ازيكم يا فتوكاتى وحشتونى اوى اوى بجد
بقالى فترة مدخلتش المدونة لانى كنت مشغولة بموضوع الانترفيوهات والبحث عن الشغل
ربنا وفقنى وبعد طول عناء وانتظار وتعب
والنهردة انا جيت اقلكم وافرحكم لانكم اهلى
وحبيت افيدكم وقلكم على تجربتى مع الانترفيوهات
واديلكم روشتة القبول لحلمك الوظيفي في المكان المرموق المميز اللى نفسك فيه
الروشتة دى انا بضمنلكم بيها انكم تجتازوا اى انترفيوا حتى لو مع مدير البنك
بس الاول عايزة اديلكم نصايح لازم تعملوها وتفهموها كويس لانها عن تجربة شخصية ومفيش حاجة منقولة
عشان كده عيزاكم تثبتوا الموضوع لو حسيتوا انه اضافلكم وفرق معاكم
يلا نبدأ مع بعضينا:اولا:
رحم الله امرئ عرف قدر نفسه بمعنى انتى دوقتى عارفة ان مؤهلك غير مناسب لمجال المؤسسة دى او مناسب بس انتى مستواكى ضعيف او قدراتك ضعيفة او مهاراتك محدودة معندكيش لغة انجليزية مثلا يبقى لازم تشتغلى على نفسك الاول تنمى من قدراتك تحسنى مستواكى اللغوى لان اى مؤسسة محترمة بتبقى مشترطة اللغة الانجليزية مش لازم يبقى مستواكى ممتاز بس على الاقل جيد جدا وتعبري بيها عن نفسك لان غالبا ما بتكون الانترفيو انجلش
يبقى متروحيش وتفشلى وتقولى ده ظلم وتيجى محبطة وانتى اساسا ريحة غير مؤهلة ابدا
ثانيا:
في ناس كتير بتقلك يا سيتى ده بنك كبير او شركة كبيرة كله فيها بيبقى بالواسطة مهما كان معايا حتى لو ماجستير الكلام ده يا جماعة مش صح طبعا احنا عارفين ان الواسطة موجودة وموجودة اوى كمان بس فكروا بعقلكوا لو البنك خد معظم الناس بالواسطة وهما مش مؤهلين هو هيفشل عشان كده مش في مصلحته انه ياخد ناس كتير واسطة ممكن في نسبة معينة لكن الباقى هو محتاج كفاءات عشان هو ينجح
فاذا كفاءتك وقدراتك هيا اللى هتخليكي تتقبلى او لاءا ( وانا والله يا جماعة اتقبلت ومليش واسطة خالص وده تانى اكبر بنك فى مصر)
ثالثا:
لازم تبقى رايحة قارية كويس اوى عن البنك ده او الشركة دى كويس اوى وعاملة ريسرش على النت ودخلتى السايت بتاعهم وتعرفى هما بيقدموا ايه وبيتميزوا بأيه وباحبذا لو دخلتى مواقع بنوك منافسة عشان تعرفى بردوا عنهم وعن ترتيبهم من حيث الاقوى
رابعا:
لازم تبقى عارفة ان اجتياز اى انترفيو متوقف على حاجتين قدراتك ومؤهلاتك + ثقتك بنفسك
عشان كده الثقة بالنفس يا جماعة ثم الثقة بالنفس هييا دى اهم حاجة صدقونى بتنجحك او بتفشلك هيا ثقتك بنفسك ودى بتتحقق عن طريق انك تبقى مستعدة كويس اوى للانترفيو وتبقى مهتمة بمظهرك بدون افورة يعنى تبقى مستعدة قلبا وقالبا
خامسا:
لازم تكونى متوقعة انك تتسألى حجات مريتى بيها في كليتك في مرحلة الدراسة بزات لو حجات ليها علاقة بالمحاسبة او بمجال البنوك طبعا بتتسألى في اساسيات بس مفيش تفاصيل ده طبعا الى جانب الاسئلة الشخصية لان في ناس بتقول هتسأل في حجات شخصية بس ومفيش اى اسئلة تخصصية عشان كده لازم تكونى مرجعة كويس على الاساسيات التخصصية
سادسا:
لازم تروحى قبل الانترفيو بنص ساعة عشان تدى عنك انطباع كويس انك ملتزمة ومحافظة على مواعيدك وكمان عشان تبقى داخلة الانترفيو هادية مش متوترة او مشدودة
ومينفعش كمان تروحى الانترفيو قبلها باكتر من ساعة او حتى اكتر لان ده بيدى انطباع سىء عن سوء تقديرك للوقت وكمان كما لو كنتى فاضية ومصدقتى حد يكمك عشان تعملى الانترفيو فلازم تخدى بالك من النقطة دى
يلا ي جماعة مستنية اشوف استجابتكم للموضوع اكمل بقيت الموضوع والتجربة والنصايح الشخصية ولا ايه عشان كمان عيزة احكيلكم على الاسئلة اللى اتسألتها وطريقة الرد الصحيحة اللى بيها بأزن الله تجتازوا الانترفيو
Memy Smsm Memy Smsm 247000_1.gif فتكات متميزة Fatakat 247000 الجيزة – مصر