اللهم صل على سيدنا محمد ( عليه افضل الصلاة واذكى واطهر السلام)
كل عام وانتم بخير ويارب يكون عيد سعيد عليكم جميعا
وحشتونى جداااا… كنت ف اجازة لمصر ومحبيتش ارجع ليكم وايدى فاضيه
جبتلكم معايا حمام محشي بالزبيب واللوز والرز طبعا
وهنشوف الطريقه بالتفصيل باذن الله
بس الاول احب اقدملكم طبق المخبوزات ده واحب اشكر
اختنا الغاليه ام عمر12 لانى طبقت طريقتها ف البيتى فور وكانت فوق الممتازة فعلا ربنا يبارك فيها وف اسرتها يارب
ومايفرقش عن بيتى فور العبد وارقى المحلات والله
دايب دووووووووووب والسر طبعا ف صفار البيض
وده لينك موضوعها بعد اذنها طبعا
https://fatakat.univanet.com/#493678
اما السابليه وبسكويت توباز ف بطريقة منال العالم
ندخل على الحمام ونشوف الحاجات الاساسيه اللى لازم نعملها
لانى باشوف وصفات كتير هايله ولكن ينقصها بعض الاساسيات
ف التقفيل والتنضيف وده للطيور عامة …
اولا : لازم نقطع الجزء الاسفل بشكل مائل بالشكل ده والفراخ كذلك
ثانيا :لازم نرجع الجناحات خلف الحمامة وده بينطبق على باقى الطيور
ثالثا :جوا الفخد هنلاقى كورة صغيرة بيضا جنب الدهون بنسحبها بالراحه ونرميها …
وطبعا بنغسل الحمام بالملح والدقيق بدون خل ..ونشطفه كويس ونصفيه
المكونات …
حمام حسب العدد
لكل حمامة قبضة يد من الارز او الفريك
بصله مفرومه – 1 م ص ملح – 1/4 م ص فلفل مطحون
– 1 م ص كمون صحيح وده اساسي
كسبرة مطحونه – 1 م ك سمنه بلدى
الاضافات : 2 م ك لوز مقلى + 2 م ك زبيب منقوع وويصفى ويقلى
الكبده والقلوب مع الاحتفاظ بالقوانص لتقفيل الحمامة
شوفوا بقا يا بنات
الزبيب واللوز ده مجرد اضافه وغالبا باعملها ف العزومات
لكن ف العادى باعمل نفس المكونات بدون زبيب ولوز وكله نى فى نى بدون نار .. اتفقنا
ومتخافيش ريحة البصل مش هتتغير بالعكس بتكون احلى وكمان باحشيه من بالليل واطبخه الصبح عادى جدااا
هنخلط كل المكونات مع بعض مرة واحده
ولو كان فريك بانقعه ساعه واخلط كل المكونات نى ف نى
او باصفر البصله وعليها الفريك المغسول وازود حبة ميه صغيرين يبقى نص سوا اما الرز بيكون نى لازم لانه بيستوى بسرعه وممكن يعجن جوا الحمام
نبدأ بحشو الحمام ونرشها الاول من الداخل بكسبرة وكمون مطحون او فلفل اسمر
نحاول ندخل الحشوة للحويصله من بطن الحمامة وبتاخد حشو اكتر من بطن الحمامة
واللى تحب تحشي بين الجلد واللحم حسب الرغبه
ونسيب 1/3 فراغ عشان الرز بيتمدد اثناء الطهى
وندخل الرجل ف الفتحة بالشكل ده وغير كده بيبقى شكل الحمامة مش حلو وهى بتمد رجليها لبرا
لازم نقدمها بشكل مرتب وحلو
والرجل التانيه تحتها بالشكل ده
ونسدها بالقونصه زى الصورة بحيث تبقى من الامام والجنب
عشان الحشوة متنزلش اثناء الطبخ
سلق الحمام زى باقى الطيور
وانا باحب اكتر من البصل ف الطبخ لان الشوربه بتكون اجمل
وفيه طريقتين للسلق
الاولى : دى طريقتنا ف الصعيد بنشوح الكبده والقلوب ف معلقه سمنه عليها رشة ملح وفلفل ولما لونها يتغير بنضيف الميه ومجرد الميه ما تسخن بدون غليان بننزل بالحمام بالراحه وهنلاقى الحويصله اتنفخت فورا ونكمل البهارات ( ملح – فلفل – لورا – حبهان – مستكة حسب الرغبه- كمون – بصل )
الطريقه التانيه بدون دهون ودى طريقتى
اسخن الميه وقبل الغليان انزل بالحمام ( المفروض الميه تكون دافيه )واحط نفس البهارات و3 بصلات حلوين مخرطين
وبعد ربع ساعه اهدى النار واغطيه لغايه ما يستوى
وهنا بعد ما استوى الحمد لله
بعد التحمير او قبل التحمير لازم نكسر الارجل الزياده بالشكل ده
وبنحمر الحمام ف السمنه او بندهنها بالسمنه وادخلها الفرن
وهنا بعد التحمير ف الفرن
وطبعا الحمام مش بيتاكل من غير الرز بالشعريه والملوخيه الخضراء ..اممممم
فيه تكة مهمه جداااااا وهى ان الحمام او اى طيور بعد التحمير نشفت شويه ترشيها بكبشه شوربه سخنه وتغطيها بالفويل 5 دقايق
على فكرة ده تحمير بدون شواية الفرن
من سخونة الفرن بيوصل للون ده واحيانا باولع الشوايه لو مستعجله
وبعد ما تاكلوا الحمام وتغسلوا ايديكم تعالوا ورايا عشان تحلوا
وانا هاسبقكم وانزلكم الطبق والطريقه ف الحلويات
( كنافه بالشوكولاته وكنافه بالقشطة والمالتيزرز وكور كنافه بالبندق )
وف النهاية باتمنى ان اكون افدتكم ولو بمعلومه
وان موضوعى ينول اعجابكم وتشجيعكم
واتمنى دعوه منكم ان
ربنا يباركلى ف اهلى و زوجى و اولادى
ويرزقنا من حيث لا نحتسب ويحفظنا من كل مكروه
ويهون غربتنا يارب
وكل عام وانتم بخير مواضيع هذا القسم برعاية
كنزى همام كنزى همام images/avatars/peppers.jpg فتكات ست الكل Fatakat 538054 الطائف – لسعوديه