***بسم الله الرحمن الرحيم***
إزيكم ياأحلى فتوكات فى الدنيا
النهاردة بقى جايبالكوا محشى الكرنب بس للأمانة المحشى ده ماكنتش أتخيل نفسى أعمله أبدا وإللى شجعنى على عمايله فتكات…إتعملت منها كتيير وبشكر كل واحدة مشتركة فى فتكات لأنها بالتأكيد إضافة لكل واحدة فينا..
نبتدى بقى
بسم الله
هقول مقاديرى وكل واحدة تضاعف أو تقلل على حسب أسرتها
كرنبة متوسطه
معلقتين سمنة كبار
بصلتين كبار
4/3 كيلو طماطم حمرا
كوباية أرز
2/1 كوب بقدونس مفروم
2/1 كوب كسبرة مفروم
2/1 كوب شبت مفروم
راس ثوم مفرومه
شوية نعناع ناشف
ملح وفلفل وكمون قليل وبهارت محشى وذرة قرفه
شوربة للتسويه
ملحوظة:
1- أهم حاجة فى المحشى تكون الشوربة مركزة جدا يعنى لو شوربة لحمة ياسلام لو عندك ماسورة بتبقى تحفة. ولو فراخ أو بط ماتشيليش الدهون إللى بتبقى فيهم عشان دى بتخلى الشوربة طعمها حلو وبالتالى المحشى هيبقى روعه.
2- الشبت ده أهم خضرة للمحشى وماينفعش محشى من غير شبت وبراحتك بقى تحطى معاه يا بقدونس يا كسبرة أو الإتنين .
3- الطماطم لازم لازم تكون حمرا.
4- للى بيحبوا الليه بتاعت الخروف ياسلااااااام عالطعم لو حطيتى أد معلقه أكل.
5- للى بيحبوا الشطة يضربوا قرون الفلفل مع الطماطم فى الخلاط.
**الطريقة**
نصفر البصل فى السمن وإوعى يحمر منك
أنا بحب أضيف البهارات وشويه ملح مع البصل بتكون نكهته أحلى مع الأكل
كدة خلاص البصل إصفر
فضلت أنفخ فى البخار عشان أطلع الصورة لغاية ماتعبت وبردة طلعت كدة
بضيف الصلصة وأول ما تغلى أوطى النار وأسيبها لغاااااية ما تتسبك خالص ومايبقاش عندى غير طماطم مركزة
ده شكلها بعد ما تتسبك خالص وبعد ماتتسبك بتكون جاهزة لإضافة باقى المكونات
بحط الشبت والبقدونس والكسبرة ويادوب أقلب دقيقه بس وأطفى النار على طول وأغسل الرز وأضيفه عليهم وأقلب وبعدين بضيف الثوم والنعناع الناشف وأقلب ولو محتاجه ملح أو بهارات تانى بضيف وبكدة يكون الرز جاهز…
طبعا بتدوره عالنعناع هو فين ..معلش معنديش نعناع بقى وعملته من غيره
نيجى بقى للكرنب
الكرنب ليه طريقتين للسلق..
طريقتى أنا: بسلق الكرنبايه فى ماء وشوية كمون وبعدين أقطعه
طريقة مامتى: بتقطع الكرنب وبعدين تسلقه
بس مانسلقش بضمير عشان الكرنب مابيستحملش
طريقة التقطيع معلش أنا هشرحها من غير صور وإنشااء الله تفهموها
طبعا الكرنبه بتبقى أوراق ملفوفه على بعضها وسواء سلقتيها الأول أو قطعتيها الأول فطريقة تقطيع الورقة واحده فى الحالتين… بتفكى الورقه الأولى بشويش وتفرديها قدامك هتلاقى فى النص عرق طويل بتجيبى السكينه وبتقطعيه وإياكى ترميه ده ممكن تخلليه بيبقى جميل أوى ..المهم بعد ما قطعتى العرق قطعى الورقه بالطريقه إللى تريحك لأن مالهاش طريقه معينه بس المهم تكون الورقه واخد شكل مستطيل عشان تبقى سهله فى الحشو وممكن حتت غصب عنك تبقى مثلث مش مشكلة كلة بيتحشى ولو ورقه باظت منك حطيها فى برطمان المخلل على طول..يارب أكون قدرت أوصلكوا إزاى تقطعوه..
أنا بسلقه وأقطعه وأشيلة فى أكياس فى الفريزر ووقت ما أحتاجة بطلعه يفك براحته ولا مايه ولا حاجه سيبيه يفك لوحده ويكون كده جاهز للحشو على طول ونفس الحكاية للخضرة بغسلها وبقطعها وأشيلها..
وده الكرنب بعد ما فك
بجيب الحله إللى هحشى فيها وبقطع فيها بصل وطماطم أو بصل وورق كرنب ذى الصورة كدة
بجيب الورقه وأحط شوية من الخلطة وألف كده
مامتى بقى علمتنى أرص المحشى كده صف بالطول وفوقيه صف بالعرض
وبعد أخر صف بغطى المحشى بكام ورقة كرنب من إللى باقى ولو مفيش مش مشكلة
خلاص حشيت المحشى ورفعته عالنار وحطيتله كمية الشوربه إللى محتاجها للسوا
لو عندك طبق إستانلس أصغر من حجم الحله غطى بيه المحشى الأول وبعدين غطيه بغطا الحله وده علشان المحشى ما يفكش مع الغليان..
أنا معنديش طبق إستانلس غطيت بطبق حلة تانية أصغر وبعدين غطا الحلة بتاعها..
أول ما يغلى وطى شويه وأول ما الشوربه تقل ويبتدى يتشرب وطى خالص ولو عندك صاجه بتاعت الرز حطيها وسيبيه يستوى براحتة أقل حاجه ساعة إلا ربع..
بصوا بقى مش هضحك عليكوا وأزوقلكوا طبق وأصورهولكوا لأ
المحشى مابيتاكلش غير كده…………………..
بغرفه فى صنية ألامونيا وأعيش بقى مع الصنيه وبدل ماباكل بإيد واحده وبتلات صوابع الحقيقة بلاقى فى الأخر العشر صوابع جوا الصنيه
أقولكوا على سر كمان بيخلى المحشى أطعم وأطعم قبل ما أغرف المحشى فى الصنيه بحط نص معلقة سمن بلدى فى الصنيه ونص معلقه عالوش بعد ما أغرفه بس إللى بيعملوا دايت مالهومش دعوة بالأكله دى خاااالص ماااالص "اللهم بلغت"
وبالهنا والشفا ياأحلى فتوكات
وماتنسوش التقييم
"اللهم هب لنا من أزواجنا وذرياتنا قرة أعين وأجعلنا للمتقين إماماً"
مواضيع هذا القسم برعاية
beroo82 beroo82 361383_4.gif فتكات هايلة Fatakat 361383 القاهرة والمعمورة بالدوحة – مصر وقطر