السلام عليكم يا فتوكات
انا جيبالكم تجربتي مع الدكتور طارق الشاذلي وقبل ما ابتدي هي تجربة صراحة فاشلة لكني كتباها عشان تتعلموا منها ويارب افيدكم بيها بدل ما فلوسكم تضيع في الهوا
الموضوع بحكي فيه كل شيء بالتفصيل فطويل لكن وربنا هفيدكم اوي فاستحملوا شويه
اولا عن نفسي انا وزني حوالي 100 وطولي 172 وكان وزني قبل كدا 120 وخسيت 20 كيلو لوحدي من غير دكتور لكني بعد ما وصلت لميه لقيت عندي منطقه في الجنبين كدا ما بيخسوش بنفس معدل خسسان جسمي وبرزين كدا ومضيقني لما اجي اشتري هدوم اشتري مقاس اكبر لكني عن نفسي راضيه عن وزني لكن المنطقه بس كانت مضايقني ودا السبب الي خلاني اروح للدكتور
المهم انا من حوالي شهر ونص كدا اتصلت بعيادة الدكتور طارق الشاذلي عشان احجز وردت عليا واحده قالتلي الحجز بيكون قبليها بيوم وسالتها عن سعر الجلسات فقالتلي انه الجلسات بتبتدي سعرها من 250 لحد 2024 جنيه للجلسه الواحدة فقولتلها الفين جنيه !!! قالتلي ايوه بس دا يعني للناس الاوفر اوي اسغربت صراحة ايه يعني دخل الاوفر بالموضوع وانا للامانه الفتره الي رحتها دي ما شوفتش واحده قالتلي انها دخله جلسه من ام 2024 دي !!
المهم جيت بقى احجز عشان اروح فرد عليا واحد وقالي انه مفيش حجز وانه اجي ادخل ع طول واسبقية الدخول للي يجي الاول
فقولت ايه الدنيا الملغبطه دي انا هروح بقى وخلاص سواء فيه حجز ولا مفيش
وفعلا رحت بقى العيادة ولقيت انه فعلا مفيش حجز ماحدش بيسالك انه كنت حتى حجزه ولا غيره بتدخلي باسبقية الدخول مع انه هناك تلاقي الي يقولك احجزي وحد يقولك مفيش حجز لكن من الاخر مفيش عندهم حجز خالص لا انك تحجزي باليوم انك رايحه يوم معين ولا انك حتى تحجزي انك رايحه في ساعه معينه
المهم دخلت المركز وكان مليان بنات شغالين في المركز مسئولين عن الجلسات وكلهم ما شاء الله منقيهم ع الفرازه جسمهم رفيع ومتناسق وجمال ولبسهم ضيق وعرفت صراحه بعد كدا انهم متنقين بالشكل دا عشان يكونوا زي دعايا للمركز كدا جواه وفعلا هما شكلهم كدا لانهم كلهم جسم واحد
المهم دخلت كشف وسعر الكشف ب 300 جنيه مع اني لما عملت سيرش قبل كدا ع النت لقيت واحده كاتبه من فتره انها دخلت كشف 200 جنيه او 250 مش فاكره المهم يعني ان سعر الكشف زاد وبقى 300 مش عارفه يعني 300 ليه المهم قولت اهه كشف بيدفع مره واحده وخلاص
والعياده يومها كانت مليانه اوي وهما بيعملوا حاجه وحشه بقى اوي في تنظيم الدخول للدكتور انهم بيدخلوا واحده كشف وواحده متابعه يعني لو انتي جيه اول مره كشف ومدينك رقم 4 هيكون قدامك 7 حالات مش 3 يعني 3 كشف و 3 متابعه يعني لو رقمك بقى 10 استني يدخل قدامك بقى 20
وفي انتظاري بقى لدوري ندهت عليا واحده من المركز ودخلتني اوضه وقاست طولي وميزان كدا بتقفي عليه وتلمسيه بايدك ويطلع نسبه الدهون في جسمك والميه والحاجات دي والحمد لله طلع نسبه الميه في جسمي مظبوطه
رجعت بقى مستنيه دوري واتكلمت مع واحده ان كانت الجلسات جابت نتيجه ولا وقالتلي اه خسيت ع الجلسات
