السلام عليكم
برنامج the doctors كان مستضيف مسئوله عن مجله عامله تقرير عن اسرار السوبر ماركت بس هم اسرار كتير
لكن هم للأسف كانو بيعملو دعايه للمجله وقالو حاجه بسيطه منها
فكرت اكتبها هنا لانها بصراحه فرقت معايا وقولت ممكن معاكم برده
علي الأقل باكون فاهمه مش محطوطه تحت تاثير
أولا
عند الكاشير دايما بيكون عنده لبان وتشوكليت وبطاريات وكمان أسعارها بتكون فيها زياده ساعات ومع تعمد الكاشير البطء انتي بقي بتفضلي عينك عليها ودماغك تقولك انك فعلا محتاجاها( وبصراحه انا كنت كده)
ثانيا
حجم العربيه قالت انها كانت زمان حجمها صغير وده بيأثر اثناء الشرا لانك لما بتحطي فيها حاجه بسيطه بيجيلك شعور انه لسه بدري وكإنك لازم تمليها(وانا بقالي فتره باستخدم الباسكت الصغير ده فعلا بيفرقوخصوصا لو محدده انتي هتجيبي ايه)
ثالثا
تعمد استخدام مزيكا هاديه وده بيخلي المستهلك يستلذ المكان ويقعد فتره أطول وطبعا ده معناه شرا اكتر
رابعا
الخضار والفواكه وبالأخص التفاح ممكن يقعد 14 شهر بسبب حقنها مواد وتغليفها بطبقه شمع بتحافظ علي شكلها
خامسا
الخضره زي الخس والجرجير واللي شبههم بيرشوها ميه دايما طول الوقت بحجه انهم يحافظو عليها ولكن في الأساس لزياده وزنها نفضيها كويس قبل ماتنزلي اكيد بتفرق مادام ذكروها
وأخيرا
ماننخدعش بالعروض اوي لانها غالبا بتكون المشكله في الصلاحيه احلي عروض بتكون العروض الترويجيه لترويج سلعه معينه فناخد بالنا
يارب يكون الموضوع حلو وخصوصا انه اول حاجه اكتبها هنا
خديجة ديجة خديجة ديجة فتكات نشيطة Fatakat 1122293 القاهرة – مصر