سلام عليكم يا بنات
وحشتوني من المرة اللي فاتت
انا اسفة اني اتأخرت عليكم في باقي الموضوع هتقولولي كل ده كنتي بتأكلي ابنك معلش بقى سامحوني احسن انشغلت في كام حاجة كدة وكنت بفكر على رواقة
عشان منساش حاجة وبعدين لقيت تقييمكم واهتمامكم بالموضوع فقلت لازم اكمل
وده لينك الجزء الاول عشان اللي مشفهوش
https://fatakat.univanet.com/#4457332
المهم نكمل رحلة العذاب والضنى بتاعتي في توضيب شقتي
والمرة دي هتكلم عن الفرش
انا شقتي 3 غرف غير الصالة فتحت اوضة ع الصالة بقت رسيبشن
واوضة نوم واوضة اطفال تمام
بسم الله الرحمن الرحيم
اولا : اوضة النوم
احنا كنا متفقين ان جوزي عليه اوضتين وانا عليا اوضتين تمام
1- اكبر غلطة عملتها في اوضة النوم اني عملتها عمولة
للاسف جوزي وقتها كان مصمم انه يعمل الاوض عمولة عند النجار اللي بتعاملوا معاه وانا مكنتش موافقة بصراحة بس وافقت عشان خاطره
2- وكمان الغلطة الاكبر ان لا انا ولا هو كنا متابعين الاوضة لانها كانت بتتعمل في البلد فباباه هو اللي كان متابعها وطبعا ذوق الناس الكبار مش زيينا خالص
طبعا انا شوفت الاوضة قبل ماتدهن كانت جميلة بس بعد مادهنت اتصدمت معجبتنيش خالص
كان يومها هاين عليا اعيط مش عشان هي وحشة يا بنات بس كفاية ان هي مش ذوقي
انا بحب الحاجة البسيطة السيمبل والراجل الصراحة اتوصى بيها زيادة عن اللزوم عمل القشرة بتاعتها فيه نقش كتير اوي عامل زي جلد النمر كده هتلاقوا صورة الدولاب باينة في موضوعي بتاع اللبس اللي في التوقيع لو عوزين تشوفوها
فنصيحتي ليكوا يا بنات هاتي حاجة جاهزة قدامك اضمن وشايفة شكلها النهائي عامل ازاي مش حاجة لسه مش متخيلة هتطلع ازاي
ولو خطيبك مصمم يعمل عمولة لازم تتابعي بنفسك من وقت للتاني وتختاري لون الدهان
الفنش بتاع الدهان بيفرق في شكل الاوضة نهائي
ادعولي ربنا يوسع عليا واجيب الاوضة اللي على مزاجي
ثانيا : الانتريه
وده انتريه الصالة وبرضه عملته عموله
هو كخشب متين ونضيف وكل حاجة لكن القماش بقى
غلطتي بقى يا بنات
1- اوعي تنزلي تشتري قماش تنجيد او ستاير وانتي داخلة على مواسم اعياد
اولا بتبقى الدنيا زحمة جدا ومش بتعرفي تلفي وتمشي براحتك
ثانيا البياعين بيبقوا مغليين اوي وماسكين في الحاجة جدا لانه موسم ولو مخدتيش الحاجة غيرك هياخدها
ثالثا تبقي واخدة معاكي حد بتثقي في ذوقه زي اختك مثلا لوخطيبك مالوش في الحاجات دي وكمان حد بيعرف يفاصل كويس لانهم بيرفعوا في سعر الحاجة الضعف
واهم حاجة تبقى محددة الشكل اللي انتي عوزاه في دماغك وتفتكري مكان البياع اللي انتي عجبك عنده الحاجة
2- كمان حاجة مهمة جدا لو عجبك حاجة عند حد فاصلي معاه وهاتي اخره فيها قبل ماتسبيه وتمشي عشان لوسبتيه ورجعتيله هيفضل يتنك عليكي وهيعرف انك معجبكيش حاجة ورجعتيله ومضطرة فحاولي قبل ماتمشي تعرفي اخره ايه
انا وقتها بقى نزلت الازهر وفضلت الف كتير اوي لما زهقت والحاجة اللي تعجبني البياع ميهودش فيها والحاجة اللي تعجب خطيبي مبقاش مقتنعة بيها لغاية مزهقت وجيت عند اخر محل شفت قماشة كدة اللون اللي عوزاه بس مكنتش مقتنعة بيها اوي وكل اللي معايا كانوا زهقوا ودبسوني فيها وخلاص
3- نصيحة لو زهقتي ومعجبكيش حاجة متشريش وخلاص ممكن تمشي وتيجي في يوم تاني تدوري براحتك اكتر
4- نصيحة كمان اختاري القماش بتاع الانتريه سادة في منقوش بيكون اشيك من لو كله منقوش
او لو الاتنين منقوشين تبقى القماش الاساسي تكون نقشته بسيطة زي تقليمة خفيفة كدة عشان ميبقاش اوفر اوي ده رأيي
