السلام عليكم ورحمته وبركاته
ازيكوا يا فتاتيكي انا انهاردة جيبالكم غدانا انهاردة يلا يا قمر اتشمري انتي وهي ومدوا اديكوا الدار امان
نيجي بقى لطريقة كل حاجة
اولا الكبيبة
الطريقة الطبقة الخارجية اللحمة اد البرغل بيتفرم البرغل مع بصلاية وبعدين نحط اللحمة المفرومة يتفرموا مرة تانية وبعد كدا نتبلها بالملح والفلفل وبهارات والسر بقى شوية قرفة بتخليها تحفة وهتخلي كل اللي يدوقها يحسوا ان فيها حاجة مميزة الحشو بقى عصجي لحمة بطريقتك العادية وممكن تحطي مكسرات او لأ انتي وراحتك بتعملي ايه بقى يا ستي تاخدي حتة لحمة وفرديها على ايدك وبعدين تحطي عصاج وتقفلي عليه بالشكل اللي انتي شيفاه ولما تخلصي الكمية كلها حطيها تتشمع شوية في التلاجة بعد ما ترتاح جهزي طبق في بيضة وطبق فيه بقسماط ويا سلام لو عليه كيس سبايسي بتبقى تحفة بس انا المرادي مكانش عندي المهم تحطي الكبيبة في البيضة وبعدين في البقسماط كأنك بتعملي بانيه وبرضه لما تخلصي حطيه في التلاجة علشان ما تفكش منك وانتي بتقليها
ثانيا الكشك
اول حاجة تجهزي التقلية حمري بصلاية في السمن ولما تبقى لونها دهبي انشيليها وهقولك هنعمل ايه بالسمنة
بعد كدا حطي الدقيق في الشوربة على البارد وقليبيهم كويس وبعدين تحطيه على النار ولما يتقل معاكي حطي اللبن وافضلي قلبي كويس علشان ميكلكعش غلوة كدا وتحطي السمنة اللي قليتي فيها البصلة وقلبي لحد السمنة ما تختفي في الكشك اول ما يوصل الكشك للقوام المطلوب لا تخين اوي ولا خفيف زي ما بتعملي المهلبية كدا اغرفيه في اطباق ولما يبرد حطي على وشه البصل المحمر والكشك بقى بيتقدم جنبيه صلصة اللي هي بتاعة الفتة طبعا كلنا عارفينها
ثالثا الفراخ
الفراخ دي حشو طبعا بتتغسل كويس وكلكو شطار وعارفين المرحلة دي وتجهزي الحشو انا حشياها رز تقطعي بصلاية مع الكبد والقوانص بتاعة الفرخة وعليهم الرز ومعلقة سمنة والتوابل ملح وفلفل وبهار قرفةوتقلبي كله في بعضه ههههههههههههه ولما يتحمروا شوية زودي شوية ماية علشان الرز يبقى نص سوى لانه هيكمل سواه في الشوربة احشي الفراخ يا فتوكة وبعدين اسقطيهم في المية المغلية وانا مبحطش حاجة خالص في المية غير مرقة دجاج لان خلطة الرز مليانة توابل هتنكه الشوربة ولما الفراخ تستوي اخرجها واحضرلها التتبيلة وهي عبارة عن صويا صوص وشوية زيت وشوية خل وملح وفلفل وبهار وتقليبهم كويس انا بقى بعمل ايه بحط الفراخ على وشها واحطلها شوية من التتبيلة وادخلها الفرن على الشواية ولما تتحمر اقلبها على وشها واحطلها التتبيلة وادخلها تاني الفرن تتحمر كدا بتبقى متحمرة من كل الجهات وانتو شايفين الصور
رابعا الملوخية
كلكو شطار وعارفين تعملوها وعلى فكرة الملوخية دي من السنة اللي فاتت شوفتو حلوة ازاي واللي عايز يعرف طريقة الحفظ يشوف توقيعي
انا كدا خلصت عايزة بقى دعوة حلوة بان ربنا يبارك في جوزي واولادي وان ربنا يوسع رزقنا
ويا ريت يا فتوكة منك ليها متنسيش التقييم والسلام عليكم
مواضيع هذا القسم برعاية
moonaye moonaye سوبر فتكات Fatakat 780351 cairo – egypt