تجربتى فى حمام التلات للعروس 2024.

السلام عليكم يافتوكات

انا جايه افيدكم زى مااستفدت منكم وانقلكم رحلتى فى سوق التلات
اللى طلع عينى والحمد لله
بصو بقى ياقمرات اولا كلنا عارفين ان حمام التلات فى حاجات المطبخ والصينى
وكل لوازم تجهيز العروسه يعنى مش بقولكم معلومه جديده
انا نزلت انا ومامتى الاسلوع اللى فات قولت ابتدى بقى ماخلاص مش فاضل كتير
واتلم فى بيتى بقى انشاء الله ادعولى
كنت واخده معايا ورقه طبعا وكاتبه فيها الاولويات والحاجات اللى هبتدى بيها
اول مادخلنا الشارع اول محل فيه وانتى داخله على ايدك الشمال محل زى الزفت حاجته وحشه وكمان اسعار ه ومعاملتهم كمان مش حلوة انا فى الاول قلت اخد لفه على المحلات اتفرج واعرف الاسعار وبعدين اشترى ده الطبيعى متهيالى المهم فى الاول بتلاقي البايعين بيتنتطو حواليكى وده يجبلك طقم صينى وده يقعدك وده يجبلك حلل
تقريبا كده بينزلولك المحل من غير ماتطلبى اتفرجت اانا وماما على الحلل التيفال بس خامتها مش عجبتنى وكمان الفنش بتاعها وكل لما اجى امشى يقولنا طب استنو هوريكم حاجه تانيه الفرجه كانت عندهم بالعافيه
بعد ماخلصنا فرجنا ومش عاجبتنى حاجتهم ولا اسعارهم جينا ماشين لاقيتو بيقولى انتى رايحه فين لالالا هوانتى تخلينى انزلك المحل وبعدين تمشى قولتلو وانا مالى انت اللى قعدت تفتح وتطلع وانا اقولك خلاص وانت مصمم تفرجنا قالى لاانا مش بشتغل عندك غظنى الصراحه وصوته عالى روحت هبا فيه وقولتلو انت بتزعق ليه انا حره مش هشترى من عندك لقيته بيقولى زباين هم وكلام اخر قله ادب اختكم بقى الحمد لله لسانها مايتوصاش انا وماما بقى انت اللى قليل الادب ومش محترم وحاجاتك زبالهوهو قالنا الفاظ ماينفعش اقولهالكو الصراحه والناس اتلمت وبقويقولولو عيب مايصحش وده تقوليش يا اختشى بكابورت وضرب فى وشى مع انى معملتلوش حاجه وربنا

االمهم خدنا بعضنا ومشينا وطلعلنا واحد تانى زى الفرقع لوز كده من المحل اللى بعديه وحقكم عليا ومتزعلوش وده اصلا انسان مش محترم وراح هو كمان ابتدا يفرجنا على الحاجه اللى عنده وبينى وبين نفسى قولت يادى النيله انا هقضيها خناق ولا ايه
بس بصراحه المحل التانى طلع العكس الولد معاملته محترمه جدا وعنده حاجات كتير
وفعلا اشتريت من عنده طقم صينى وطقم ححلل تيفال ارشيا الايطالى محفوروحلو اوى الحمد لله
وكمان اشتريت طقم حلل استانلس بردو حلو اوى ونفس الماركه كمان
واخدتهم منه باسعار كويسه الحمد لله كان نفسى اصورهم بس بصراحه بس كاميرتى مش حلوه وكمان هما فى كراتين وبرشمتهم وشلتهم اما اتجوز بقى انشاء الله ابقى اصورلكم الشقه كلها بس ادعولى اوعو تنسو
ننصيحه مهمه بقى لانى نزلت حمام التلات تانى من كام يوم اصلى محرمتش
بس المره دى اخدت اختى معايا فى هنالك محل اسمه الشمس وهو على شمالك وانتى داخله الشارع وتقريبا كده 5 او 6 محل فى الشارع وصاحبه اسمه احمد شاب محترم جدا وزوق فى التعامل ماشاء الله
جبت منه شنطه الملاعق والكاسات وشنطه سكاكين وطقم العشا والمحل ده تقريبا احسن محل فى الشارع فى الزوق والاسعار وعلى فكره فى فرق هناك فى الاسعار جامد اوى
بيختلف عن اى محل بره تماما ولازم تفاصلى جامد يعنى لو قالك 1000 قوليلو 700 وماتزوديش عن 750 لانهم بيعلو عشان الفصال
واى سؤال يافتوكات انا تحت امركم ومعلش صدعتكم برغى الكتير
اخيرا بقى دعوه حلوه منكم بتيسير الحال ويجمعنى ب ميرو حبيبى عاجلا غير اجلا يا ارحم الراحمين
بحبكم فى الله

قلب ميرو قلب ميرو فتكات متميزة Fatakat 761016 القاهره – مصريه

سبحان الله و بحمده