وجه دوري والدكتور اداني ورقة للدايت جاهزة وقالي ايه المنطقه الي عايزه تعملي فيها جلسات فقولتله منطقة الجنبين فراح كتبلي على 4 جلسات اقتصادي للجنبين والفخدين والجلسة الاقتصادي دي ب 250 جنيه بس خدوا بالكم انها مفيهاش اجهزة ليزر بس انا ما عرفتش دا غير بعدين وقالي اشتري كريم كدا وشورت من العيادة بتاعته كريم بيدهن ع المكان الزايد وشورت يتلبس عليه ويتعمل كدا بيه رياضه لمدة نص ساعه المهم اني رحت عشان اشتري الكريم دا وهو اوضه كدا جوا العيادة بتاعته فبسال بكام قالولي 650 جنيه وروني العلبة لقيتها كبيره كدا ويقولولي جواها كريم كبير وشورت ويستخدم مرتين في الاسبوع بالكتير بس انا معرفتش اشتريه ولا لا بس دماغي كانت مشتته وقولت اشتريه ويارب يجيب نتيجه لاني حيلي اتهد من المنطقه الزايده عندي مش نافع معاها حاجه فاشتريتهم وقبلها لقيت واحده قبلي كاتبلها على دوا نقط كدا ب 400 جنيه وربنا بصيت على الدوا لقيته عباره عن علبه صغيره قد القطرة بتاعت العين ما تسواش 4 جنيه مش 400 جنيه حتى
وجيت بقى بفتح علبة الكريم والشورت دا وربنا اخدت صدمة في الي شوفته انا كنت فاكرة الشورت دا شورت كدا زي الي بيعلنوا عنه في التلفزيون ابو 100 جنيه دا باين ولا ايه الي هو بيخسس اتفجئت انه عبارة عن كيس نايلون الي زي بيتحط فيه الاكل دا بس عملينه ع هيئة بنطلون وكل واحد يقصه على قد الطول الي عايزه !!! ومعاه استكيرز 2 يادوب قال عشان لو كبير عليكي تقوم ملزقه الحته الزايده
والكريم دا عباره عن سائلين كدا زي الشامبو بتخطليهم على بعض وتدهنيهم اقولكم ايه يا جماعه الحاجه ما تستاهلش 50 جنييييييه لكني فضلت صابره وقلت المهم الجلسات تجيب نتيجه واهه ممكن الكريم دا كمان يجيب نتيجه واستخدمته كام مره على مدار الشهر ونص دول ولا عمل اي حاجه وكان نفسي اضرب نفسي بالجزمة على اني اشتريته
المهم مشيت ع الدايت وجيت بقى الاسبوع الي بعديه عشان الجلسة فجت دكتورة وقاست بالمازورة وجيت اعمل الجلسة قالتلي ماينفعش تعملي الجلسة ع الجنبين والفخدين كدا هيبقوا جلستين وتدفعي 250 تاني فقولتلها ليه هو الدكتور كاتبلي على جلسه واحده ليهم هما الاتنين فقالتلي ماينفعش الجهاز عندنا مش بيكفي غير منطقة واحده !! فلو عايزه اعمل ع الاتنين الاجهزه كدا هتتعمل مرتين وتبقوا جلستين فقولتلها خلاص هعمل ع الجنبين بس لاني كدا كدا كنت عايزه الجنبين بس لكني قولت زياده الخير خيرين بقى مادام السعر واحد لكن طلع بقى انهم جلستين
المهم الجلسه دي عباره عن جهاز كدا معرفش بيعمل ايه مستطلين بلاستيك كدا بيتحطوا ع المنطقه والجهاز يشتغل وما تحسيش باي حاجه كانه مش بيعمل حاجه وبتفضلي عليه ربع ساعه وبعدها جهاز تاني عباره عن دواير جلد كدا حوالي 4 او 6 وحدات بتتحط وتحس كدا كان الحته الي اتحط عليها منملة بتقعدي عليه ربع ساعه برضه وبعدها جهاز تاني كدا واحده بتعملهولك عامله زي فرشه كبيره فيبريشن بتعملهولك حوالي 5 دقايق وبعدها بيدهنولك المنطقه بكريم كدا ويلفوكي بنايلون اوي زي الي بيلفوا بيه الاكل دا وتدخلي كدا تحت لمبه لونها احمر يسلطوها ع المنطقه الي عايزه تخسيسها وتفضلي عليها حوالي ربع ساعه وبعدها جهاز بتقفي عليه 10 دقايق بيعمل فيبرشن جامد في جسمك
