السلام عليكم ورحمة الله وبركاته
بسم الله الرحمن الرحيم
الى كل اخواتى الفتوكات الجميلات اللى منتظرات الحمل باذن الله وخصوصا اللى عندهن تكيس المبايض مثلى انا فتوك جديدة معاكوا واول مرة اكتب موضوع فى القسم ده المهم انا حبيت النهاردة احكلكوا عن خبرتى طول ال3 سنين ونص بتوع جوازى لعلها تنفعكوا باذن الله انا صحيح ربنا سبحانه وتعالى لسه مارزقنيش بس انا اتعلمت حاجات كتير فى الفترة دى من تجربتى وتجارب اصحابى وفيه حاجات كتير عملتها او حصلت معايا عرفت انها ماكنتش صح بس كله بامر الله طبعا وقدر الله وماشاء الله فعل بس انا حبيت انى احكيهالكوا يمكن تستفيدوا منها ان شاء الله . ومن باب ان شاء الله خير الناس انفعهم للناس.
نبدأ على بركة الله أول حاجة عايزة اقولهالكوا يافتوكات يا حلوات ان الواحدة مش لازم تستعجل وتاخد ادوية من اول الجواز او تسمع كلام الدكاترة على طول لازم تسيب لنفسها فرصة يعنى سنة او سنة ونص من غير قلق لان انا مثلا الدكتورة ادتلى ادوية من اول شهر وده كان غلط كبيييييييير بس الحمدلله طبعا وحتى لو عارفة انك عندك تكيس من قبل الجواز اصبرى على نفسك ياما ناس كان عندها تكيس وخلفت من غير اى حاجه سبحان الله وماعرفتش ان عندها تكيس اصلا اللا بعد ماخلفت. وخصوصا الزوجات اللى بعيد عن زوجها لازم تستنى على نفسها لما تستقر مع زوجها لان الاستقرار ده شيء مهم يعنى ماتحسبش فترة جوازا من اول ماتجوزت لا من ساعة ماتستقرمع زوجها.
ثانى حاجه اهم حاجه النفسية لازم كلنا نعرف وانا اولكوا ان نفسيتنا مهمه جدا لان النفسية لما بتضطرب الهرمونات بتتلخبط اللى هيا مسؤلة عن التبويض وكده ودى مشكلة التكيس فلازم نحاول نهدى اعصابنا ونتوكل على الله ونحسن الظن بالله و نعرف ان كلوا بامر الله وكل شىء بميعاد.ومنحطتش فى دماغنا كلام الدكاترة الرزل ونكتئب ساعات اصلا الدكاترة بيكونوا سبب وافتكروا انه لا ييئس من روح الله الا القوم الكافرون.
ثالث حاجه ماتعمليش اى حاجة ولا تروحى لدكتورة ولا تاخدى دوا الا لما تعملى استخارة قبلها عشان ربنا ييسرلك امرك وتبقى مستريحة وراضية باللى هيحصل.
رابعا واهم حاجة الذكر والدعاء والاكثار من الطاعات والصداقات ان ماعند الله لا ينال الا بطاعته وكمان الصدقة بنية الشفاء مهمة جدا الرسول (ص) قال داووا مرضاكم بالصدقة والاستغفاااااااااااار والصلاة على الرسول (ص) كتييييييييير وكمان الدعاء بظهر الغيب لاخواتنا اللى زينا عشان الملك يقولنا ولك المثل انا فيه واحدة صاحبتى قلتلها تدعيلى قالتلى لا انا مش عايزة ولاد دلوقتى انا عندى اتنين ومحتاسة قلتلها انا بقولك ادعيلى انا قالتلى انا عارفة انا خلفت ولادى الاتنين بسبب انى دعيت لاصحابى فى نفس الوقت كل ماادعى لوواحدة الاقى نفسى حامل . وكمان الاكثار من عمل الخيييير انتوا وازواجكوا ربنا سبحانه وتعالى يقول عن سيدنا زكريا واهله (وزكريا اذ نادى ربه رب لا تذرنى فردا وأنت خير الوارثين* فاستجبنا له ووهبنا له يحيى وأصلحنا له زوجه انهم كانوا يسارعون فى الخيرلت ويدعوننا رغبا ورهبا وكانوا لنا خاشعين ) سورة الأنبياء 89-90
والدعاء ياجماعة الدعاء لا نمل ابدا فانا الله لا يمل حتى نمل نحن والتذلل والانكسار فى الدعاء .
نيجى كده لشوية خطوات اول الحاجة اللى وزنهم زايد شوية يحولوا يظبطوه عشان دى اول خطوة بتفيد فى التكيس باذن الله بس مش دايت متعب دايت صحى عشان تفضل صحتك كويسة .
وكلنا عايزين نظبط اكلنا باذن الله وناكل اكل صحى عشان ده مفيد لينا كلنا انا الدكتورة قالتلى كده اخر مرة وانا كمان مش مليانة خالص.
يعنى لازم ناكل اسماك كتير وننقلل من الفراخ عشان بيبقى فيها هرمونات انا الدكتورة قالتلى كمان فى دبى بالذات واللى مش بتحب السمك زييي تيجى على نفسها وتحاول وتنوع ممكن تاكل تونة رنجة جمبرى سمك فيليه كده وربنا يعينا.
ونحاول نبطل اكل بره ده مش صحى خالص وكله مشاكل والشيبسى والشوكولاتات وكده واللى مش قادر يبطلها زيى كده يحاول يقللها خالص احنا مش عايزين ربنا يكرمنا ولا ايه كله يهون وكمان شرب الميه مفيد نحافظ عليه.
من الأخر نحاول حياتنا واكلنا يكونوا صحيين واهو كلوا فى مصلحتنا ان شاء الله.
والرياضة كمان مهمه وخصوصا المشى .
فيه بقى شوية حاجات مفيدة وكلها حاجات طبيعية :عصير الاناناس وعصير العنب والبردقوش والمرمية وحبة البركة والعسل وانا الدكتورة وصتنى اشرب حلبة كتيييير وفيه حاجات كتير تانية الى تقدر تجرب حاجه منهم بس تواظب عليها تعمل كده مادام ككلها حاجات طبيعية مش هتضر باذن الله وعامة الاعشاب الطبيعية كلها مفيدة الحمدلله انا فيه واحدة صحبتى كانت على طول ماشية عليها واتاخرت فى حملها ورزقت مرتين بفضل الله وقالتلى انا فاكرة كلمتها كويس انا باحاول اعمل اللى عليا على قد مااقدر عشان ده اللى فى ايدى وعشان ربنا يكرمنى هو اللى بيشتغل زى اللى مابيشتغلش . احنا لازم نسعى عشان ربنا يكرمنا .
معلش انا طولت عليكوا اوى بس انا والله باكتب الكلام ده من قلبى وكنت باحاول افتكر كل حاجه سامحونى على الاطالة ولو حسيت ان الموضوع عجبكوا واستفدتوا لو افتكرت حاجة تانى هاكتبها باذن الله واللى عايزة ننتناقش فى حاجة او تسال تتفضل .بحبكوا فى الله اسالكم الدعاء وسامحونننننى
مدام حميش! مدام حميش! 441931_2.gif فتكات متميزة Fatakat 441931 دبى – الامارات ونفسى ارجع لمصر اوى ان شاء الله