كيف حالكم يا فتوكاتي يا حبيباتي. يارب تكونوا بألف خير.
عندي عزومة, إن شاء الله هنعزم اخوات زوجي على الفطار.
عاوزين نعمل حاجات بسيطة مش مكلفة أوي وخفيفة علشان الحر والصلاة وكدة.
هما اتنين رجالة وزوجاتهم, وبنتين كبار واحتمال جدة زوجي كمان وأنا وزوجي طبعا, يعني تقريبا 9أشخاص.
بصوا يا حبايبي أنا كنت بفكر أعمل محشي بتنجان وفلفل وبشاميل ورز بالكبدة والقوانص وفراخ وطبعا شوربة لسان عصفور, والمشروبات عصير تانج وعصير فاكهة, وخشاف (بلح مع مشمشية مع قراصيا مع تين)
صينيتين بشاميل (كيلو إلاربع مفروم, كيلو إلا ربع مكرونة, 2كيلو لبن)
المحاشي (3كيلو بتنجان, 2كيلو فلفل, 2كيلو ونص رز. طماطم وخضرة)
الرز بالكبدة والقوانص (كيلو إلا ربع رز, نص كبدة وقوانص)
وطبعا 3فرخات أنا هحط للرجالة كل واحد نص فرخة والنساء والبنات كل واحد ربع.
أنا حسبت الحسبة لقيتها حوالي 220 جنيه وأكيد هيزيد لأن الحاجة غليت.
أولا: إيه رأيكم في اقتراحي؟ وفي المقادير؟ مع العلم إننا فطرنا عند إخوات زوجي محشي أول رمضان, بس هما بيحبوا المحشي.
ثانيا (ودي أهم): ياريت لو تدوني إقتراحات تانية وياريت لو تكون موفرة أكتر من اللي كتبته دة وسهلة وبسيطة في الشغل والتكاليف.
ثالثا: قولولي الكميات المظبوطة بالتقريب.
معلش طولت عليكم, بس ياريت تفيدوني ربنا يكرمكم لأني نفسي أعمل عزومة حلوة وأكلات حلوة وزوجي يتبسط والضيوف كمان وهدعيلكم كتير.
مواضيع هذا القسم برعاية
عنـــــــان عنـــــــان 489892_4.gif برنسيسة فتكات Fatakat 489892 القاهرة – مصر
سبحان الله و بحمده