السلام عليكم يافتوكاتى الحلوين
بصو بقى انا جايه اقول رايى وتجربتى فى حمام التلات والموضوع ده ممكن يعجب ناس وناس تانيه ماتوافقنيش
طبعا اى عروسه تفكر فى جهاز المطبخ والنيش تجرى على حمام التلات وانا اولكم ودى تجربتى
اول حاجه نزلت العتبه وماادراكم ما العتبه زحمه موووت دخلت حمام التلات ومن اول مادخلت لقيت حاجات كتييييييييير ومعارض اكتررررررر وده يشد فيكى وده ينادى عليكى من اول مادخلت حسيت ان عنيا زغللت ومابقتش عارفه اختار من كتر الحاجه وحسيت ان كل حاجه شبه بعض
ثانيا بقى انتو هتقولولى مادى حاجه حلو ان فى معارض كتير وهتلاقى حاجات كتير هقولك اولا انتى مجبرة تجيبى معظم حاجتك من محل واحد طب ليه ماانتى مش هتدخلى تجيبى طقم الصينى من محل وتشيليه ع قلبك وتلفى بيه المحلات التانيه ولو جيتى قولتى لصحاب المعرض خلى الحاجه عندك هيعرف انك هتجيبى من برا وهيقولك خدى حاجتك معاكى
ده يابنات اللى حصلى دخلت لفيت معارض كتييير وعجبتنى شنطه المعالق ف محل والصينى فكان لازم اجيب بقيه الحاجه منه لانى مش هنزل كل يوم اجيب طقم وائجر عربيه وارجع تانى
الحاجه بقى اللى بجد كرهتنى فى المكان ده هى الاسعااااااااااااااااااااار
بجد نصابين نصابين نصااابين ولو مش معاكى حد بيعرف يفاصل جامد هيتضحك عليكى وحتى لو معاكى هيتضحك عليكى بردو طب ازاى
اولا يابنات بيغلو فى الاسعار جدااااا يعنى مثلا طقم الصينى قالنا ب 1900 وعمتو ربنا يخليها جابته ب 1200 شوفتو الفرق اد ايه وهكذا نيجى بقى للكاسات والله يابنات جبت اطقم وفاصلنا فيها بالعافيه خدنا الطقم ب 100 جنيه الاقيه هنا ف المولات ب 70 ج وطقم كوبايات يقولى ب 130 خدناه بالعافيه ب 85 الاقيه هنا ب 55 ونفس الشكل وبلد المنشأ وحاجات كتييير من دى ده حتى بتاع الرفايع الراجل يقولى هراسة التوم ب 35 ج انا اتصدمت و قعد يتحايل عليا اخدها ب 15 ج بعدها مارضتش
لا وكمان ايه يقعدو يقولولك ده الطقم ده تركى وده ايطالى وده مااعرفش ايه انا بصراحه كنت ببص ع الصناعه وفى حاجات مكنتش اخد بالى منها من التوتر والاستعجال الاقيها بعد كده صينى وتيجى بقى تكلميه يقعد يقولك لا دى الكرتونه بس اللى بيكتبو عليها كده عشان الجمارك لا ده هو اصلا تركى بس تجميع صينى لحد ماارفت بجد وبقيت اشترى الحاجه وارجع بيها تانى
والله يابنات كان فى ايام كنت برجع فيها من غير مااشترى حاجه خالص بسبب التوتر والبياعين والخوف ان يتضحك عليا وتكون الحاجه سعرها مش كده
الحاجه الوحيده اللى عجبتنى هناك هى صوانى التقديم وهو محل واحد بعد ماتدخلى بشويه ع ايدك اليمين واظن اللى راح هناك اكيد عارفه
النصيحه بقى اللى بقدمها لكل بنت لوجه الله
لو عاوزة تجيبى حاجتك ياعروسه ومايتنصبش عليكى ولا توجعى قلبك فى الفصال وتجيبى احلى حاجه عندك 3 اماكن
اول مكان المعارض والشركات الكبيرة زى رنين هتلاقى فيها كل حاجه وكل الاشكال والانواع وحاجات احسن مليون مره من حمام التلات وكل حاجه متسعره بسعرها الحقيقى يعنى لا هتفاصلى ولا توجعى قلبك ودى شركات اسعارها معروفه ومشهوره مش زى حمام التلات معارض مجهوله وكل واحد يحط السعر على مزاجه وبتاخدى حاجتك بالعربيه يوصلوهالك بدل ماتتبهدلى بالحاجه ف الشارع وتدورى ع عربيه
الهايبر ماركت او كارفور
انا بعتبر المكان ده كنز بجد وبحبه جدا طب لييييه اولا فيه كل حاجه بردو ومتسعره واسعاره زى الجمله والله وفيه اقسام لكل حاجه وكل قسم فيه كل اللى تتمنيه مش خلطبيته ع بعض حتى الطاسات والرفايع بتلاقى اشكال تحفه مش بتلاقيها فى حته وباسعار حلوة اوى يعنى كان فى هناك طاسات ب 25 ج بتتباع ف محلات 2 ونص هنا ب 35 شوفتى يعنى ارخص كمان وشفت هناك الاطباق البلاستيك والحاجات دى الوان ايه وجمال ايه زى اللى بنشوفها ف التلفزيون واحلى ده غير العروض اللى بينزلوها ف عيد الام وفى كل وقت والله كنت جايبه من هناك طقم اركوبال للبيت عندنا ب 130 ج ف عيد الام وبيدخل الفرن كمان
اخر مكان بقى محلات 2 ونص ومعارض لتوحيد والنور وسلفانا لو تسمعو عنها : محلات اتنين ونص جميله جدا وبتجمعلك كل حاجه بس الاحلى منها كمان سلفانا لو تعرفوه هو عامل زى التوحيد والنور والله يابنات جبت منه طبق الفاكهه كان اخوه ف حمام التلات ب 150 فى محل مفيهوش فصال جبته من هناك ب 95 حتى اطقم التلاجه الرخيصه فى محل 2 ونص ب 15 ج لقيته هناك ب 11 ج
انا ناويه اعمل كده ف المفروشات هشوف شركه كبيره وانزل اجيب منها حاجتى كلها وربنا يتمم لكل العرايس ع خير يارب ويسعدكم
لو عجبك الموضوع قيميلى
haneen gouda haneen gouda 956992_1.gif فتكات هايلة Fatakat 956992 القاهرة – مصر