ازيكم يااحلى بنات
وحشتونى اوى اوى اوى
بقالى فترة مش بدخل ومش بتابع توبيكاتى ومش برد على استفسارتكم
بس معلش غصب عنى
اتجوزت يوم 30/6 فلاسبوعين دول مكنتش بدخل المدونة غير بالصدفة
المهم بقى
عايزة اقولكم الكواليس اللى حصلت قبل يوم فرحى بكام يوم على يوم فرحى نفسه
– اولا: الكوافير
انا بحب العملية تبقى متنظمة زى مانتو عارفين
فحجزت الكوافير قبل الفرح بشهرين تمام
انا مش من النوع الزنان اللى كل شوية يتصل بحد ويأكد ويزن ويقرف الدنيا
يعنى بدل حجزت يبقى خلاص كدا تمام
بكلم الكوافيرة قبل الفرح باسبوعين أأكد عليها
افاجا انها بتقولى انها فى مهرجان ومش هتقدر تجيلى طبعا اتصدمت
والىل ضايقنى انى لولا كلمتها مكنتش عرفت غير فى الوقت الضايع
طبعا اقعدت الف حوالين نفسى عشان الكوافير والحمد لله استقريت فى الاخر وعملت ميك اب عجب الناس كلها
ودى الصورة اللى ودتها للماكيرة عشان تعملى ميك اب زيها بس اتقل شوية
ودة يعلمكم حاجة وهى انكم تبقو زنانين
هههههههههههههههههه
دة بجد والله
اتصلو اكتر من مرة عشان تأكدو
ذوقيات التعامل بقت موضة قديمة دلوقتى
مش عشان حاجة بس ضغوط الحياة كترت
– يوم السويت والحنة
الحمد لله اللى عملت عندها كان عندها ضمير اوى
وبصراحة ظبطتنى
بس هى جتلى متأخر طبعا كنت مستوية وفى الاخر رسمت رسمة حنة على كتفى
وفوجئت انها بتقعد من ساعة ل3 ساعات
اقعدت بقى بسقط نوم ومكنتش اعرف الحوار دة وندمت
واللى ندمت عليه اكتر
ان بشرتى حساسة
فالحنة كانت بتحرقنى فى جلدى
وكانت مضيقانى جدا جدا
ومش استريحت غير اما اتقشر الجلد وخلصت منها
فبجد خلو بالكم لو بشرتكم حساسة حطى استيكر وخلاص
بدل الرسم ووجع القلب دة
وممكن يقرفك ويضايقك
فعلى اية
-يوم الفرح
طبعا انا كنت عاملة كتبت كتاب فى مسجد الشرطة من الساعة 10-11
والمسجد كان حلو جدا جدا بصراحة
وطبعا انا قلتلكم انى مش من النوع الزنان
فمش كلمت خطيبى غير مرتين تقريبا مرة الصبح
ومرة بعد ماخلصت الميك اب وقاعدة مستنياه
طبعا المفروض كان يبىقى عندى فى الكوافير الساعة 7 ونص عشان انا ساكنة فى الهرم
وكنا لسة هنروح صلاح سالم ويوم خميس فلكم ان تتخيلو
انا مستنياه وخلصت الساعة 7
هو جالى الساعة 9
كنت هفرقع طبعا
وهو ماشاء الله كان هادى
اكنه صاحب المسجد
هههههههههههههههههههه
بصراحة هدوئه هدانى شوية حسسنى ان فى امل
وهدى من التوتر
الحمد لله كنا طيارة على الطريق عشان نلحق
روحنا الساعة 10 ونص
لحقنا الحمد لله الربع ساعة
بس دة يعلمكم اية
انكم تبقو زنانين لتانى مرة بردوة
هههههههههههههه
وتفكروه بكل حاجة بالمواعيد
وبالحاجات اللى المفروض ياخدها
عشان الرجالة عندهم السهو جامد اوى
على عكس البنات بيفتكرو الحاجات الصغيرة قبل الكبيرة
وبينظمو وبيخططو لليوم دة اكتر من الراجل بكتير جدا جدا
الصور بقى
دى صور الفستان بتاعى ودة التوبيك الخاص بيه
https://fatakat.univanet.com/#864556
بالنسبة للطرحة
اانا مسمياها طرحة شهرزاد
وهى منفوشة و3 ادوار
وفيها كم لازق فيها باسورتين
شرحتها لعضوة هنا معانا كتر الف خيرها
عملتهالى زى مانا عايزة بالملى
وبالحمد لله دى التكة اللى عملتها والناس كلها علقت عليها عن اى حاجة تانية
عشان كانت غريبة جدا ومش اتعملت قبل كدا خالص
وانا بحب التكات اللى تفرق عروسة عن التانية وبتخليها مختلفة
خاصة ان المكان كان فى عرايس كتير
وعلى فكرة الطرحة دى تنفع للى مش بيحبو مظهر الباديهات
او درعاتهم مليانة شوية
ودى صور الموديل اللى عرضت الطرحة
ودى صورتها على الطبيعة
بالنسبة للاكسسوار
انا بحب اللولى اللى باسترس كدا وبيدى اناقة اوى اوى فى المظهر العام
مش بحب البندانات المطرزة او التطريز الاوفر اوى
ودة شكل الكولية اللى عملته كاكسسوار فى الطرحة
واشتريته من اكشن اللى فى سيتى ستارز
هو غالى شوية بس يستاهل
اما عن شكل الجيرب بتاعى
انا بحب الجيرب اللى يحسسك انك ملاك نازل من السما
وطبعا من اكتر الجيربات اللى تحسسك انك كدا
الابيض فى الاخضر
بيبقى رائع
ودة كان شكل الجيرب بتاعى
اما عن الصندل
انا بحب الجزم ااكتر طبعا
بحس انها اناقة اكتر
بس فى مصر مفيش اسوء من الجزم البيضا
بس السابوهات السوارية البيضا ملهاش حل
اينعم فى كل الحالات مش هيظهرو
بس انا بحب العملية تبقى كلها مظبوطة
والىل عملت حسابه لقيته
يعنى وانا نازلة من العربية او طالعة رجلى بتبان
فلازم يبقى اللى لابساه فى رجلك حاجة شياكة
لبست السابوة زى دة بس الفيونكة اللى وراء ستان وفى النص استرس
جبته من عباس العقاد
اما عن المانيكير
انا عملته لنفسى
عشان انا بحب اعمل الفرنش مانيكير جدا
بس كدا ياجماعة اتمنو اكون قدرت افيدكم فى اللى حكيته
واللى عايز يستفسر منى عن اى حاجة نو بروبلم
كان نفسى انزلكم صور الفرح
بس طبعا طبقا لقوانين المدونة فمش هقدر انزلهلكم
ربنا يسعدكم ان شاء الله يابنات
see you see you 252224_6.gif فتكات ست الكل Fatakat 252224 فى قلب جوزى حبيبى – c.u.s.l.m