الحكاية باختصار اني متجوزة من خمس سنين و لفيت على الدكاترة كلهم و وصلوا في الاخر ان ما فيش سبب واضح لعدم الحمل في اسباب صغيرة بيعالجوها بس في ستات بيحملوا بيها…و اخر دكتور من سنة قاللي نعمل عملية منظار نستكشف و و قاللي كان في شوية تكيسات و عملتلها كي بس برضه دة مش سبب واضح لعدم الحمل لانها ما كانتش كتير و بعد سنة من العملية برضه مافيش حمل…..المهم خلاص نوينا نعمل عملية تلقيح و قعدنا نختار الدكتور و المركز الكويس اللي هنعمل فيه الكلام دة الشهر اللي فات..و بعدين انا بعد البيريود ما خلصت و التبويض جه لقيت الالم فظيع قلت التبويض الشهر دة جامد الحمد لله ركزنا مع ايام التبويض و بعدين بعد ما خلص التبويض الوجع مش بيروح…قلتله تفتكر حامل قاللي انتي عبيطة ما يبانش خالص…بسلامته دكتور و ما بياخدش بكلامي و قال ايه لازم بعد البيريود عشان احس اني حامل و اي كلام بقوله هجص ههههههههههه….المهم انا حاسة بايه حاسة بوجع في الظهر و البطن زي البيريود و التبويض تمام..ما صبرتش دخلت على فتكات و قلت اشوف التجارب ايه و عملت موضوع من 15يوم تقريبا بسال فيه عن الاعراض دي في ناس قالتلي ممكن حمل و ناس قالت ما يبانش….المهم ماصبرتش قبل ميعاد البيريود ب 8 ايام رحت عملت تحليل الحمل الرقمي في المختبر قال ايه مش حامل النسبة 1.4 و هي لازم تكون 5 عشان اكون حامل طبعا اكتأبت بس قلت خلاص الحمد لله…جوزي قاللي خلاص بقى اتأكدتي انك مش حامل نروح للدتور عشان نبدأ اجراءات العملية…و روحنا فعلا و الدكتور عمل منظار و قلتلة على الالم اللي كان عندي بس في المنظار وقاللي انتي تبويضك كان جامد الشهر دة هههههههههههه ضحكت عليهم كلهم و كنت حامل في السر هههههههه….المهم معلش اصلي فرحانة و بحكي بالتفصيل….المهم يا فتوكات…تعدي الايام و الدكتور طلب مني تحاليل بقى عشان التلقيح رحت عملتها و المفروض اروحله بعد البيريود علطول الهان ما بتجيش يوم اتنين طنشت و بعدين قلت لجوزي تفتكر انا حامل و الدكتور ما شافش قلي يا بت انتي هبلة ما توهميش نفسك خلاص احنا هنعمل العملية….المهم امبارح صحيت من النوم صدري بيوجعني قلت خلاص البيريود هتيجي و بعدين انا بكتب على الموبايل مواعيد البيريود قلت انا ما عدتش هي اتاخرت قد ايه لما اشوف لقيتها متاخرة 5 ايام…معرفش ايه اللي نزل عليا وقلت انا هجيب اختبار حمل من الصيدلية مع اني خلاص متاكدة اني مش حامل و جبت اتنين قلت للشهر الجاي واحد هبقى عملت العملية خلاص….و عملت الاختبار و فضلت واقفة جنبه ثواني انا متعودة ان الخط الاول بيبان بسرعة و التاني بفضل مستنياه خمس دقايق و ما بيجيش فجأة في ثواني لقيت الخطين حمر كدو و منورين جتلي صدمة و جوزي كان بيعير كاوتش العربية و بنت خالتي بايتة عندي و قاعدة برة طلعت بترعش و بعيط و كان هيغمى علية من الصدمة ما كنتش فرحانة كنت حاسة اني بحلم و دة مش طبيعي اصل بقالي 3 شهور ما فيش لا منشط و لا حقن و لا اي حاجة خالص ناديت بنت خالتي و بعدين ابتديت اضحك و اعيط وبعدين عملت التحليل التاني طلعوا خطين برضه رحت مكلمة جوزي و انا بضجك واعيط و قلتلة بالضبط(انا عندي خبر غريب….انا حامل) هههههههه ماصدقش و قعد يضحك و يقوللي انا انزل اغير الكاوتش ارجع الاقيكي حامل هههههههه …نزلنا عملنا تحليل دم طلعت الحمد لله حامل قعد يبوس فية و يحضني في المعملو الشارع و انا جوزي بيتكسف مش جرئ بس هو ما كانش يا حبيبي حاسس…طبعا بعد نص ساعة العيلتين كانوا عندنا في البيت و زغاريط و فرحة من الكل خليتني مش مستوعبة ايه اللي بيحصل و عملولي حفلة و تورته وكان يوم الحمد لله و الشكر لله من اجمل ايام حياتي….المهم في الاخر اني بدعي لكل واحدة لسة ما حملتش انها تحمل انشاء الله وكل واحدة حامل تولد بالسلامة و انا هروح للدكتور النهاردة عشان ابتدي متابعة يا رب يطمني و يكون حملي طبيعي و ما فيهوش مشاكل بإذن الله,,,يا رب يفرح المسلمين جميعا و يرزق كل محتاج اللهم امين
Maleeka ‘s Mom Maleeka ‘s Mom 264820_4.gif سوبر فتكات Fatakat 264820 القاهرة – مصر
سبحان الله و بحمده