السلام عليكم حبيباتى الفتوكات وحشتونى جدا جدا
يمكن يكون بعضكم عارفنى انا صاحبة موضوع اصعب تجربه ممكن ست تمر بيها
وده اللينك بتاع الموضوع عشان نختصر https://fatakat.univanet.com/#3872599
المهم بنات كتير فى المدونة كانت بتسال على مركز الليزر اللى فى جامعة القاهره
بصوا بقى يا فتاتيك المركز بالضبط مقابل كلية الاثار فى وشها يعنى
وانا وجوزى بندخل من الباب الرئيسى بالعربيه لانه الاسهل لينا
المهم رحت من حوالى شهر كده قطعت كشف ب35 جنيه عشان ادخل للدكتوره
لكن لسوء الحظ اننا رحنا متاخر بعد الساعه 11 كانوا خلصوا عدد الحالات اللى بياخدوها
وقالوا لنا لازم الدكتوره تكشف عليكى الاول وتديكى كارت تردد تيجى بيه المره الجايه
وتعملى الجلسات دخلنا لدكتوره نيفين منتهى الذوق والاحترام كشفت عليا وقالت ان المناطق المصابه
واخده مساحه كبيره من الجسم فصعب كله يتعمل فى جلسه واحده ع الاقل من باب التكلفه
وقالتلى انتى محتاجه عشر جلسات كل شهر جلسه والجلسه اللى هى هتتقسم على اتنين
هتكلف 3000 جنيه وبكده بقيت محتاجه 20 جلسه الجلسه الواحده ب1500
وقالتلى الجلسات اى يوم احد او ثلاثاء الساعه 8 وبياخدوا 100 حاله فقط
رحنا الثلاثاء الساعه 9 ودخلنا لها تانى وكتبت لنا التردد المطلوب او المناسب
وبعد كده رحت عيادة الجلسات واستنيت لحد ما جه دورى اول ما دخلت
رفعت النقاب وقلعت الجوانتى ولبسونى نضاره غمت عينى خالص
وابتدت الدكتوره تعمل بالليزر
السؤال اللى فى بالكم هو بيوجع ايوه بيوجع زى شكة الابره كده
وانا كان ليا 122 نبضه هى النبضه زى شكة الابره كده المهم خلصت وقومت
الدكتوره كتبتلى الروشته فيها كريم مضاد حيوى اسمه فيوسيدين
وعازل شمس حلو اوى اسمه بيودرما وقالتلى اوعى تتعرضى للشمس او اى حراره
الا لما تدهنى الsun block بيودرما وقالتلى معاد الجلسه التانيه بعدها بتلات اسابيع
بس للامانه هما معاملتهم حلوه اوى مش معنى انهم جهه حكوميه انهم وحشين
والجلسه اتكلفت 500 جنيه بس
الحالات الللى انا شوفتها واتكلمت معاها يا اما جايين عاوزين يشيلوا اثار الحروق زى حالاتى
ومعظمهم اطفال وبعضهم عاوز يزيل الشعر الزائد وغيرهم عاوز يزيل اثار حب الشباب
ودول الاكتر لكن هو ليه فوائد كتير غير كده على حسب الدكتور اللى باعتك
بس انا مش مستعجله على النتيجه لانى عارفه ان اثر الجلسه بيبان بعد شهرين
طبعا للى فى حالتى كده
دلوقتى انا ليا طلب عندكم بالله عليكم ماتكسفونيش
انا لما جيت اعمل الليزر كان نفسى الاقى موضوع هنا يطمنى لكن ما لقيتش
ولقيت كل المواضيع الخاصه بالليزر استفسارات ومحدش بيرد بالله عليكم تقيموا الموضوع
يمكن نقدر نفيد واحده محتاجه للى يطمنها زيى من شهرين
وفى النهايه طالبه دعواتكم بالشفاء العاجل
ام حازم وحمزه ام حازم وحمزه images/flowersavatars/avatar0025.jpg فتكات متميزة Fatakat 805432 القاهره – مصر