والجلسة خلصت ع كدا فبقول للدكتور تقسلي بقى عشان اشوف خسيت 2 سنتي في الجلسه زي مابيقولوا ولا لا فقالتلي لا احنا مش بنقيس دلوقتي احنا بنقيس اول الجلسة التانية فقولتلها ليه مش بيتقاس ع طول ؟! قالتلي السيتيم كدا وكمان عشان انا ملفوفه بالنايلون فالحته دي مضغوطه فمش هيطلع القياس سليم فقولت مش مشكله اروح البيت اقيس انا براحتي فروحت البيت وشلت النايلون دا عشان بتروحي بيه وشلته وجيت اقيس لقيت اني ماقلتش ربع سنتي حتى لكن قولت يمكن عشان اول جلسة ولسه محتاجه مفعول اقوى
عدا الوقت ورحت الجلسة التانية والدكتورة جت قاستلي لقت مقاسي زي ما هو ما اتغيرش قالتلي طب تعالي نقيس الوزن يمكن انتي مخسيتش عشان كدا ما نزلش فرحنا ع الميزان لقتني خسيت 3 كيلو … فقالتلي هي الاماكن الي في النص التحتاني دي مش بتخس بسهوله فانتي كملي الجلسات واعملي رياضه ومشي وهتلاقي المنطقه دي ان شاء الله خست كويس
بعد تاني جلسه نفسيتي تعبت اني مش بخس وخرفت شويه في الدايت لكن وزني ما زدش الحمد لله وفضلت برضه المحيط ما بيخسش مع اني مشيت زي ما قالولي يوميا
صبرت وقولت اعمل جلسه تاني وعملت 3 جلسات اقتصادي مجبوش معايا نتيجه وبالصدفه شوفت الدكتور الشاذلي في التلفزيون ولقيته بيتكلم عن الليزر والتخسيس ففي وقت الجلسه رقم تلاته رحت سالتهم عن جلسات الليزر دي فقالولي ايوه فيه ليزر غير الجلسات الاقتصاديه وان تمنها بيبتدي من 500 جنيه قولتلها يعني احسن من الاقتصادي ؟ قالتلي نتيجتها اسرع
انا بعد 3 جلسات اكتشفت انه الاقتصادي دا اساسا ما بيعمليش حاجه ووانه ملوش نتايج فوريه ولا غيره وحتى بعد ما خسيت وكنت بمشي كل يوم ما جبش نتيجه ولا سنتي حتى
وقتها انا كنت جبت اخرررري ومعرفتش اعمل ايه اعمل اخر جلسه ليزر ولو جابت نتيجه امشي ع الليزر ؟ ولا اسيب الموضوع ومرحش تاني لحد ما استقريت على اني اعمل جلسه ليزر وخلاص لو جابت نتيجة اكمل ما جبتش يبقى الموضوع هسيب الموضوع كله
رحت اخر يوم وسالت ع الدكتور قالولي مسافر وانه في دكتور تاني بداله وقولتلهم انا عايزه احول ليزر فقالولي مفيش مشاكل مش محتاجه تدخلي عند الدكتور الدكتورة الي بتكون مشرفه ع الجلسات هتحوهالك ( الدكتورات دول دكتورتين يادوب صغيرين في السن تقريبا لسه متخرجين وهما دكترة علاج طبيعي ) المهم فهحولتلي جلست ليزر ب 500 جنيه وقولتلها الاول نتيجة الجلسه فوريه؟ يعني اول ما اخلص الجلسه الاقي نفسي خسيت فورا؟
فقالتلي ايوه فرحت دخلت الجلسه وكانت عبارة 4 اجهزة تقريبا 2 ليزر و جهازين تانين كدا من نفس اجهزة الاقتصادي الي هو الكريم واللمبه والجهاز الفيبرشن دا
فجت الاول الدكتورة وقاستلي وبعدها عملت جهازين الليزر دول كل جهاز تلت ساعه وبعدها جت تقسلي ولقيتها عملت حاجه عجيبه نزلت بالمازوره لتحت شويه الحته الي اخف دهونا وشدت المازوره شويه وقالتلي خسيتي 2 سنتي قولتلها بس انا مش بقيس من هنا فقالتلي مهو انا الي قستلك في الاول قولتلها مش هي دي اعرض حته في المنطقه وانتي قسيتها لفوق شويه قالتلي لا انا قست من هنا انا فاكره فقولتلها طيب ممكن المازورة بعد اذنك فمسكت المازوره وقست ع الحته الي بقيس منها ديما ولقتني ما خستش حاجه فقولتلها انا بقيس من هنا اهه ومنزلش قالتلي لا القياس كدا غلط وانه مايكنش من هنا وكلام كدا ملهوش لازمه صراحة فقولت استنى لحد ما اكمل باقي الجهازين مكنتش اعرف انه الي باقين اللمبه والفيبرشن دول فمكنش ينفع اقيس بعد النايلون عشان بيكون ضاغط ع المنطقه واني بروح بيه وبفضل لفاه ساعه
