الكل بيسأل.. هنعمل إيه مع "الفتة".. يا ترى ناكل ولّا لأ؟!!
يا ترى الريجيم هيبوظ.. ولا ممكن ناخد إجازة وناكل براحتنا شوية؟
يا ترى فيه وصفة سحرية تخلّينا نكون على راحتنا، وفي نفس الوقت مجهودنا في الريجيم ما يروحش على الفاضي؟!!
علشان كده د. محمد أبو الغيط هيكلمنا عن الحل…
يا ترى يا د. "محمد".. إزاي ممكن نتغلب على المشكلة دي؟ عيد الأضحى مش مشكلة زي عيد الفطر؛ لأننا مش بناكل فيه كحك وحلويات كتير زي عيد الفطر؛ لكن المشكلة في نوعية الأكل.. اللحمة الضاني، والفتة، والرقاق، والمحمرات، ومأكولاتنا الشهيرة الدسمة جدا.
ومن غير المنطقي إننا نقول للناس بلاش ضاني، وممنوع الأكل في العيد؛ لكن النصيحة البسيطة اللي ممكن أقولها هي الاعتدال في الأكل.
ولازم نفتكر دايماً إن العيد في الأساس ربنا شرعه؛ علشان الفقراء يشاركوا الأغنياء أو القادرين في نوعية من الأكل محرومين منها طول السنة.
المشكلة في اللحمة الضاني إنها بتحتوي على سعرات حرارية عالية جداً تقريباً ضعف اللي موجودة في اللحمة البتلو؛ يعني قطعة من اللحمة الضاني تساوي قطعتين من البتلو، بالإضافة إلى نوعية الكوليسترول أو الدهون الموجودة في الضاني، واللي ممكن تأثّر على الأوردة الدموية والشرايين، وكمان اللحمة الضاني مضرة جداً لمرضى حصوات المرارة.
إزاي نقلّل من مخاطر الدهون الموجودة في اللحمة الضاني؟ أنا لا أقصد أننا نحرم الناس من الفتة والرقاق وكل الحاجات اللي متعوّدين عليها في العيد، وتعتبر بالنسبة لكل الناس شكل من أشكال الاحتفال.
لكن علشان نخفّف من حدة المخاطر وكمان من كميات الأكل الدسم، أنصح بتناول وجبة "سناكس" قبل الوجبة الرئيسية؛ يعني قبل ما ناكل الفتة بنصف ساعة ممكن ناكل تفاحة، أو أي فاكهة، أو نشرب مية كتير، أو ناكل ساندويتش جبنة، أو طبق سلطة.. أو أي حاجة تخلّينا نحس بالشبع بسرعة، ولما نيجي ناكل وجبتنا الدسمة ناكل بكميات قليّلة.
وزي ما إحنا متّفقين إن القاعدة الأساسية في الريجيم هي إننا ناكل كل حاجة نِفسنا فيها، بس بكميات قليلة.. لكن مرضى القلب لازم ياكلوا بحرص في العيد؛ لأن نوعية الأكل مرهقة جداً للقلب.. ونتذكّر أن الهدف من العيد التبرّع ومشاركة الآخرين، وليس الأكل فقط.
إزاي نحافظ على وزننا في العيد ونتمتّع بالأكل.. وخصوصاً لو ماشيين على دايت ومحققين نتيجة كويسة؟ الإجازات والعيد بتكون فرصة علشان نجرّب فكرة تثبيت الوزن.. والتثبيت مرحلة صعبة، وبتسبّب إزعاج لناس كتير من اللي حققوا نجاح كبير في فقدان الوزن.. بيكون داخل كل واحد هاجس وخوف من العودة مرة تانية للسمنة، وإنه مش هيعرف يثبت وزنه.
لكن الفكرة في التثبيت بسيطة جداً، وهي إني باكل الأكل العادي، ولكن بكميات قليلة، وباقلل من نسبة الدهون.
وعلى فكرة العيد كله أربعة أيام يعني لو اللي بيعمل ريجيم لخبط في الأكل، فأقصى حاجة ممكن يتخنها ربع كيلو، وده هيكون سهل جداً إننا نتخلّص منه بعد العيد، وبعد الرجوع للريجيم..
والميزة كمان إن العيد السنة دي طويل شوية؛ يعني ممكن نستغل فرصة الإجازة، ونمارس أي نوع من أنواع الرياضة؛ زي المشي والجري أو ركوب العجل أو لعب الكرة.. ولو كان عندنا فرصة للسفر نخرج ونتحرّك على أد ما نقدر.
وزي ما باقول دايماً إن الأعياد بتكون فرصة كويسة جداً لأي حد بيعمل ريجيم علشان يختبر نفسه.. هل فعلاً نمطه في الأكل اتغيّر؟!! وأسلوب التعامل مع الوجبات ومواعيدها اختلف ولّا لأ؟!! هل أصبح بيفضّل السلطة والفاكهة أكتر؟!! هل يُدرك كمية ونوعية الأكل اللي بيحصل عليها طول النهار؟!! هل الحركة والرياضة لهما وقت في الجدول اليومي المزحوم دائماً؟!!
نهر الذكريات نهر الذكريات ممنوعة من المشاركة Fatakat 370583 أسكندريه – مصر