السلام عليكم ورحمة الله وبركاته إخواتي الأعزاء أهلا بيكم معاي في موضوعي الجديد عايزة أقولكم إن فعلا السنة دي بالنسبة لي مختلفة عن السنوات إلي قبل كدا لأني باخس فيها لسه طبعا قدامي كتير بس أنا متفائلة خير لأن تفائلوا بالخير تجدوه تقريبا كدا بقالي 5شهور عاملة رجيم أول مابدأت كان حماسي عالي جدا إني أخس بس مكنتش متعودة علي الرجيم فكنت بالاقي صعوبة في إني ألتزم بس قاومت علي قد ماقدرت دلوقتي حماسي مإنعدمش بس قل كتير عن الأول بس بأحاول أذودة بإني أقف قدام المراية بأحس فعلا إن في تغير حصل فبأتشجع وأكمل كنت في الأول مأرضاش أتصور صورة باين فيها جسمي كله كان بيبان وشي بس كنت بأخدع نفسي يعني أتصور وأبص وأقول الحمد لله إني حلوة دلوقتي بقي أتصور بالطول بالعرض متفرقش إلي إتغير بس وشي إنه خس كتير عن الأول بس طبعا ضرر أخف من ضرر بصراحة نفسي أوي في ال6شهور إلي فاضلين علي نهاية 2024أكون وصلت ل100ك بإذن الله هاحاول علي قد ماأقدر طبعا وزن 100ك دا كتير جدا بس بصراحة هو بالنسبة لي هيكون إنجاز….. نفسي لما أخس أمشي كدا الناس مستغرباني ومش مصدقا إني أنا قد إيه الخسسان دا نعمة كبيرة ميحسش بيها إلي إلي مفتقدها كدا زي بجد بأقابل بنات وزنهم 70بالكتير وألاقيهم متضايقين وكارهين الدنيا حاسين إنهم تخان جدا وجسمهم وحش أوي بأبقي نفسي أقولهم من غضب ربنا عليكم إنكم مش حاسين بالنعمة إلي أنتم فيها وغيركم بيعمل المستحيل علشان يوصلها ويعالم هيوصل وإلا لأ لازم كل واحد يشكر ربنا علي النعمة إلي هو فيها وغيره محروم منها ….. دلوقتي بدأ كل إلي يشوفني يحس إني خاسة عن الأول بجد في ناس بأحس إنهم طايرين من الفرحة وفرحانين لي من قلبهم وناس بأحس في عيونهم بنظرات الحقد مع إنهم مش تخان خالص بس لأسف في ناس كدا متتمناش لحد الخير أبدا وناس تانية عندها فضول غريب تعرف الشوية إلي خسيتهم دول كام وخسيتهم إزاي مع إنهم مش تخان ولا حاجة بس فضول وخلاص ليه كدا بس هوأنتم كنتم معاي دا أنتم لو عرفتم المعاناه إلي فيها من أول بدأت لدلوقتي علشان أخس هأصعب عليكم أصعب حاجة الحرمان من الأكل مش حاجة سهلة أبدا بس مين يسمع بس عن تجربتي علشان تقاومي الأكل لازم تكون في حياتك حاجة بتحبيها أوي أوي علشان تحطيها بديل لأكل كل ماتحسي إنك هتفقدي السيطرة في التحكم في الأكل تلقائي تفتكري الحاجة دي ومتلخبطيش…… متعودة أنا طبعا علي إني كل ماأخرج لازم أسمع تعليقات من الناس سواء تريقة علي تخني أو معاكسات بقالي فترة كدا بإستثناء مرة واحدة كل ماأخرج محدش يضايقني خالص بقيت بأحس إني مش مختلفة عن الناس يعني أقدر أمشي عادي كدا من غير ماأحس إن الناس كلها بتبص علي كأني حاجة غريبة عنهم فدي لوحدها نعمة ربنا يديمها نفسي بقي أعرف الولد إلي بيمشي يعلق علي بنت دا بيعمل كدا ليه يعني لو حد بيعاكس أكيد مش هأعيط يعني هأقول في نفسي دا إنسان مش محترم وخلاص لكن إلي يقول لبنت كلام بيتريق بيه علي تخنها هو بيستفاد إيه غير إنه دبحها بسكينة تلمة وهي أصلا يعالم حاسة بإيه وإلا متضايقة من إيه وإلا التخن دا مسبب لها فمش ناقصة أكتر من إلي هي فيه ليه بنضايق الناس كدا ما كل واحد يمشي في حالة ويفكر في مشاكلة ويحاول يحلها نفسي الناس تتغير كدا وتبطل كلام علي بعضها عمري ماقعدت في قعدة فيها ستات وبطلوا ذم في ستات تانية لازم يتكلموا وخلاص كأن هما كاملين يإما إلي بيتكلموا عليها دي عندها حاجة مش عندهم فيحسدوها أوناقصها حاجة عنهم يتريقوا عليها ربنا يكرمها والدتي عمري في حياتي علي مدار 21سنة أهو مالقيتها جت إتكلمت علي واحدة زميلتها ولا واحدة من قرايبنا ولا أي حد في الدنيا إتنقلت لي تلقائي الصفة دي علي النقيد تماما الأم إلي بتفضل تتكلم علي دي ودي بتلاقي أولادها بقوا كدا من غير ماتحس وصعب تغيرهم بعد كدا لازم الأم أول حاجة تعلمها لإبنها خليك في حالك ياإبني وملكش دعوة بحد وإلي تلاقيه عندة عيب أومشكلة تقول الحمد لله الذي عفاني من ما إبتلي به غيري لو كل واحد خلاه في حاله أعتقد حال الدنيا هيتغير ….. طبعا يسعدني وجود حبايبي وأخواتي وأصحابي من الجروب إلي فات يكونوا معاي هنا وكمان يسعدني إنضمام عضوات جديدة معانا أهلا بيكم كلكم ويارب تحقق لنا كل أحلامنا وأمانينا …..إشهد يازمن إن سنة 2024 أجمل سنة في عمري فيها بدأ يتغير مجري حياتي ولسة مستمرة في رحلة التغير مين تحب تكمل معاي؟؟؟؟
dr myaar dr myaar images/flowersavatars/avatar0031.jpg ممنوعة من المشاركة Fatakat 255897 جنة الدنيا – مصر
سبحان الله و بحمده