ازيكم يا فتوكات
الموضوع بدأ من ساعة ما أجمع الأطباء على ان حالتنا انا وجوزى محتاجة حقن مجهرى الف حمد وشكر ليك يارب ….كل اللى تجيبه خير
المهم احنا بقالنا سنة و 3 شهور متجوزين ومحصلش حمل ولا مرة الحمد لله بصرف النظر عن الاسباب يا فتوكات بدأت تجربتى فى الحقن المجهرى يوم السبت 28/4/2016 رحت المركز (دار الطب) اللى رشحه لنا الدكتور
حوالى الساعة 3 عصرا قالولى لازم كنتى تحجزى الأول بالتليفون عشان العدد كبير
المهم قلنالهم ان احنا اول مرة نيجى ومش عارفين هنعمل ايه دفعنا 200 ج كشف أولى وادونى كارت بأسمى ورقم حالتى للمتابعة وقالولى مش هدفع كشف تانى لحد ما اخلص العملية
دورنا كان متاخر عشان طبعا مكناش حاجزين قبلها بس الحمد لله
دخلنا حوالى الساعة 6 بالضبط للدكتورة السكرتيرة وكان معانا تحاليل الهرمونات اللى عملناها من اول الجواز وسألتنا شوية اسئلة وكتبت اجاباتها وبعدين اخدت صور من التحاليل كلها ورجعتلنا الأصول وطلبت مننا نستنى شوية برة فى الاستراحة
بعد شوية دخلنا للدكتور احمد عوض الله مدير المركز والمسئول عن العمليات وكان طبعا معاه الفايل بتاعنا وقعد يشرحلنا شوية عن العملية وكتب شوية حاجات وخرج ودخلنا دكتور تانى شاب كدة قالنا العملية تتكلف 12الف جنيه بالادوية تزيد شوية او تنقص شوية حسب الاستجابة
وقالنا على الأدوية اللى المفروض اخدها فيتامينات واسبوسيد وحقن تحت الجلد لمدة 15 يوم تقريبا وفيتامينات للزوج برضه وقالى عاوزين نعمل منظار رحمى ونجمد عينة من الزوج احتياطيا لظروف سفره
المهم انا مكنتش اعرف ان المنظار الرحمى ده عملية وبنج وكدة قلنا ماشى
وكنا عاملين حسابنا فى الفلوس دفعنا 1660 ج للمنظار و حوالى 532ج علبتين حقن كل علبة 7 سرنجات وعملت عملية المنظار وادونى ادويه تانية لبعد المنظار واول امبارح اخدوا عينة زوجى
وانا قالولى اروح تانى يوم البيريود يعنى ان شاء الله يوم 9/5/2016 أو 10/5/2016
وقالولى امشى كل يوم حقنة فى نفس المعاد بخدها الساعة 7 الصبح كل يوم لحد دلوقتى اخدت 8 حقن
وباخد الفيتامينات
ان شاء الله اقولكم عملت ايه بعد لما اروح المركز تانى
ادعولى كتير ربنا يوفقنى انا وجوزى ويرزق كل مشتاقة امين
ويارب تجربتى تفيد واللى عندها افادة ليا ياريت تقولى يعنى بخصوص سحب البويضات وترجيع الاجنة
والشغل بعد كدة
يا مسهل الحال يارب
لولين لولين 145279_13.gif فتكات ست الكل Fatakat 145279 الجيزة – مصر