صبرت وروحت قست بالمازورة بتاعتي الي بقيس بيها ديما من ايام ما ابتديت رجيم من زمان خالص ولقتني ما خستش حاجه بعد الجلسة
بصراحة كان نفسي اضرب نفسي 100 جزمة اني صبرت كل دا وضيعت الفلوس دي كلها ومشيت ورا الكلام المعسول وربنا جالي احباط فظيع وفضلت اليوم دا اعيط بحرقه كنت بحلم انه الحته هتتظبط خلاص و محروقه ع اني اتعشمت وقعدت اتخيل نفسي بلبس ومرتاحه وبعد التعب دا كله والفلوس ما استفدتش وقعدت احسب في الي دفعته لقتني دفعت 300 كشف و 650 كريم قال وشورت و 750 جلسات اقتصادي و 500 جنية جلسة ليزر يعني الموضوع كله كلف 2200 جنيه والنتيجه صفررررررررررررررررر
ع فكرة انا ما شوفتش الدكتور غير مره واحده وقت الكشف يعني مش كله مره بتدخليله الي لو عايزه تدخليه وتفضلي بقى مستنيه في عز الزحمه فوق الجلسه ومش عارفه انه كان لو عايزه تشوفيه بفلوس او لا ما سالتش بس وبعد كدا الدكتورات الصغيرين دول هما الي بيقسوا وزنك ويدوكي نظام تمشي عليه وانا عرفت بالصدفه اساسا انهم بيدوني نظام امشي عليه محدش هناك قالي حاجه وطول الفتره دي مخدتش غير نظامين بس نظام ادهوني الدكتور اول مره ونظام تاني بعد ما عرفت في الاخر انهم بيغيروا النظام
والنظام عادي مش حاجه سحريه زيه زي ملايين الرجيمات المرميه ع النت
انا بعد الصدمه والاحباط الي جالي قعدت افكر في كل الي حصل وافكر طب ما انا اتكلمت مع كام واحده وكانوا بيقولي انهم خسوا اشمعنى انا طيب الحته دي مخستش عندي
فافتكرت حاجه انه كل الي اتكلمت معاهم دول كانوا في الاساس كلهم جسمهم مليان ولسه بيبتدوا دايت وعايزين يخسسوا كل جسمهم فطبيعي لما بيخسوا محيط جسمهم بيخس مهو انا لما خسيت 20 كيلو لوحدي كنت لما بقيس بلاقي نفسي بخس حتى الحته الزايده دي كانت بتخس رغم انه معدل خسسنها كان بطئ
فاساسا الموضوع جي من اجتهادهم في الدايت اي حد في الدنيا بيعمل دايت هيلاقي محيطه خس
هتقولولي طب انتي رحتلي ليه انا زي ماقولتلك انا بقيت راضيه عن وزني وكل مرواحي كان مش عشان اخس نهائي كنت بس عايزه اخسس المنطقه دي عشان تبقى متناسقه مع باقي جسمي غير كدا وربنا ما كنت رحت عند اي دكتور
انا خلاصة تجربتي يا بنات في الدايت دا نصحيتي تتلخص في حاجتين وربنا هقولهلكم بكل امانه نفسك تعملي رجيم وتخسي افتحي النت هتلاقي مليون رجيم بكل الانواع هتمشيه عليه هتخسيي انا خسيت ال 20 كيلو دول بعد معاناة عشان مكنتش بس بلتزم وكنت ساعات بخرف واحبط
لكني فعلا خسيتهم والحمد لله وحققت الي عيزاه ووربنا من غير دكتره وكمان حتى من غير دايت معين كنت بقرا اي دايت يقع تحت ايدي لحد ما استخلص دايت كدا من دماغي يناسب الاكل الي بيكون عندي ومناسب لوقتي
لو عايزه تخسي وتروحي لدكتور من الاخر ما ترحيش لدكتور عنده اجهزه ايا كان الدكتور رحي لدكتور كويس من الي يادوب تدفعيله متابعه عشان تقدري تلتزمي بالدايت لكن هتروحي لحد عنده اجهزة جهزي جيبك عشان هيتشفط كله وهتحصلي ع نفس النتيجه الي لو كنتي عملتي دايت ورياضه من نفسك هتخسيهم
