ازيكم يااحلى فتوكات
انا الحقيقه كنت بعمل فراخ تكا والتوميه على طول
وبتطلع جميله وبتعجبنا بس مش زى اللى بناكلهم فى تكا ابدا
حلوه جدا بس مش نفس النكهه وطبعا لانى مبريحش دماغى
ولازم اعرف كل حاجه وجوزى بيقول عليا حشريه قلت لازم اسأل
خليتنا قاعدين كده فى تكا مره وروحت ناديت على الجرسون
وقولتله انا عاوزه الشيف من المطبخ حالا
بينى وبينكم الراجل اتخض وافتكر ان فيه حاجه فى الاكل
قولتله ﻷ ماتخافش انا هساله على حاجه
الشيف جه بسرعه والله كتر خيره قولتله عاوزه اعرف التتبيله
بتاعه الفراخ وعامل التوميه ازاى بالظبط
الراجل والله ضحك ووطى صوته وقالى حاضر هقولك
وشرحلى بالتفصيل والله العظيم كتر الف خيره
وانا طبعا ماكدبتش خبر وجيت اقولكم الوصفه على طول بعد ماطبقتها
عملت فراخ تكا وتوميه وسلطه بطاطس بالمايونيز وعيش محمص ده مشهور اووى فى تكا
نشوف كده الصوره التشويقيه
خلى بالكم التتبيله دى بنفس الانواع
هى اللى هتديلك نكهه تكا الاصليه ياريت تحطوها زى ماهى
المقادير
فراخ بعدد الافراد
عبوه لبن رايب جهينه متوسطه
علبه زبادى صغيره او متوسطه
معلقه صغيره ملح
نصف معلقه صغيره فلفل اسمر
نصف معلقه صغيره كارى
معلقه صغيره زعفران بودر
معلقه صغيره بابريكا
معلقه صغيره توم بودر
معلقه صغيره بصل مجفف او بودر
نصف معلقه ريحان بودر
نصف معلقه روز مارى بودر
معلقه توابل هندى
مقادير التوميه
2بطاطس متوسطه مسلوقه ومهروسه
2بياض بيض
2معلقه توم مهروس مع معلقتين زيت
كوب زيت
كوب لبن او اكتر
ملح حسب الطلب
لسلطه البطاطس بالمايونيز
1بطاطس كبيره مقطعه مكعبات ومسلوقه بسيط
بسله وجزر مسلوقين حوالى كوب
معلقتين اوثلاثه مايونيز
ربع معلقه توم مفروم
معلقتين زيت
العيش المحمص
عيش عادى مقطع مثلثات ومتبل بالكمون
زيت للتحمير
الطريقه
نحط مقادير التتبيله كلها مع بعض ونقلبها كويس
ونكون غسلين الفراخ كويس وشايلين الجلد كله
ونعمل فتحات طوليه بالسكين فى الفراخ علشان التتبيله تدخل جواها
نحط قطع الفراخ واحده واحده فى التتبيله لازم نغطسها فيها كويس
ونطلعها نحطها فى صنيه او حله ونصب باقى التتبيله عليها ونسيبها
على رف التلاجه مده لاتقل عن 4 ساعات انا عملتها من باليل
وبعدين علشان نشويها نحطها على الرف السلك لازم متكونش
فى صنيه وتحطى اللى نزل من التتبيله فى صنيه وعليه كوبين ميه
علشان تفضل طريه ومتنشفش ونغطى عليها بالفويل لغايه لما تدخل
لى السوا شويه وبعدين نشيل الفويل علشان الوش يتحمر
ملحوظه
لو عاوزه الفراخ اسبايسى زودى معلقه صغيره شطه
حمراء على التتبيله انا كنت عامله صدرين اسبايسى لجوزى
متبلاهم لوحدهم وحطاهم فى علبه
نشرح السلطات وبعدين ندخل على الصور النهائيه ياقمرات
طريقه سلطه التوميه الاصلى
لازم اول حاجه البطاطس المسلوقه نضربها فى الكبه
او الخلاط دى خطوه مهمه متهرسيهاش بايدك ابدا دى ملحوظه
من الشيف والله لازم تطحن تماما ونسيبها تبرد خالص ممكن تحطيها
فى التلاجه لو مستعجله وبعدين التوم لازم برضه يكون مهروس اوى
انا اصلا بخزنه مهروس بس اللى استخدمته ضربته تانى فى الخلاط مع معلقتين
زيت علشان يكون مهروس اووى
نضرب بياض البيضتين جامد جدا بالمضرب الكهرباء لازم لغايه ما يبيض
ويبقى زى المارينج كده بعدين نضيف عليه التوم المطحون ونضربه تانى
ونبتدى نزود زيت مره اولبن ومعلقه بطاطس مره تانيه يعنى مش نضيف
كميه الزيت مره واحده ولا البطاطس لازم بالراحه مع التقليب وطبعا الاحسن
استخدام الكبه او الخلاط حتى ولما تخلصى كميه البطاطس تشوفى القوام
لو عاوزه اخف زودى شويه لبن كمان برضه بالراحه انا كنت بضيف فى الكبه
وهى شغاله من الفتحه بتاعتها الافضل تخليها شغاله وملحى بالملح براحتك
وكده يكون عندك التوميه الاصلى والله من وصفه الشيف بالظبط وطلعت
فعلا نفس طعم توميه المطاعم تحديدا كانت روعه خراااافه
ومشاء الله المقادير دى عملت الحله بتاعه الكبه الكبيره كلها
حطيتها فى علبه بلاستيك كبيره
معلش بقى نسيت اصور كبايه الزيت واللبن مع المكونات
طريقه سلطه البطاطس بالمايونيز
دى اسهل سلطه ممكن تعمليها فعلا
بس البطاطس المكعبات لما نيجى نسلقها يادوب تاخد
غلوه وتصفيها علشان متتهريش فى السلطه
طبعا نسلق البطاطس لوحدها والبسله والجزر لوحدهم
هى فى المطاعم بتتقدم كده بطاطس وبسله وجزر لازم
نحطهم على بعض وعليهم ربع معلقه التوم المفروم وكميه
المايونيز والزيت وتبقى كده خلاص جاهزه للتقديم
والعيش المحمص يادوب نتبله بالكمون ونقليه فى الزيت
بس نخلى بالنا نسخن الزيت ونوطى النار علشان العيش
بيتحرق بسرعه جدا لو عليتى النار
ودى الصور النهائيه بالهنا والشفا قدمت معاها رز بالشعريه
وبطاطس محمره والسلطات وطماطم مقطعه
وده طبق جوزى الصدور الاسبايسى
شوفوا العيش والسلطات متبطليش اكل والله
ودى طريقة التسويه فى الفرن يا بنات
#111
انا كده الحمد لله خلصت يافتوكات
معلش الموضوع طويل بس انا محبيتش اعمل السلطات
لوحدها فى موضوع واحط اللينك حبيت الموضوع يكون متكامل
معاكى مره واحده
امانه عليكم متنسووووووووش التقييييم
ودعوه حلوه لولادى انا تعبت والله على مارتبت الصور
بطريقه سهله وبقالى ساعتين بنزل الموضوع يبقى متبخلوش
عليا حتى ولو بدعوه حلوه للعيال
فى امان الله فتوكاتى
من تطبيقات العضوات
https://forums.fatakat.com/showpost.p…&postcount=216
مواضيع هذا القسم برعاية
سيسو زيزو سيسو زيزو 822446_8.gif فتكات غالية قوي Fatakat 822446 المنصوره – مصر