السلام عليكم الله وبركاته
ازيكم يا فتوكات انهاردة هكلمكم عن تجربتى الناجحة فى تعتيق البرفانات ب(الردة)
قبل ما اقول الطريقة عوزة اقولكم:
انا بارفاناتى كلها من اوريفليم وكنت عرفت الطريقة دى من الدايركتور بتاعتى فى الشركة
وقلت هطبقها قبل فرحى ب 3 شهور للبرفانات اللى ريحتها هادية قوى ومش بتثبت كتير
لان فى بارفانات بتكون جاية من المصنع مباشرة ً ومش بتلحق تتعتق على اما توصل للمشترين مش بتكون متخزنة بمعنى اصح
ده كان كلام الدايركتور لينا:
الفتره اللى بتعتق فيها الازازه فى الرده او القش 30 يوم بمقام تعتيق زجاجة برفان
لمدة عام و نصف فى الهدوم .
كان فى الاول بيتقال الفريزر والمكان مظلم وعدم التعرض للضوء والكلام ده كله
بس الحقيقه فى طريقه عجبتنى جدا جدا و جابت نتيجه اكتر من رائعه
وتنفع فى تعتيق البرفانزمان كان العرب فى الجزيره العربيه والفراعنه
كانوا بيخمروا العطور بتاعتهم فى الرمال والقش و بتفضل فترات متفاوته
و فى عرب سيوه والسلوم يلاحظ ان العرب بيعتقوا العطور بتاعتهم فى شئ واحد
هوه الرده اللى بيتعمل منها العيش البلدى المصري
الردة دى ناس كتير لو سالتها بتخلى المانجو تستوى بسرعه ازاى حطها فى رده
لمدة يومين او يوم تيجي تلاقيها بقت زى العسل ومستويه اوى
وفعلا العرب بيعلموا كده فى تعتيق العطور بتاعتهم
…………..
وانا فرحى فاضل عليه 3 شهور تقريبا وعملتها من اسبوعين
لبرفاناتى كلها ال (او دو تواليت ) وال (او دو بيرفيم )
ملحوظة :
البارفانات اللى بيبقى مكتوب عليها (Eau de Parfum)
بيبقى تركيز العطر فيها اعلى من اللى بيبقى مكتوب عليها (Eau de Toilette)
وانهاردة قلت اما ابص ع البارفانات كدا فى الردة اخبارها ايه
واول ما فتحت الكرتونة ما شاء الله ع الجنينة اللى مفوحه
فقلت اما افتح واحد من البارفانات اللى كانت ريحتها خفية
اشوفها اختلفت ولا لأ ورشيت من واحدة كدا على نبض ايدى
ولقيت بعد ثوانى ريحتها اقوى بكتييييييييييييييير من قبل كدا
مكنتش بتبان غير بصعوبة لما كنت بجربها على ايدى ومش بتثبت
وكمان دخلت اخدت دوش ولما خرجت شميت ايدى لقيتها واضحة على خفيف
و ريحتها لما بقت واضحة مغيرتش
من رقتها حاجة وده الاهم
..وفتحت واحدة تانية بس من غير ما ارش منها جيت اشمها
لقيت ريحتها واضحة من غير رش
واختى كانت داخلة من باب الشقة ..بعد الباب .فى .الصالة..
وبعدين غرفتى وكنت فاتحه بابها لقيت
اختى من وهيا على باب الشقة بتقول ايه الروايح الحلوة دى
مع انى مخرجتش من غرفتى اصلاااا
الطريقة بقى اللى انا عملتها :
هتجيبى كيلو ردة مثلا وهتحطيه فى كرتونة حجمها على حسب
عدد البرفانات اللى عندك وبعدين تجيبى ازازة البارفان
تشيليها من الكرتونة بتاعتها وتغرسيها فى قلب الردة
بحيث الردة تكون مغطية معظم الازازة واقفلى الكرتونة كويس
ميكونش فيها منافذ للهوا وسيبيها مثلا شهر ولا حاجة ..
تحذير :
ماما قالتلى ان الردة بتسوس فلو هتعمليها …بعد شهر كدا بصى عليها
وقلبى فى الردة لو لقيتى حاجة غيريها
ملقتيش سيبيها وبصى عليها كل اسبوعين مثلا ,..
………
بس كدا يا حلوين دى كانت تجربتى البسيطة
يارب تفيدكم ..
أميرة فقيرة أميرة فقيرة 378362_1.gif سوبر فتكات Fatakat 378362 الشرقية – مصر