انا جبت القماش الاساسي على شكل سمبوكسات والشلت ورد كان شكلهم معقول بس لما اتفصلوا على بعض معجبنيش الشكل خالص حسيته زي طرحة بنت العمدة وانا بحب الحاجة الهادية
5- القماش الشانليلا ده بيحرر موت مبستحملش اقعد عليه في الصيف او يلمس جسمي بحس بسخونية فظيعة وصهد والله طالع من ههههههه انتوا عارفين منين
في اقمشة احلى واطرى منه وخفيفة كدة او لو جبتيه اعملي كسوة عشان تحافظي كمان على نضافته
ثالثا : الانتريه
طبعا انا كان في دماغي اني هجيب للاوضة التانية صالون بس للاسف الغلطة اللي وقعت فيها كالاتي
1- التردد لاسف يا بنات صفة سيئة من صفاتي وهي التردد ممكن اشتري الحاجة وارجع اغيرها كذا مرة جوزي متعقد مني في الموضوع ده بالذات
كان فيه صالون عجبني اووووووووي بس كان لونه مش ماشي بالظبط معايا فقلت ابقى ادور واتفرج على باقي المحلات وابقى ارجعله وللاسف لما رجعت كان اتباع الحمد لله مكنش من نصيبي
لو عجبكوا حاجة ولقتوها مناسبة وسعرها حلو اتكلوا ع الله وبلاش تردد مش لازم الالوان تبقى شبه بعض المهم تبقى لايقة على بعض
2- اني زنقت نفسي لاخر وقت وكان فاضل شهر ع الفرح ومكنتش جبت الصالون ولفيت على اماكن كتير معجبنيش حاجة فبلاش تزنقي نفسك لاخر لحظة وتضري تشتري اي حاجة والسلام
3- حاجة تانية مهمة من وجهة نظري انك تنزلي تشتري الانتريه او الصالون قبل ماتدهني الشقة عشان تختاري براحتك ولون الدهان ميحكمكيش بلون معين وممكن تجيبي حاجة مش عجباكي لمجرد انها مشاية مع الالوان وعادي الانتريه والصالون ممكن يتكوموا في اوضة واحدة علبال ما النقاش يدهن باقي الشقة
4- ياريت تراعي حجم الاوضة اللي هتحطي فيها الانتريه لو صغير بلاش تجيبي حاجة كبيرة لما بتسيبي مساحات فاضية بين الاثاث وتبقى الحاجة محطوطة براحتها بتدي احساس بالراحة مش تحسي كده بالكركبة
انا اشتريت الانتريه شكله جميل لكن كبير وضخم وحاسة ان الانتريه يادوب ع الاد ومزنوق ومعرفتش احط اباجورة على ترابيزة مدهبة ولا فازة طويلة زي مكنت مرتبة في دماغي
رابعا : اوضة الاطفال
ودي نزلت اشتريتها من المناصرة وشكلها كان جميل بس اول ماشوفتها تربست دماغي عليها وكل مايفرجوني على حاجات ممكن تكون اغلى في السعر وامتن وانا ابدا دماغي والف جزمة عاوزة دي
1- المهم العيب اللي فيها ان دولابها جرار ومنصحش حد بيه خااااالص
ليه بقى ؟؟
اولا هو عبارة عن 3 ضلف بس كل واحدة لوحدها مش مفتوحين على بعض فطبعا مساحة الضلفة صغيرة مش كبيرة فمش بعرف اخزن فيه البطاطين والمفارش بتاعتي
ولو عرفت ادخله بالعافية بيتزنقوا جوه والباب ميرضاش يتفتح وافضل اشد اشد لما الاقي الضلفة طلعت في ايدي واضطريت اشيلهم فوق الدولاب مع اني مبحبش الشكل ده
2- ده غير ان ابني حبيبي عامله مرجيحة رايح جاي بيه طول اليوم وبخاف والله الضلفة تقع على دماغه وياخد جزاءه هههههههه بعد الشر طبعا ربنا يحفظه يارب
عشان مطولش عليكوا وازهقكوا هعملكوا جزء تاني ان شاء الله هكلمكوا فيه بقى عن الستاير والسجاد والمطبخ الالومتال وحجات المطبخ واللبس لو ربنا قدرني ان شاء الله
انا قاعدة بكتب في ورقة افكاري عشان منساش حاجة
بس طبعا متنسوش التقييم عشان انا تعبت في الموضوع واتمنى تقدروا تعبي عشان افيدكم بمعلومة ممكن تنفع بنوتة في شقتها
ادعولي يابنات الله يكرمكم ربنا يثبتني على الصلاة ويوسع رزقي انا وزوجي ويباركلي في ابني طماعة انا معلش ولو واحدة فيكم تعرف درس ديني عن الصلاة وفضلها ياريت تبعتلي اللينك وربنا يجازيها خير
اشوفكم على خير يا بنات في امان الله
manola2016 manola2016 502057_5.gif فتكات رائعة Fatakat 502057 الجيزة – مصر