السلام عليكم ورحمه الله وبركاته
مساء الخير على احلى فتوكات فى الدنيا النهارده طقت فى دماغى كده انى اكتب الموضوع ده بعد ما لقيت الحكاوى فيه بتكتر والردود ساعات مش بتفيد اللى بيسال مش هطول عليكم.
اولا: اسمحولى اتكلم بحرييتى بما ان المدونة ده نسائى وهيصه بقى
بصوا يجماعه كام واحده فينا بتهتم بنظافتها الشخصيه بشكل طبى صحيح مش هقول بتهتم عموما لان الحمد لله اكيد كلنا نضاف انا اقصد بشكل صحيح او تعليمات النضافه الشخصيه الطبيه يعنى
– كام واحده اول ماحست باى التهابات راحت للدكتورة عشان تاخد النصيحه الصحيحه بعيدا عن خبرات الاخرين بغض النظر عن الكسوف لانى اكتشفت ان الكسوف فى الحاجات دى بيودى فى داهيه سواء كنتى بنت او سيده لو انتى بنت اغلبيه دكاترة امراض النساء مش بتكشف كشف موضعى فمفيش اى احراج طبعا ودى المعلومة اللى غايبه عن اغلبيه البنوتات عشان كده الالتهابات او الشكوى ممكن تتدهور
– كام ام بتكلم بنتها عن الالتهابات والنضافه الشخصيه بتاعتها باسلوب لذيذ من غير ما تكسف بنتها منها وطبعا ده لمصلحه البنوته لانك تعرفى ان النضافه والحمايه من الالتهابات قبل الزواج بتحميكى من بلاوى سودا بعد الزواج وده بجد يابنات كل ما كانت ثقافتك فى النقطه دى عاليه واهتمامك زايد كل ما بعد الزواج اترحمتى من حاجات كتير انتى فى غنى عنها.
– نيجى بقى للام او البنوتات اللى قربوا يتجوزوا لكل ام هل بتكلمى بنتك عن الزواج بشكل كويس او لكل اخت كبيره كمان لان دورها بيكون كويس برضه هلى بتفهميها يعنى ايه حياه جديده وايه اللى المفروض تعمله وتاخد بالها منه
هل فكرتى انك تاخدى بنتك لدكتورة تطمنها او حتى انتى تقرى شويه حاجات كده وتطمنيها بنفسك ان اول يوم جواز البوبع اللى راعب البنات كلها ده مفيش احلى ولا اسهل منه وانه ممكن يكون اكتر يوم حلو هتفتكره فى كل حياتها بدل ما البنت تروح بيت جوزها وهى نفسها الارض تبلعها من كتر الخوف من الى سمعته عن اليوم ده
انا عارفه ان البنات بقت بتقرى كل حاجه وعارفه كل حاجه بس بجدكلام الام ده حاجه تانيه خاااالص وخصوصا لو ام كاجوال كده وعارفه احدث معلومات عن المواضيع دى
– يابنات ياللى قربتوا تتجوزوا والله اول يوم ده مفيش اسهل منه وشيلوا كل الهواجس من دماغكم لان فى حاجات طبيه دلوقتى لو سالتى اى دكتورة عليها هتقولك عليها بتخلى الموضوع ده مفيش اسهل منه انا مش بتكلم عن الجل انا بتكلم عن كريمات تانيه طبعا مش هقولها لان لازم الدكتورة هى اللى تنصحك النصيحه الصحيه وبجد بجد هتفيدك جداااااا وهتخليكى رايحه البيت سبع وانتى اللى تخوفيه مش هو
يابنااااااااااات اهتموا اهتموا بالله عليكم باى حاجه متعلقه بالنضافه بتاعتكم واى حاجه تتعبك لازم تروحى تكشفى وتطمنى واى ام لازم تفهم بنتها وتساعدها وتقرى كتير وتتعلم من تانى عشان بنوتتها تلاقى امها بتعرف ترد على اى سؤال ليها متحتاجش للصحاب اللى ساعات معلومتهم انتوا عارفين بتودى لفين.
– فهمى بنتك ان فى حاجه اسمها التهابات شهر العسل وان دى حاجه عاديه جدا وبتحصل لكل البنات بس بتختلف درجتها من واحده للتانيه على حسب كل واحده ومدى اهتمامها بنضافتها لان العلاقه الزوجيه هتبقى حاجه جديده تماما فليها اثار مختلفه على البنت وعى بنت وفهميها عشان تبقى فاهمه كل حاجه وده ولا عيب ولا حرام
انا طولت عليكم بس لقيت الموضوع ده جه فى بالى من كتر اللى بقراه من شكاوى هنا.
A new beginning A new beginning images/avatars/orangeflower.gif سوبر فتكات Fatakat 47734 مدينه الشروق القاهره – مصر