المكونات ونكسر الروتين
احنا رغينا كتير بس لازم المقدمه المتينه بتكونوا واحشينى بقى اعمل ايه لازم شوية لوكلوك معاكم شويه
نبدأ موضوعنا على بركة الله
بسم الله
اولا ان شاء الله هنجيب بصلتين بحجم متوسط ونصفيهم
من الميا عادى زى الكفته العاديه عشان مش تفك مننا
ونتبلها بملح وفلفل اسود وبهارات وزنجبيل وقرفه
ودى البصلة المتبله وميتها المصفاه جنبها اهى
وبعدين نجيب اللحمه المفرومه دول تقريبا 350 جرام
ونعجنها مع البصله المتبله كويس ونسيبها نصف ساعه
فى الثلاجه
خلينا نتفق ان اى حاجه بتتعجن مش بس دقيق
لحمه او بطاطس او اى حاجه لازم ترتاح شويه
عشان مش تفك مننا ومش تكون بتلزق كمان
وبعد ما نسيبها شويه المده اللى تحبيها بس يفضل
مش اقل من كده اكتر ماشى مافيش مشكله
ونبدأ نكورها ونحمرها وبعد ما نخلص نسيب الزيت
بتاعها على جنب هنحتاجه على فكره
شكلها اهو وهو بيتحمر
هنقطع الخضار بتاعنا ونسيبه على جنب
وبعدين كمان نجيب الطاجن بتاعنا ونحط فيه زبده وزيت
ونشوح بصله مبشوره ومعاها فصين توم
ورشة ملح ولما يبدأوا يتدبلوا نحط عليهم بهارات وفلفل اسود
ورشة كركم عايزه اخلى ليها لون حلو وكمان لما نحط توابلنا
مع البصل وهو بيتشوح بيدى طعم مختلف شويه
وانا جربتها فى كذا حاجه طلع فعلا الطعم مختلف عن لما
بنحط التوابل قبل ما الأكل يستوى
وبعدين حطينا الجزر اهو وشوحنا كله مع بعضه
وبعدين كمان حطينا مية البصل اكيد فاكرينها مش هنرميها طبعا
وبرده بتدى طعم
وبعدين نحط عصير الطماطم بتاعنا عادى ونسيبهم يغلوا شويه
ونحط الخضار يستوى شويه
وبعدين نحط الكفته المحمره بتاعتنا علي الخضار ويكملوا مع بعض
تسويه براحتهم بقى ونظبط الملح نشوفها كده لو محتاجه لسه
نزودها ملح بس مش كتير عشان لسه فى جبنه
ولما تخلص خالص نطفى النار
ونرش عليها جبنه انا حطيت ميكس من الشيدر والرومى
بجد كان طعمها جامد جدا وباين فى الاكل
ونحطها تحت الشوايه ودا شكلها بعد ما طلع
وزووووووووووووووم معانا كده علشان نشوف الكفته والجبنه
انا حطيت شويه ف الطبق علشان تشوفوها
عملت معاها ارز بشعريه وشوربة لسان عصفور على شعريه
بالمرقه واهو تجديد شويه
ويارب اكلة النهارده تكون عجبتكم وتكون سهله عليكم ان شاء الله
لا تنسونى بصالح الدعاء
مواضيع هذا القسم برعاية
mero_sh mero_sh 326490_4.gif فتكات غالية قوي Fatakat 326490 الدقهليه – القاهره