السلام عليكم ورحمة الله وبركاته
ازيكم يا قلبوظات وان شاء الله كلنا نبقا قمرات
انا جاية النهاردة احكيلكم حكايتى مع السمنة يمكن واحدة منكم تستفيد وتدعيلى دعوة حلوووة
انا طووووول عمرى مقلبظة بسبب عادات امى الله يخليهالى يارب
أمى كانت بترجم حبها ليا أنا تأكلنى زيادة وتأكلنى كل حاجة وفى أى وقت لدرجة ان كان شكلى انسة كده ومقلبظة وانا فى ابتدائى
والمدرسين كانوا بيتريقوا عليا حتى اللى مليانين منهم وكنت كتير اروح لها معيطة من مضايقتهم ليا
وطبعا كبرت وانا ماليش اى حلم فى حياتى غير انى ابقى رفيعة
المهم اتجوزت كنت تقريبا 85 كيلوا وبعد الولادة الاولى وزنى وصل ل 100 كيلووو
طبعا دخلت فى دور اكتئاب كل ما ابص لروحى فى المرايه أقرف وامشى كرهت كل حاجة فى حياتى
وانا طول عمرى لا جربت اعمل رجيم ولا كان عندى الارادة اصلا
المهم اخدت قرار انى هخس وبمنتهى السرعة وعملت عملية تدبيس المعده بجد كااااانت اكتر حاجة مؤلمة عملتها فى حياااتى وندمااااانة ندم عمرى انى عملتها ليه بأه هقولكم
العملية دى بتسيب ليكى جزء صغير جدا من المعدة والباقى موجود بس مقفول عليه
وليها نظام لازم تشربى سوايل قبل الاكل وتاكلى حاجة بسيطة جدا عبارة عن معلقتين رز وعليهم معلقة خضار واحدة وقطعة لحمة مثلا صغيرة المشكلة لو زودتى بتستفرغى
طبعا دى حاجة مسببة ليا احرااااج فظيع لحد الان لانى مش دايما باقدر اتحكم فى كميات الأكل
سبب ندمى الحقيقى حاليا ان وزنى زاد تانى بعد ولادتى الثانية ووصلت ل 86 تخيلو بعد ما كنت 60 كيلو ب 6 شهور من العملية بسسسسسسسس
المهم طبعا سبب زيادة الوزن انى كنت بشرب عصاير كتيرة جدا بسكر بعد الولادة ومغااات بالعبيط
وحلاوة و و و و
وكلنا عارفين نظام الامهات والحموات بعد الولادة بيكون ازاى
وحرام عليكى هترضعى الواد ايه ميه ؟؟ اشربى يختى مغات بالسمن البلدى والمكسرات بالهبل علشان الواد ينزله لبن بالسمن البلدى كامل الدسم
بعد 6شهور من ولادتى التانية قررت أقف وقفة مع نفسى وأقول لأ لازم ارجع زى
ما كنت كل لبسى ضاااق عليا وفقدت الثقة فى نفسى وقدام جوزى بتكسف منه جوزى جسمه رياضى جداا وقدام اهله لان كلهم رشيقات فعلا ما شاء الله حاولت اشترك مع بنوتات قمرات هنا فى جروبات
لكن للاسف مكملناش بس الحمد لله يا بنات انا خسيت من 86 ل 78 حاليا
ولسه باذن الله مكملة لحد ما أرجع 60 كيلو تانى
وطبعا انتوا معايا اللى حابه تاخد خطوة ايجابية فى حياتها وتبدأ انا بمد ليها ايدى مش هتخلى عنكم والله حتى لو وصلت للوزن المثالى لانى حسه بكل احساس ممكن تحسوه
مش عاوزاكم تستسلموا يبات وتقولوا ما هى مش فارقة انى اكون 100 ولا 120 قولى لنفسك ليه معملش زى اللى عملوا وخسوا كتير بالمواظبه مش هقول اننا هنلتزم على طول الخط يا قمرات بس اهم حاجة المواظبة
وانا مش هكتب لكم دايت معين لانى انا نفسى مبحبش حد يفرض عليا حاجة
عن نفسى متبعة نظام انى منعت السكر الا معلتين فى اليوم
ومفيش رز ولا مكرونة باكل العيش السن احيانا
طبعا لا زيت ولا سمن كلنا عارفين الكلام ده
وهدخل كل يوم اتابعكم واكتب لكم يومياتى وهتابع الموضوع ده حتى لو واحدة بس اللى ااشتركت معايا
لانى عندى هدف وباذن الله هحققه
زائرة الليل زائرة الليل 420_5.gif فتكات رائعة Fatakat 420 الأسكندرية – الاسكندرية