السلام عليكم ورحمه الله وبركاته
ازيكم يا بنات عاملين ايه وحشتووووونى جدا يارب تكونوا كلكم بخير ومبسوطين
بصوا بقى انا اولا كده مبحبش الزحمه اطلاقااااااا وكنت ضد فكره انى انزل الموسكى او الغوريه والاماكن الى شبه كده عشان الزحمه بس بعد اقناع ماما ليا الحمدلله اتكلنا ع الله ونزلنا ومبسوطه جدااا انى نزلت لانى اشتريت حاجات جميله اوى الحمدلله
ندخل ف الموضوع بقى عشان رغيت كتير انا كنت نازله عشان اكمل الملايات والفوط والمفارش واجيب البرنس و مفرش الدخله تمام كده
صلوا ع النبى بقى انا كنت نازله لمحل معين هناك كان فى حد قايلى عليه بس مكنتش حاطه امل اوى فيه وقولت مش لازم هو يعنى بس الى حصل انى جبت كل حاجتى من عنده ماعدا البرنس وهتعرفوا ليه شويه كده بجد يابنات اييييييييييه الجمال بتاع حاجته ده حاجته ماشاء الله جميله اوووى وخامه مفيش بعد كده واسعاره تحفه المحل اسمه احمد عثمان ادامه توكيل توشيا العربى ..يلا بقى اقولكوا ع الحاجات الى جبتها
نبدأ بالفوط انا مخلصه الفوط المشجره وفوطتين مفرد كده ساده والبشاكير مش ناقصلى غير اكمل الفوط الساده جبت من عنده علبه فوط ساده 6 فوط ب140 ج بس رقيقه جدا وشكلها شيك اوووى وخلانى اختار من العلب الى عنده الوان الفوط الى عيزاها وجمعتها ف علبه واحده
بالنسبه للملايات كان ناقصلى كام ملايه برضو وكملتهم من عنده
جبت ملايه 3D شكلها يجننننننن ب95 ج بس وعنده اشكال كتيييييييييير اوى بس انا اكتفيت بواحده
وجبت ملايتين انا مكنتش مصدقه انهم ملايات اصلا من كتر جمالهم تحسى انهم مفارش لدرجه انى فكرت افرش واحده منهم يوم الدخله بدل المفرش بس ماما قالتلى مينفعش مش عارفه ليه يعنى بس ماعلينا .. جبت واحده لونها ابيض وواحده سكرى بجد يابنات مهما قعدت اوصفلكم ف جمالهم مش هتصدقوا انا اصلا مشوفتش زيهم قبل كده ولا حتى ع النت الواحده كانت ب120 ج ف قررت انى هفرش البيضه تحت مفرش الدخله
وجبت ملايه لونها ابيض ف اسود مشجره كده حلوه اوى برضو كانت ب110 ج
كنت عيزه اجيب من الملايات التركى الحرير الساده بس للاسف ملقتش عنده بس قالى ابعتله صورهم وهجيبهوملى وكنت عيزه مفرش الدخله بس ملقتش ف الموسكى كلها المفرش الى ف دماغى المفارش الى هناك كلها استايل واحد الى هى فيها شغل كتير اوووى ووورد كبير كده وانا مش عيزه ده لانهم بيتفرشوا يوم اسبوع بالكتير ويتشالوا لان بيبقى باين عليهم انهم مفارش دخله انا عيزه مفرش تركى يكون التطريز بتاعه منه فيه ويكون رقيق كده عشان ينفع افرشه ف اى وقت عادى
اما بالنسبه للبرنس مجبتهوش من عنده لان كل الى عنده فى شغل وورد من ع الصدر كده وانا كنت عيزاه ساده او حاجه صغنونه كده من فوق والحمدلله لاقيته عند محل تانى ف الموسكى برضو جبت البرنس تركى ب240 ج شكله حلو اوى
بمناسبه المحلات الى هناك بقى انا الاول سيبت حاجتى عند المحل عشان كنت هجيب حاجات تانى من الموسكى بس اقسم بالله يابنات انى سمعت هناك اسعار غريبه يعنى مثلا زى الملايه المشجره ابيض ف اسود دى سألت عليها عند محل تانى قالى 135 ج ونفسسسس الخامه وكنت كل ما الاقى عند محل حاجه زى بتاعتى كنت بسأل عليها وبسمع ارقام غريبه والبياعين عيزين يدبسوكى ف اى حاجه وخلاص ربنا يسهلهم حالهم بقى
عنوان المحل اهو عشان الى عيزاه ( 9ش جوهر القائد – الموسكى – أمام توشيبا العربى )
معلش طولت عليكوا يابنات يارب اكون قدرت افيد حد وربنا يتملكوا على خير ياااارب ويفرح قلوبكوا
السلام عليكم ورحمه الله وبركاته
Nons hema Nons hema 1129709_2.gif فتكات نشيطة Fatakat 1129709 القاهره – مصر