لو مش بتعرفي تلتزمي بدايت يبقى روحي لدكتور يتابعك بس عشان كل اسبوع يشوف وزنك وتكون نفسك حاسه بسمئولية انك لازم تروحي خسة لكن تروحي ليه لاجهزه ومش اجهزه طالما انتي بتخسي وتلاقي جسمك بينزل كويس لو جسمك بينزل كويس وبقى متناسق تروحي ليه لاجهزة ؟ جربي تعملي رياضه ودايت ووخلطات من بتاعت التخسيس دي لو خسيتي ولقيتي مفيش فايده وقتها تبقي تدوري على حل بلاش نجري ورا اي حاجه تتقال
انا في المدونة من زمان وليا تجربة كمان مع الدكتور حاتم نعمان الي كان مكتسح البرامج قبل طارق الشاذلي تقدروا تشوفوا في ارشيف موضوعاتي تجريبتي معاه هو كمان
دي ملخص تجربتي وربنا شاهد على كل شيء قولته واني نقلتلكم الموضوع بامانه وبكل تفاصيله ووربنا ما مسماحه في الفلوس الي دفعتها دي نهائي
وسمعت كلام كمان عن الراجل الي بيجي في التلفزيون دا الي بيقول انه خس لكني صراحة مش هقول الكلام دا لاني مضمنش صحته مع اني سمعته من حد موثوق لكني برضه مش هقوله عشان ما اشيلش ذنب لو مش صحيح
اخر حاجه انا كل الي نقلته يا فتوكات هو تجربتي الشخصية والله اعلم بغيري يمكن يكون واحده راحت وخست دي بس تجربتي مش بعممها على حد
لكن ايا كانت حرام والله تكون الجلسات بالتكلفه دي هما فاكرين الناس دي زارعين الفلوس في شجره ؟!! جلسة ب 500 والي بتعمله جلسه ب 750 والي ازيد والي اقل لييييييييييييه نفسي افهم كلها حاجات ولا تسوى
وكل الي الناس الي شوفتهم هناك ناس مستوياتهم عاديه ومتوسطه مش ناس زي بنت مرجان احمد مرجان والله انا شوفت ست كبيرة بتدفع تمن جلسات لبنتها من فلوس تجهيز بنتها عشان تخسسها !!!
انا مش عارفه اقول ايه مش مهم الجلسات تجيب نتيجه ولا متجيبش لكن الواحد لما يدفع مبلغ وما يجبش برضه نتيجه بيحس بحرقة والله وحسرة وندم انا كنت خايفه من ندامين خايفه ادفع فلوس واندم انها ما جبتش نتيجه وخايفه معملش جلسات واندم اني سبت المنطقه دي زايده عندي ومبوظه نفسيتي
لكن رغم الي حصل دا نفسيتي رجعت كويسه وراجعت نفسي واتصالحت معاها وحاولت اتقبل نفسي بكل ما فيها خاصة انه والحمد لله ربنا رزقني بخطيب بيحبني وبيحب وزني دا ومش مضايق منه نهائي
كل الي اقدر اقولهلكم انه ربنا يوفقكم للي فيه الخير وما تتسرعوش يابنات وتجروا ورا اي كلام بيتقال احنا وزننا اه زايد لكننا بنات زي كل البنات حلوين بشكلنا لكن بشكل مختلف مش لازم نبقى عود قصب عشان الناس تقول علينا حلويين وانا مش ضد انك تخسي لكن قبل ما تخسي فكري انتي عايزه تخسي ليه عشان صحتك ولا عشان نفسك ولا عشان الناس تقول عليكي حلوه وولا اي كان السبب انتي في كل الاحوال شوفي دافعك ايه وهل يستاهل ولا ما يستهلش وان قررتي تخسي خسي بالراحه من غير ما تجلدي نفسك ورحي لدكتور كويس بلا اجهزه بلا بطيخ وخسي بالرياضه والدايت الكويس ولما تخسي وتلاقي انه عندك حته مش بتنزل وقتها تشوفلها حل غير كدا اي دايت ورياضه هيخسسوكي وربنا
وربنا يوفقكم للي فيه الخير وانا عارفه اني طولت عليكم بس دي تجربتي الكاملة بكل تفاصيلها ويارب تكون افادتكم
ويارب تتحقوا كل الي بتتمنوه وديما تبقوا بصحه وخير يارب
كيكايه كيكايه 329524_2.gif فتكات نشيطة Fatakat 329524 في بيتنا – في ايجيبت